خواندنا پەرتوکان مرۆڤی ژ خەموکیێ دوور دکەت
بێوار حەمدی:
گرنگیدان ب خواندنا پەرتوکان دبیتە ئەگەرێ گوهوڕینێن مەزن د ژیانا مرۆڤیدا، ژبەرکو خواندنا پەرتۆکان تێگەهشتنا مروڤی بۆ ژیانێ دگۆهوڕیت و پاشخانەیا مرۆڤی یا هزری و مەعریفی و زمانی دەولەمەند دکەت و ڕەوشەنبیریا مرۆڤی زێدە دکەت.
نڤیسەر، عەبدولرەحمان بامەرنی خودانێ 23 پەرتوکێن چاپکریە، بۆ ڕۆژناما ئەڤرۆ دیار کر کو خواندنا پەرتوکان فەرهەنگا زمانی ل دەڤ مرۆڤی دەولەمەند دکەت و ژلایێ ساخلەمی ژیڤە مرۆڤی ژ خەموکیێ دوور دکەت و دشێت تشتێ نوی ئاشکرا بکەت و گۆت: بلا دەسپێکا مرۆڤی یا خواندنێ بو وان پەرتوکان بیت یێن مرۆڤی دکێشنە خۆ و پاشی مرۆڤ دشێت لدووڤ تایبەتمەندیا خۆ پەرتوکێ دەستنیشان بکەت.
ئیبراهیم دێرگژنیکی، چالاکڤانە و خواندەڤانێ پەرتوکایە و هەموو جورێن پەرتوکان دخوینیت دیار کر کو وی پتر حەز لسەر خواندنا ڕومانان هەیە و گۆت: رومان دناڤ لاپەرێن خودا دیرۆکێ، گەشەپێدانا مروڤی، جڤاکناسیێ، فەلسەفێ… ب ساناهی پێشکێشی مرۆڤی دکەت.
ئیبراهیم گۆتژی: وەکی من تێبینی کری ل پەرتوکخانێن دهوکێ کچ پتر ژ کوڕان پەرتوکان دکڕن، بەلێ مە خواندەڤان ژ هەردوو رەگەزان هەنە، ب شێوەیەکێ گشتی خواندنا پەرتۆکا تێگەهشتنا مروڤی بۆ ژیانێ د گۆهوڕیت و پاشخانەیا مرۆڤی یا هزری و مەعریفی دەولەمەند دکەت و ڕەوشەنبیریا مرۆڤی زێدە دکەت.
داڤین ئەکرەم، کچەکا گەنجە، ئەوژی خواندەڤانا پەرتوکایە، دیار کر کو پەرتوک گوهوڕینێن مەزن د ژیانا مرۆڤیدا دروست دکەت، بتایبەت هەکە پەرتوک ب دروستی و ڤیان بهێتە خواندن ل وی دەمی دێ ناڤەڕۆکا وێ پتر کارتێکرنێ ل مرۆڤی کەت.
داڤینی د بەردەوامیا ئاخفتنێن خۆدا گۆت: ئەز پێشنیار دکەم بۆ هەر کەسەکی ب تایبەت کچان کو هەر ژ قوناغا ئامادەییێ دەست ب خواندنا پەرتوکان بکەن، بتایبەت ئەو پەرتوکێن گرێدایی گەشەپێدانا مرۆڤی، ژبەرکو پێزانینێن مرۆڤی زێدە دبن و کەسایەتیا مرۆڤی بهێز دکەڤیت.
