خودانێن شوقه‌یێن هێژا ستی خرڤه‌بوونه‌كا نه‌رازیبوونێ ئه‌نجام دا
دهۆك، نه‌وزاد هلۆری:
ب مه‌ره‌ما ڤه‌گه‌ڕاندنا مافێن خوه، پشكه‌ك ژ بكڕێن شوقه‌یێن هێژا ستی ل دهۆكێ خرڤه‌بوونه‌كا نه‌رازیبوونێ ل هه‌مبه‌ر پارێزگه‌ها دهۆكێ ئه‌نجام دا.
ئیدریس جومعه، ئێك ژ نوونه‌رێن خرڤه‌بوویان بۆ ئه‌ڤرۆ گوت: “ئه‌ڤه جارا چارێ یه ئه‌م دهێنه هه‌مبه‌ر ئاڤاهیێ پارێزگه‌ها دهۆكێ و داخوازا مافێ خوه دكه‌ین، به‌لێ هه‌تا نوكه به‌رسڤا داخوازیێن مه نه‌هاتیه دان، نوكه پتری 80% ئاریشێن خودان شوقه‌یان ل پارێزگه‌ها دهۆكێ هاتینه چاره‌سه‌ركرن و ب تنێ ئه‌م یێن ماین و دخوازین یێن مه ژی بهێنه چاره‌سه‌ركرن”.
ئیدریس زێده‌تر گوت: “172 شوقه نوكه ل هێژا ستی ماینه، مخابن ئاریشێن پشكه‌كا هه‌ره زۆر یا خودان شوقه‌یێن هێژا ستی ب واسته هاتینه چاره‌سه‌ركرن، هنده‌كا پشتی مه شوقه‌یێن كرین و نوكه چو ئاریشه نینن، ئه‌ڤ خه‌لكه هه‌موو هه‌ژار و كێم ده‌رامه‌تن و پاه‌كێ زۆر مه‌زاختیه و چو ب ده‌ستڤه نه‌هاتیه”.
لوقمان ئه‌حمه‌د، ئێك ژ خودانێن شوقه‌یێن هێژا ستی و خرڤه‌بوویان بۆ ئه‌ڤرۆ گۆت: “به‌ری حه‌فت سالان مه وه‌كو خێزان 13 شوقه یێن كڕین و هه‌ر شوقه ژی ب نێزیكی حه‌فت ده‌فته‌ران، ئه‌ڤه حه‌فت سال بۆرین نه مه شوقه دیتن نه ژی پارێ مه زڤڕی ڤه، له‌و دخوازین حوكمه‌تا هه‌رێما كوردستانێ و كارگێریا پارێزگه‌ها دهۆكێ بهێنه سه‌ر خه‌ت و مافێ مه بزڤڕینن”.
