خواندنا بلند بۆ چارهكرنا كێشان دێ چيته بهغدا
ئهڤرۆ نيوز، فاتما مزوورى:
د. يوسف گۆران وهزيرێ خواندنا بلند و ڤهكۆلينێن زانستى راگههاند كو خواندنا بلندا عيراقێ مافێ پێدان و پێنهدانا باوهريێ ب زانكۆيێن ههرێما كوردستانێ نينه و دا زانين ژى كو شاندهكێ وان بۆ چارهكرنا كێشان دێ سهرهدانا بهغدا كهت.
ئهڤ گۆتنێن وهزيرێ خواندنا بلند د چارچۆڤێ سهرپهرشتيكرنا كۆمبوونا حهفتيانه يا جڤاتا ديوانا وهزارهتێ دا هاتن.
د. يوسف گۆران گۆت: “ژ بهر كو دستوورى ئاماژه يا ب وێ چهندێ كرى كو ئهم پشكهكا گرنگين ژ عيراقێ، ئهوان مافێ پێدان و پێنهدانا باوهريێ ب مه نينه، چونكو ئهڤ بابهته د دهستهلاتا ههرێما كوردستانێ و وهزارهتا خواندنا بلند و ڤهكۆلينێن زانستى ل ههرێما كوردستانێ دايه”.
گۆتژى: “كا چاوان ڤهكرنا قوتابخانهكا نوو مافێ ههرێما كوردستانێ يه، وهسان ژى ڤهكرنا زانكۆ و دامهزراوێن خواندنا بلند د دهستهلاتا وهزارهتا مه دانه”.
دا زانين ژى كو ئهركێ وان ب تنێ وهرگرتنا دوسيێن زانكۆ و دامهزراوێن خواندنا بلندا ههرێما كوردستانێ يه و گۆت: “دستوورى ئاماژه يا ب وێ چهندێ كرى كو پرۆسا خواندنێ ل عيراقێ دێ ب ههڤپشكى هێته دانان، ژ بهر هندێ ژى دڤێت د سهرهدانهكێ دا بۆ بهغدا بهحس ل وێ چهندێ ژى بكهين”.
ههر د ڤێ كۆمبوونێ دا بهحس ل وێ چهندێ ژى هاته كرن كو گهلهك جاران وهزارهتا خواندنا بلند و ڤهكۆلينێن زانستى بێ ڤهگهريان بۆ وهزارهتا خواندنا بلند لههرێما كوردستانێ كار ل گهل زانكۆيێن ئههلى دكهت و ل سهر وێ چهندێ رێكهفتن كو نابيت ژ نها و پێڤه بێ رهزامهنديا خواندنا بلند ل ههرێما كوردستانێ ئهڤ كاره بهێته كرن و ههڤدژى ڤێ چهندێ دێ ب “خيانهت ل گهل وهلاتى” سهرهدهرى ل گهل هێته كرن.
وهزيرێ خواندنا بلند بهحس ل وێ چهندێ ژى كر كو عيراقێ مافێن ههرێما كوردستانێ ژى نهداينه ههر وهكو گهلهك سكۆلهرشيپ بۆ عيراقێ دهێن و بههرا ههرێما كوردستانێ ناهنێريت و بۆ نمۆنه ژى 200 سكلۆرشيپێن ژ ئهمريكا بۆ عيراقێ هاتينه دابينكرن.
د داخۆيانيهكێ دا بۆ رۆژناما ئهڤرۆ هێمن ئهمين شوانى، رێڤهبهرێ راگههاندنێ ل ديوانا وهزارهتا خواندنا بلند و ڤهكۆلينێن زانستى ل ههرێما كوردستانێ گۆت: “ههر د وێ كۆمبوونێ دا رێڤهبهرێن گشتى هاتنه راسپارتن كو ب گۆرهيى پهيوهنديێن خوه دوسيێن تايبهت ب ئاريشان ئاماده بكهن و پشتى تهمامبوونا ئهوان دوسيان د دهمهكێ گهلهك نێزيك دا، سهرهدانا بهغدا بكهن ب مهرهما چارهكرنا ئهو كێشێن ههين”.
