خودانێ فه‌یسبۆكی جاره‌كا دی دێ چیته به‌ر سینگێ دادگه‌هێ
ئه‌ڤرۆ:
ل سه‌ر رێڤه‌به‌رێ كارگێری یێ كۆمپانیا مێتا مارك زوكربێرگ پێدڤیه دانپێدانان بۆ ماوێ شه‌ش ده‌مژمێران ل دۆر هه‌تكبه‌ریا كه‌رمبیرج ئه‌نالاتیكا بده‌ت ئه‌وا ل سالا 2008ێ هاتیه ئاشكه‌را كرن.
ئه‌ڤ كریاره ژ ئه‌نجامێ وێ سكلا ب كۆمه ئه‌وا بكارئینه‌رێن فه‌یسبۆكی ل سه‌ر كری و روونشت دێ ل كالیفۆرنیا ب رێڤه چیت و تێدا دێ 1200 به‌لگێن نهێنی ل دۆر بابه‌تی هێنه ئاشكه‌را كرن.
دامه‌زرێنه‌رێ فه‌یسبۆكی ل روونشتنه‌كا گوهداریكرنێ یا لژنا هه‌ڤپشك یا جڤاتا پیران یا ئه‌مریكی ل سالا 2018ێ ئاماده ببوو و دانپێدانێن خوه دابوون ل دۆر چاوانیا تێكه‌لیا وی ل گه‌ل كۆمپانیا ناڤبری و چاوانیا بكارئینانا پێزانینان.
زوكربێرك ل وێرێ دانپێدان كربوو كو پێزانین ب كۆمپانیا شیره‌تكاری یا سیاسی كه‌مبریج ئه‌نالاتیكا هاتینه فرۆتن بێ ره‌زامه‌ندیا وی.
ل سالا 2008ێ هاته ئاشكه‌را كرن كو كه‌مبریج ئه‌نالاتیكا یا شرۆڤه‌كاریا پێزانینان یا بریتانی پێزانینێن 87 ملیۆن پشكدارێن فه‌یسبۆكی بكارئیناینه بێ كو بكارئینه‌ر بزانن ئه‌ڤ چه‌نده یا هاتیه كرن.
هه‌ر ژ ڤێره و هه‌تا نها كۆمپانیا خودانا فه‌یسبۆكی بزاڤێ دكه‌ت ڤێ هه‌تكبه‌ریا خوه ڤه‌شێریت و بێژیت كو گرنگیێ دده‌نه تایبه‌تمه‌ندیان سه‌ره‌رایی وێ چه‌ندێ كو ب پێنج ملیۆن دۆلاران هاتبوو سزادان و بۆ ڤێ چه‌ندێ ناڤێ كۆمپانیا خوه ژی ژ مێتا بۆ فه‌یسبۆك گوهۆڕی، به‌لێ هێش باوه‌ریا خه‌لكی پێ ناهێت و دبێژن كو تایبه‌تمه‌ندیێ ناپارێزیت، سه‌ره‌رایی وێ چه‌ندێ ژی خه‌لك گه‌له‌ك ڤێ تۆڕێ بكار دئینیت.
