خوزی مللەتێ كورد خیانەت ل عەقلێ خوە نەكربا
دیدار، سالار محەمەد دۆسكی:
2-3
مەچایەك ل گەل ئێك ڤە خوار، نێزیك مە ترۆمبێلەكا هەوالگێری یا ئیراقێ یا راوستیایی بوو ل دەسپێكا هەیڤا دوازدە هاتمە دەستەسەركرن ل فەلوجە و گۆتن تو جاسوسێ (مەلا مستەفا بارزانی) پشتی دەستەسەركرنێ برمە رومادی و ب شەڤ برمە دەف دادوەری وی دەمی زمانێ منێ عەرەبی گەلەكێ یێ لاواز بوو، من گۆتێ ئەز چ ژ جاسوسیێ نوزانم ئەز ژ توركیا هاتیمە دەڤەرێ دا بخوە فێرببم، من دل نەدا ناسناما مامۆستایێ خوەیێ زاخۆ (ئسماعیل ناڤشكی) ئەوا بوو من دروستكری نیشا بدەم و من هزر كر دێ نەخوشیەكێ بۆ دروستكەم ب رادەستكرنا ناسناما خوە و دیسا من دل نەدا (ناسناما زاویتەی) یا ژی نیشا بدەم و من هزر كر دێ نەخوشی بۆ ئەوان پەیدا بم، دادوەری نەشیا چ بكەت جارەكا دی زڤراندمە بنگەهێ پولیسان، هندەك پولیسان هاریكاریا من كر ل زیندانێ خوارن و نڤین بوومن ئینان و پولیسا دەرگەه بوومن ڤەكر درەنگی شەف چووم من دەست نڤێژا خوە ب ئاخێ گرت بۆ ئەنجامدانا نڤێژا خوە، روژا دی سپێدێ ئینامە ئەمنا گشتی ل بەغدا و (مەلا شەریف دۆسكی) دووف من راهات، ئەو دەم بوو دەمێ حزبا بەعس بزاڤا تیرۆكرنا (ئدریس بارزانی) كر و ئەو كەسێن دەستە سەركرین كورد بوون ل زیندانێ هاتن گەل من ئاخفتن و گۆتن كا تو پێدڤی ب چی مەهەنە پارە تە ڤێن من گۆتێ گەلەك سوپاس هەمی تشت من هەنە و گۆتن گەلەك دلێ مە ب تەڤەیە چونكە ئەز (مەمەری) نڤستم وی دەمی (17) دینار بەریكامن دابوون و شێخ عەبدوالعەزیز ژی ئێك دابوو من، روژا دی ل زیندانێ دەرخستم و ڤەگوهاستمە ژوورەكا دی من ژنەك و زەلامەك دوێ ژوورێ ڤە دیتن و ل دانێ نیڤرۆ پولیسەك هاتە بەردەرگەهی و گۆتی ئەگەر هەوە خوارن ڤێت و ژنكێ عەبا ل سەر سەروچاڤا بوو و زەلامی گۆت مامۆستا ئەڤە دو شەف و سێ رۆژە مە خوارن نەخواری و من پارە دانە پولیسی خوارن بوومە ئینا و هەر دو كورد بوون خەلكێ هەورەمان بوون، بەری بانگێ مەغەرەب ل دەف وان ڤەگوهاستم زیندانا (سەلمان پاك) وێ سالێ ل بەغدا بەفر هات بوو و گەلەك دنیا یا ساربوو، (مەلا شەریف) بدیف شیانێن خوە ل من گەریا و پرسیارا من كەت و (لەزگین سندوری) ژی ل سەر گرتنا من ئاگەهداركر، سێین ئیرانی دزیندانێ دابوون و بەتنیەكا دامن و وێ شەڤێ گەلەك من ساربوو و هەتا پیەكێ من بێ رح ب بوو و من گەلەك كرە گری و دلی ئەوان ماب منڤە و كرمە دناڤبەرا خوە دا هەتا سپێدێ و دووڤ دا ڤەگەریاینە بەغدا و پشتی ماوەكی زڤراندیمە مویسل ل زیندانا (دەواسا) پشتی ماوەكی زڤراندمە دهۆكێ بنگەهێ پولیسان و پولیسەكێ كورد هەبوو من گۆتێ بێژە فەقیا ئەز ل دهۆكێ مە و یێ بزاڤا دكەن من ڤەگوهێزنە زاخۆ ب مەرەما وێ چەندێ بهێمە رادەستكرن بۆ حوكمەتا توركیا، (مەلا عەلی گەرماڤی) دووف من را هات هاتە بنگەهێ پولیسێن زاخۆ و پارە دانە من وی دەمی (مەلا ئسماعیل ناڤشكی) ئاگەهدار بوو ل سەر گرتنا من و هاتە بنگەهێ پولیسان و گۆتە من كا ئەو ناسناما من بووتە چێكری؟ من گۆتێ مامۆستا من ئەو ناسنامە رادەستی پولیسان نەكر دا چ نەخوشی بۆ هەوە دروست نەبن، دووڤ دا (لەزگین سندوری) نامەك بۆ لژنا ناوچا پارتی ل زاخۆ هنارت و فەرمانا ئازادكرنا من دا و جارەكا دی هاتمە ئازادكرن، ڤێ جارێ سێ هەیڤ كێم دو رۆژا مامە دزیندان دا.
