خواندنه‌ك ل دۆر گۆتارا عه‌بدوالا ئۆجه‌لان
بێگومان ته‌ڤایا ملله‌تێ كورد و سه‌ركرداتیا پارتا كریكارێن كوردستانێ و حوكمه‌ت و گه‌لێ تورك چاڤه‌رێ گۆتارا چاڤه‌رێكری یا عه‌بدولا ئۆجلان بوو سه‌رۆكێ زیندانكری یێ پارتا كریكارێن كوردستانێ كو وه‌كو زۆریا چاڤدێرێن سیاسی دبین كو ئه‌ڤ گۆتاره نه سل ئاستێ خه‌بات و به‌رخودانا ملله‌تێ كورد بوویه، چونكو گه‌له‌ك گورانكاری ل هه‌لویست و پره‌نسیپێن سیاسه‌تا عه‌بدولا ئۆجه‌لان دورست بووینه یاكو ژ هه‌میان زیقتر ئه‌وه ده‌ست به‌ردانه ژ ده‌وله‌تا نه‌ته‌وه‌ی یا كو چل سالان پارتا كریكارێن كوردستانێ خه‌بات بۆ كری ب هزاره‌هان شه‌هید پێناڤ داین و دژی هندی یه كو ده‌وله‌ته‌ك بۆ نه‌ته‌وه‌یه‌ك ده‌ستنیشان كری هه‌بیت ل چارچووڤێ وه‌لاته‌كێ فره نه‌ته‌وه به‌لكو ب پێدڤی زانی ده‌وله‌ت ل سه‌ر چه‌ند بنه‌مایین هه‌ڤپشك بهێته دورست ل توركیا كو ئه‌ڤ بنه‌مایه ب دیتنا من وه‌لاتێ توركی نینن چونكو ب ته‌مامی جوداهی هه‌یه د ناڤبه‌را پێكهاتێن وه‌لاتێ توركی، دیسا پرسا كوردی نه‌گرێدایی دیمۆكراسیه‌تكرنا ئه‌نقره یان ته‌هران و دیمه‌شق و به‌غدایه ئه‌ڤه پرسه‌كا ملله‌ته‌كێ یه كو گرێدایی كه‌لتوور و زمان و مێژوو و خه‌باتا چه‌نده‌هان سالانه به‌لكو گرێدایی مافێ چاره‌نڤیسه وه‌كو هه‌می ملله‌تێن دی دیسا بۆچی وه‌سا ب له‌ز و زوو ده‌ست به‌رده‌اربوون ژ پرۆژێ ده‌وله‌تا مه‌زنا كوردی ئه‌رێ ئه‌و چ گوهۆرین یان فشارێن ل سه‌ر عه‌بدولا ئۆجه‌لان ده‌ستبه‌رداری ئه‌ڤی پرۆژه‌ی دبیت نه‌كو ل توركیا ب تنێ به‌لكو ل ئیران و سووریا ب هه‌مان شێوه‌یه حزبێن نێزیك پارتا كرێكارێن كوردستانێ ده‌ستبه‌رداری ئه‌ڤی پرۆژه‌ی بووینه و ئه‌ڤه بۆ ئاینده‌ی ملله‌ته‌كێ مه‌ترسیداره. راسته پشتی رێكه‌فتنا و یستفالیا ده‌وله‌تین نه‌ته‌وه‌ی دورست بووینه، بوویه هۆكارێ نه‌سه‌قامگیری تایبه‌ت ل ئه‌ورۆپا، به‌لی ل سه‌ر هه‌مان پره‌نسیپێن نه‌ته‌وه‌ی ب ده‌هان وه‌لاتێن دی دورست بووینه، چونكو ده‌مێ عه‌بدولا ئۆجه‌لان داخواز ده‌وله‌تا كوردی یا ئێكگرتی دكر گۆتنێ نوو ب پیرۆز دهاتنه هژمارتن وه‌كو پرتووكێن پیرۆز سه‌ره‌ده‌ری دگه‌ل دهاته كرن به‌لی ده‌مێ دژایه‌تیا ده‌وله‌تا نه‌ته‌وه‌ی دكه‌ت وه‌سا دهیته شرۆڤه‌كرن كو ئه‌ڤه پرۆژه‌ك ئمپریالیه ل ده‌ستێ ده‌وله‌تین ئمپریالی دورست بووینه. له‌ورا ب میژوویا پارتا كرێكارێن كوردستانێ زۆر ب زحمه‌ته بوویه ره‌خنه ل عه‌بدولا ئۆجه‌لان بهێنه گرتن و هه‌كه ئه‌و كه‌سێن ده‌ست ژ وان به‌رداین ل سه‌ر ڤان هه‌لویستان ره‌خنێ لێ بگرن ب دووڤه‌لانك دهێنه هژمارتن.
