خولا ئیراقێ دێ ب سۆپرایزێن مەزن دەستپێكەت
قەیس وەیس:
ژێدەرێن رۆژنامەڤانی ل بەغدا دیار كرن ئاهنگا دەستپێكرنا وەرزێ نوو یا خولا تەپا پێی یا ئیراقێ یا پیشەكاران دێ ب سۆپرایزێن مەزن دەستپێكەن كو دهێتە هژمارتن بۆ جارا ئێكێ د دیرۆكا تەپا پێی یا ئیراقێ دا ژ وانا ئامادەبوونا مەزنە بەرپرسێن وەرزشی و وەرزشڤانێن ب ناڤ و دەنگ ل سەر ئاستێ جیهانێ و رێكخستنا جودا یا ئاهنگێ، ئەوا بڕیارە هەڤڕكیێن وێ ل 27ێ ڤێ مەهێ بهێنە ئەنجامدان.
هەمان ژێدەر دیار كر پشتی گرێبەستا فیدارسیۆنا تەپا پێی یا ئیراقێ دگەل دەستەكا خولا ئسپانیا لالیگا ژبۆ رێكئێخستنا خولا ئیراقێ یا پیشەكاران یا وەرزێ 2023-2024ێ و دانانا پرۆگرام و پلانان، ئەڤ پرۆژە بۆ محەمەد شیاع ئەلسودانی سەرۆك وەزیرێن ئیراقێ هاتییە پێشكێشكرن ئەوێ پشتەڤانییا خوە دیار كری تایبەت لایەنێ دارایی و بڕیارە سوبەهی پرۆژەیێ خولێ بۆ ئەنجوومەنێ وەزیرێن ئیراقێ بهێتە خواندن و رازیبوونا فەرمی ل سەر دانا پارەیێ پێدڤی بۆ بڕێڤەبرنا خولێ ژ وانا چار ملیار دۆلار بۆ یانەیێن پشكدار هاتینە تەرخانكرن.
دیار كر ژی ل 20ێ ڤێ مەهێ دێ پشككێشانا خولێ دهێتە كرن و چەندین بڕگەیێن ئاهنگا هێنە بڕێڤەبرن ژ وانا پێشكێشكرنا لۆگۆیێ نوو یێ خولێ و دێ كەسانێن بەرنیاس یێن وەرزشی ل سەر ئاستێ جیهانێ پشكداربن و دوور نینە سەرۆكێ فیدراسیۆنا فیفایی و ئاسیا دگەل چەند ژ ستێرێن جیهانی ژی بەرهەڤبن، هەروەسان بەری دەستپێكرنا یاریێن گەڕا ئێكێ یا خولێ چەند چالاكیێن جودا هەبن.
بۆ زانین هەر ئێك ژ یانەیێن دهۆك، زاخۆ، هەولێر و نەورۆز دێ پشكداری وەرزێ نوو بن، سەرباری بڕیارا حوكمەتا ئیراقێ ب بێ بەشكرنا یانەیێن كوردستانێ ژ ئەوێ پشتەڤانییا دارایی یا سەرۆك وەزیران، ل ڤێ دووماهیێ چیایی تەیمۆر عەبدال وەكو پەرلەمانتار ژ فراكسیۆنا پارتی دیموكراتی كوردستان و سەرۆكێ لژنەیا وەرزش و لاوان ل چڤاتا نوونەرێن ئیراقێ نڤێسارەكا فەرمی یا پشتەڤانیا دارایی ژ سەرۆك وەزیرێن ئیراقێ كرییە بۆ هەرچار یانەیێن هەرێمێ هەڤسەنگی دگەل یانەیێن دی یێن ئیراقێ.
