خهون و خهیالا (ئیسفێ عهرهبى) دهولهتا كوردیه!!
پشتى بداوى هاتنا شهرێ جیهانى یێ دویێ ب 22 سالان، ل قونتارا چیایهكى ل گوندهكى هێلینا شۆرهشێ دو زارۆك ژ دایك بوون، ژ بهر عشقا بابێن وان بۆ سهیدایێ (سالح یوسفى) ئێك ناڤێ وى بوو یوسف و یێ دى بوو سالح، سالح كو نوكه ژیێ وى 50 كێم سالهكن و یوسف ژى پشتى سالهكا دى دێ ژیێ وى بیته نیڤ قرن، سالح بلا بمینت بۆ دهلیڤهكا دى، نوكه یوسف هێڤێنێ ڤێ نڤیسینێ یه. بابێ یوسفی كو چوویه رهحمهتێ وهختێ خوه رهوشا شاهى و شادیێن گوندێ خوه و یێن هاویر دوور بوو، كهیف و سهمایێن وان بێى وى نهدهاتنه گێران. ئیسف د زارۆكینیا خوه دا پهپلوژانكهكێ خوهشتڤى بوو ل دهف مالباتێ ژبهر كو ئهو نهخریێ دایبابان بوو، پشتى كو ژیێ وى بهرههڤى قوتابخانێ بوویى، ئیسف دگهل رهفهكا زارۆكێن گوندى قهستا قوتابخانهكێ ل گوندهكى ب رهخ وانڤه كر، ههلبهت زارۆكێن (5) گوندێن دهوروبهر دهاتنه وێ قوتابخانا ئێكانه، ئیسف و ههڤپولێن خوه رۆژانه دڤیابا 20 خولهكان ب پیان رێكا ڤێ قوتابخانێ ب قوتن. پشتى شۆرهشا ئیلۆنێ شكهستى، ئیسف دگهل مالباتا خوه دهربهدهرى وهلاتێ ئیرانێ بوو، ژ بۆ پهیداكرنا پاریهكێ نانى بۆ خووشك و برایێن خوه، ئیسفێ هێشتا نهبوویه زڕكوره ملێ خوه دا بهر بارێ گرانێ ژیانێ وهكو كاركهرهك خوه ل كارگهههكا رستن و چنینێ دامهزراند و ل سهر كارێ خوه بهردهوام بوو حهتا كو ژیێ وى دهربازى قووناغا سنێلهیێ بوویى، ژ نشكان ڤه دلێ وى بۆ كهله گهرما كوردینیێ غولغولى، رۆژهكێ سوارى (ئوتوبوسهكێ) بوو و ب دههان (كم) بڕین حهتا كو گههشتیه كوردستانێ و بۆ پێشمهرگه و سمینوفهك ب ملێ خوه ڤهكر ههمى دهما قوونتاخا وێ ژ بهرا دگرت ژ بهر كو بهژنا وى ههڤتهریبى بهژنا چهكێ وى بوو. پشتى سهرهلدانێ ئیسف دگهل مالباتا خوه ڤهگهریا كوردستانێ و ل باژێرێ زاخۆ بهردهوامى دا ژیانهكا نۆرمال، پاشان ژبهر گرانیا رهوشا ژیانێ و دهبارا زارۆكان، دوكانهكا بێ سهروبهر یا مهحفووران ل ناڤ باژێرى ڤهكر، ژبهر سهلیقه و دان و ستاندنا وى یا خوهش دگهل خهلكى، ههردهم دوكانا وى تژى بكڕ بوون، ژلایهكى دیڤه دوكانا وى قووناغا ڤێككهفتنا دوست و ههڤالان بوو. ل داویێ وهلێ هاتبوو خهلكى ژڤانێن ههڤدیتنێن خوه ددانانه دوكانا ئیسفى و ههمى دهما دوكانا وى تژى دوست و نیاس بوون، ههر بێهنهكێ فهرخهسێنیهكا چایا گهرم ژ دهستێن و تلێن (عهگیدێ) كورته بالا دهاته دوكانێ. ئیسف كو د رهفتارێن خوه دا هنهك نهرمه، لێ نهرماتیا وى ب قاسى نهرماتیا دلێ وی بوویه بهرامبهر ڤیانا ههمى مرۆڤان، لهورا ب رۆژێ دكانا وى تژى دوست و ههڤالن و ب شهڤ ژى مالا وى د خمخمكانرا مێهڤانن، ههڤژینا ئیسفى یا كو ناڤێ خوه ژ دارهكا ل بهر لێڤێن خابوورى وهرگرتى، ژنهكا كهیس ماقوول و ژێهاتیه، ههمى دهما ب روویهكێ ڤهكرى پێشوازیا مێهڤانان دكهت و ب گرنژین ڤه خوهشحالیا خوه بۆ مێهڤانا دیار دكهت و پتریا دهمێ خوه د لێنانگههێ ڤه دبۆرینت، دهما هندهك جاران مێهڤان ب ترانهڤه دبێژن: مه هوون عاجز كرن ههر شهڤ ئهم یێ ل سهر گوهێن ههوه، بهرسڤا وێ ههردهم ئهوه: ئهو مالا مێهڤان قهست نهكهنێ، مالهكا بێ رهوش و سار و تاریه.