ئه‌ڤه ژ ئالیه‌كی و ژ ئالی دن گه‌نگی وه‌لاتێ توركی گرنتی داینه كوردان كو هه‌می هیڤی و خواستین وان جێبه‌جێ بكه‌ت هه‌تا كو عه‌بدولا ئۆجه‌لان داخوازا گریدانا گۆنگرێ حزبا خوه بكه‌ت و تێدا داخواز دكه‌ت كو ده‌ست به‌رداری خه‌باتا چه‌كداری بن راسته سه‌رده‌مێ نوكه سه‌رده‌مێ خه‌باتا ئاشتیانه‌یه، به‌لێ ئه‌م ژبیر نه‌كن ئه‌و وه‌لاتێ ل به‌رامبه‌ر مه نه وه‌لاته‌ك سه‌رده‌میانه‌یه به‌لكو هزرێن وێ هێشتا پاشمایێن ئمبراتویه‌تا ئوسمانی لێ دیارن و هه‌كه خه‌باتا ملله‌تێ كورد نه‌بیت دوور نینه ب ناڤێ دیمۆكراسیێ داخواز ویلایه‌تا مووسلێ بكه‌ت و ئه‌ڤه ژی شاشیه‌ك كو ئه‌م زوو باوه‌ری بده‌نه وه‌لاته‌كێ وه‌كو توركیا بی كو لایه‌نێ سیێ پشكداربیت وه‌كو شاهد حاله‌ك ل سه‌ر گشت وان ریكه‌فتنێن دهێنه كرن، له‌ورا هه‌ر زوو پشكه‌ك ژ سه‌ركرداتیا پارتا كرێكاران ب شیوه‌كێ نه‌ئاشكه‌را هنده‌ك ژ ڤان پلانان ره‌تكرینه كو ل گه‌ل سیاسه‌تا نوكه یا حزبا وان و خه‌باتا چل سالی پا كرێكارێن كوردستانێ ناگونجیت.
دهاته شرۆڤه‌كرن كو په‌شێمانیه‌ك ژ خه‌باتا به‌ری نوكه هه‌یه تایبه‌ت قووناغا چه‌كداری و ئه‌ڤه جهێ پرسیاری یه نه‌خاسمه بۆ ملله‌ته‌كێ دڤێت زۆر ب هشیاری سه‌ره‌ده‌ریی ل گه‌ل ڤێ گۆتارێ بكه‌ت و نابیت ئه‌ڤ گۆتاره ببته بنه‌ما بۆ ستراتیجیا داهاتی یا ملله‌تێ كورد خوه هه‌كه ئه‌ڤ گۆتار نێزیك بیت ژ كه‌تواری چونكو سه‌ركردیه‌ك د زیندانا دوژمنێ خوه دا بۆ ده‌مه‌كێ درێژ گومان نینه گورانكاری دێ ل سه‌ر گه‌له‌ك هه‌لویستین وی په‌یدا بن، چونكو گرێدانه‌كا ب وه‌لاتی توركی ڤه دیاربوویه ده‌مێ به‌حس ل كۆمارا توركی و دستووره‌كێ بنه‌رت دكه‌ت.
خالا بالكێش ئه‌وه ل هه‌می سه‌رده‌مه‌كی كورد ده‌ستی ئاشتی درێژ دكه‌ن و ئه‌ڤ چه‌نده زۆر ب رۆنی ل گۆتارا عه‌بدولا ئۆجه‌لان هاتیه دیتن و خواندن و ئه‌ڤه بۆ توركیا و جڤاكێ نێڤده‌ولی خاله‌ك گرنگه هه‌كه دوپاتی ل ڤێ خالێ بهێته‌كرن، به‌لێ دڤیت نه ل سه‌ر كیستێ مافێن نه‌ته‌وه‌یێ یین كورد بن به‌لكو دڤێت توركیا ژی حازبیت ده‌ست ژ هنده‌ك پره‌نسیپێسن نه‌ته‌وه په‌رستی به‌رده‌ت تاكو قووناغا ئاشتی بهێته گونجاندن، چونكو زۆر گه‌شه‌سه‌ندێن سیاسی ل دونیایێ په‌یدا بووینه ب زه‌حمه‌ته بۆ وه‌لاتێ توركی بشێت سه‌رساخ ده‌ربكه‌ڤیت ب ڤی شێوازێ نه‌ته‌وه‌په‌رستی ل دووماهیێ هنده‌ك پرسیار هه‌نه ئه‌رێ ئه‌و ده‌م نه‌هاتیه خواندنا هزرێن به‌رێز عه‌بدولا ئۆجه‌لان بهیته‌كرن یانژی ره‌خنه ل سه‌ر گۆتارێن وی بهێنه نڤیسین تایبه‌ت ل سه‌ر دووماهیك هه‌لویست و گۆتارین وی چونكو نوكه پتر ئازادیه‌ك ل ناڤ سه‌ركرداتیا وان په‌یدا بوویه ژ قووناغا به‌ری نوكه و مه‌رما ئه‌ڤی خواندنێ هه‌ر ئه‌بوویه كو ژ روویی سیاسی ڤه ئه‌م سه‌ره‌ده‌ریی ل گه‌ل گۆتارا عه‌بدولا ئۆجه‌لان بكه‌ن نه‌ك ب سۆز و تاعیفا حزبی.
