خواندنا كاغەزی پتر دچیتە د مێشكێ زارۆكان دا
بێوار حەمدی:
ئێدی زارۆك ژی حەز ژ خواندنا گوڤار و پەرتوكان ناكەن و گەلەك دەمێ خو ب موبایل و ئابپاتێ ڤە دبورینن، چالاكڤانەكا جڤاكی ژی دیار كر كو لاوازیا خۆاندنا پەرتوك و گۆڤاران لدەڤ زارۆكان ژ بۆ خەمساریا دایك و بابان ڤەدگەریت و گۆت: خواندنا ل سەر كاغەزێ حەزا زارۆكی ژ بۆ خواندنێ پتر لێدكەت و باشتر دچیتە د مێشكی دا.
هەیفا دوسكی، چالاكڤانا جڤاكی و سەرنڤیسەرا گۆڤارا سڤۆرە یا زارۆكان د دیدارەكێ دا بۆ ڕۆژناما ئەڤرۆ دیار كر كو، بو ماوەیەكێ زور ڤەقەتیانەكا درێژ كەفتبو دناڤبەرا زارۆكی وخواندنا گۆڤار و پەرتوكان و گۆت: (لەوما مە وەكۆ ستافێ گۆڤارێ خۆ ل ڤی بابەتی كرە خودان و ب بزاڤێن خۆ بەرێ زارۆكان دا خۆاندنێ ڤە).
هەیفایێ گۆتژی: (خواندنا گۆڤارا یان پەرتوكان ل سەر كاغەزێ حەزا زارۆكان پتر لێ دكەت ژ بۆ خواندنێ، چۆنكی پتر دچیتە د مێشكێ وی دا ژ وێ یاكۆ ب ڕێیا ئامیرێن تەكنۆلۆژیایێ دگەهیتێ).
سەرنڤیسەرا گۆڤارا سڤۆرە یا زارۆكان هەیفا دوسكی د بەردەوامیا ئاخفتنێن خۆدا دیار كر كو ڕێژەیا لاوازیا خواندنا گۆڤار و پەرتۆكان ژ؟بو دایك وبابان ڤەدگەریت و گۆت: (ژبەركۆ دایك و باب دگەل پەروەردەكرنا زارۆكی دڤێت وی فێری خواندنا پەرتوكێن گشتی و زارۆكان بكەن هە تا وی راددەی وەكۆ دانەكێ خوارنێ بو وان یا گرنگ بیت، چۆنكی خواندن ژی خوارنا مێشكی یە بۆ زارۆكی).
هەیفایێ دیار كر ژی كو ئەو زارۆیێن بەردەوام گۆڤار و پەرتوكێن گشتی دخۆینن بێگۆمان دێ سەركەفتیتر بن و خودان پێگەهەكێ ڕەوشەنبیری و جڤاكی بن و ژلایێ كەسایەتیێ ژیڤە دێ زارۆكێن ئاڤاكری بن و گۆت: (ئەو پەرتوك و گۆڤارێن ژ بۆ زاروكان دهێنە ئامادە كرن هەموو د باوەرپێكرینە و گرێدایی ژیێ وانە و ب چ ڕەنگان ژ هێزا كەسایەتی و مێشكێ وان دەرباز نابیت).
سەرنڤیسەرا گوڤارا سڤورە هەیفا دوسكی ئەو چەندە ژی گۆت: (دڤێت دایك و باب هەموو بزاڤا بكەن بەرێ زارۆیێن خۆ بدەنە خواندنێ كا دێ چاوا شێت مفای ژ خواندنا پەرتوكان بینیت، لێ ب وی شێوەی كو كارتێكرن ل خواندنا وی یا قوتابخانێ نەبیت).