مەلا نەزیر ئەو ژی گۆت: ل سالا 1970ێ و پشتی بەیانا 11 ئادارێ جارەكا دی و بخوینەكا گەرمتر هاتینە ناف باژێرێ دهۆكێ و مە دەست ب رێكخستێن خوە كرە ڤە و گەلەك بهێز لێ هاتن رێكخستنێن مە و بەردەوام بووین هەتا سالا 1975ێ دەمێ شورەش تێكچووی خەلكی چەكێ خوە رادەستی حوكمەتێ كر و دەسپێكێ چەك (ئدریس بارزانی) دیاری دابوو من و من سوزدا چەكێ خوە رادەستی حوكمەتا ئیراقێ نەكەم و من تڤەنگەكا كورت هەبوو و من هزر ل شكاندنێ كر و دووڤ دا ئێكی گوتە مە بدە من دێ 40 دینارا دەمەتە و من دایێ ب وی شەرتی رادەست نەكەت، كاودان گەلەك نەخوش بوون و من گەلەك جاران هزرا خوە كوشتنێ دكر چونكە چونکە دەروونێ مە گەلەک تێکجووبوو. و هەمان دەم مە دگۆتە خوە ئەم مامۆستایێن ئاینی نە دێ چ بێژنە خەلكی و دێ بمە كوژەكێ نەفسا خوە و بڤی رەنگی ل گەل خوە تاخفتم و من خوە رادەست كر 6/5/1975 مە دەست ب رێكخستێن نهێنی كر ل گەل كاك (عوبید هاریكی) شەهید بوویە و مە گۆت ئەم هەمی (مەلا مستەفا بارزانی)نە دیسا (عەبدولخالق گوهەرزی) و ئەم قوتابی بووین ل مزگەفتا (حەجی مستەفا)ی و مە گۆت دڤێت شورەش یا بەردەوام بیت و بەردەوام بووین هەتا سالا 1976 بەحسێ سەركردایەتیا بەروەخت یا پارتی دیموكراتی كوردستان هاتەكرن، هاتە راگەهاندن كو (حەیدەر ئێسفكی) كومبوونەك ل گورستانێ كریە (سەلمان بەرواری، رەمەزان هدێنی، مجید) و مە گۆتێ ئەم ژی ل گەل هەوەینە و ئەڤە ل دوكانا دەمژمێرا مە ل گەل ئاخفت و من گۆتێ ناڤێ منێ نهێنی (مهاباد) پشتی ماوەك بوری حوكمەتێ بریار دا ئەگەر مامۆستایێن ئاینی تاقیكرنەكێ بكەن دێ بنە فەرمانبەرێن دەولەتێ و مامۆستا (ئسماعیل ناڤشكی) و ل گەل چەند مامۆستایێن دی هەیڤا 12/1976 فەرمانا دامەزراندنا مە ئینا و من هێجەت گرتن ب بهانا وێ چەندێ كومن تاقیكرن هەنە و جارێ نوكە نەشێن دەست بكاربوونا خوە چێكەم و بتنێ خەما من ئەو بوو دەست بكاربوونا من بكەڤیتە هەیڤا نەوروزێ و هەتا 21/3/1971 چوومە مزگەڤتا بەروشكا كاتولیا بوومە مامۆستایێ وێ مزگەفتێ و من فەرمانا خوە ژ زاویتە وەرگرت و من دەوام كر و ئێكەم مووچێ من وەرگرتی (35) دینار بوو، هەیڤا سێ سالا 1977 هەڤالێ مە (حەیدەر ئێسفكی) هاتە دەستەسەركرن و من خێزانا وی دیت و من گۆت هەر هەیڤ وەرە ڤێرێ بخوە (5) دینارا بە وەك كرێیا هەوە هەتا هەیڤا پێنچ هەمان سال ئێك هەبوو دگۆتنێ (سلێمان عیسا) ل سەر نڤێژێ سالا 1974ێ هاتە دەستەسەركرن و دادگەها سەورە بریارا سێدارەدانا وی دەركر و ئەفسەرێ ئەو دەستەسەر كری گۆت ڤی مرۆڤی شەر نەكریە و من تڤەنگا وی راكریە و ئەو ل سەر نڤێژێ هاتیە دەستە سەركرن و پارە بۆ حوكمەتێ هاتنەدان هەتا سزایێ وی بوویە هەتا هەتا و دووڤ دا ب بریارەكێ هاتە ئازادكرن، جارەكێ گۆت من شولەكی ل سەرسنگێ دكەم و من هندەك بەلاڤووك هەنە و من نەڤیا بووی دیاركەم كو ئەژی رێكخستیێ پارتی دیموكراتی كوردستانم و حوكمەت ئەوان سالان گەلەك یا دژوار بوو.