ئیسفێ پۆرا وى ژبهر نهامهتیێن ژیانێ مینا گوپیتكا چیایێ (كاتویێ سویلێ) ل شهرگهها چلێ زڤستانێ دهمێ بهفرهكا گران ههمبێز دكهت لێ هاتى، بهرى دو سێ سالان بهرههڤیا خوه بۆ خانهنشینكرنێ دكر كو ئێدى ئهو ژیێ وى یێ مایى د ناڤ زارۆك و نهڤیكێن خوه دا ببۆرینیت و بهردهوامیێ ب ژینا خوه یا ساده بدهت، لێ چانسێ وى د وى دهمی دا تیرۆریستێن داعش پهیدا بوون و هێرشى كوردستانا مه یا تهنا كرن، لهورا ئیسفى بادهكا خوه یا خانهنشینیێ داخست و دهست دا چهكێ خوه و قهستا سهنگهرێن شهرى كر و حهتا رۆژا ئهڤرۆ ژى یێ ل بهروكێن شهرێ دژى تیرۆریستێن داعش و نیڤ ههیڤێ ل ماله و نیڤا دى ب ترۆمبێلا خوه یا پهلخى یا كو ژیێ وێ هندى نیڤهكا ژیێ وى، ل بهروكێن شهرى یه، لێ دیسان ئهو رۆژێن ئیسف وهكو بێنڤهدان دهێته مال، ب شهڤ مالا وى وهك خانهدانهكێ پڕ دبیت ژ ههڤال و هوگران، مینا كو ههڤسهنگهرێن وى ڤهدگێرن كو ل بهروكێن شهرى ژى ههمى دهما سهنگهرێ ئیسفى تژى دهور و بهرێن وى پێشمهرگهنه و دیوانا وى وهكو ئاگردانێ مالا وى گهرم و گوڕه، دهنگێ تاولێ و دومینێ ئهتموسفێرێ هندرێ مالا وى مالق دكن، ئیسف د یاریا تاولێ دا یاریكهرهكێ بێ بهڤل و ههمپایه، دهمێ زاڕى دگریت نیڤ دوشهش وهكو ئاڤ ڤهخوارنێ وههایه، جاران دهمێ د وهختێ پێدڤی دا جفتهكێ دئینت، خوارزایێ بابێ وى (شڤان) دبێژتێ: كوڕ و تو دهستنڤێژا خوه ل سهر كێلیا من خوهشكى ههكه ئهز قهبوول كهم باشه زاڕى جوان بههلاڤێژه دێ سڤك.
ئیسف نها خوهدیێ (10) دهه زارۆكانه و (9) نهه ژێ كچن و یا ههرى داوى زاروكهكا (مهنگولى) یا خوین شرین و رح سڤكه، نازداركریا ههمى ئهندامێن خێزانێ یه و تهڤ داخوازیێن وێ بێ سێ و دو د هێنه بجهئینان. پشتى ڤى ژیێ پرى خهبات و سهرئهڤراز و نشیڤى و قووناغێن خوهش و نهخوهش و نهداریێ، شهڤهكێ ئهز مێهڤانێ مالا ئیسفى بووم، وى ب حهسرهتهكا كوور و دلهكى تژى كوردایهتى و نیشتمانپهروهرى گۆت: خوهزى بهرى ئهز چركهیێن داوى یا ژیانا خوه ب هژمێرم من یهكرێزیا ناڤمالا كوردى و دهولهتا كوردان دیتبا، پاشان دا ب دلهكى تهنا ههرم گوڕى و مرنێ تو ب خێر وهرى.
دهمێ ئهڤ بابهته من گههاندى ڤێرێ، كلیكهك مابوو، دا بۆ رۆژنامێ فرێكهم، ژ نشكانڤه زهنگا تهلهفۆنێ هاته لێدان، دهنگهكى كز ب مهلوولى گۆت: شڤێدى ترۆمبێلا ئیسفى ل سهر رێیا دهۆك- زاخۆ هاتیه لێدان و نوكه ئهو و ههڤژینا خوه یێ ل خهستهخانا تهنگاڤیا ل زاخۆ و رهوشا وان نهجێگیره. من ژى پشتى تهزیلانكهكێ ددل دا گازیكره فهلهكێ و من گۆت: فهلهك تو دزانى ئیسفى ژڤانهكا دگهل ته ههى، حهتا دهولهتا كوردى نههێته راگههاندن تو ئیسفى راپێچى دنیایا سهرمهدى نهكهى و وێ حهسرهتێ پێلیه د دلی دا. خوهشبهختانه حهتا ئهز گههشتیم نهخوهشخانێ، ئیسف یێ هاتیه سهر هشێن خوه و نوشداران دلنیایى دایه كهس و كارێن وى كو چ مهترسى ل سهر ژیانا وان نهمایه، ئێدى لفافهكا سپى پۆرا سهرێ وى سپیتر كریه و خانما وى ژى هنهك جوانیا دێمێ خوه ژ دهست دایه.
