خولا ئیراقێ و شاشیێن كوژەك یێن دادڤانان
ئیحسان حەسەن
گومان تێدا نینە كو شاشیێن دادڤانان دخولا ستێرێن ئیراقێ یا فوتبۆلێ دا ئێكە ژ بابەتێن هەرە گرنك یێن كو پێدڤییە بەحس لسەر بهێتە كرن، ژبەر كو ئەوا نها ئەم دبینین ب تایبەتی دڤان گەرێن داویێ دا، ل سەر ئەنجامێ شاشیێن دادڤانێن نیڤا یاریگەهێ، دیسان یێن ژۆرا ڤارێ یێن كوژەك، كارتێكرنا وان یا دیارە لسەر كاروانێ یانەیان ب تایبەت یێن هەرێما كوردستانێ ئەوێن نها هەڤركییێ ل سەر رێزێن پێشییێ و ناسناڤی ومانا خوە دخولێ دا دكەن، ئەڤ شاشیێن مەزن و سەیر و سەمەر ل شوینا هندێ كو لژنەیا دادڤانان ب هندەك پیرابوونان رابیت و وان دادڤانان سزا بدەت یێن كو ب دروستی ب ئەركێن خوە رانەبن، داكو ببیتە وانەیەك بۆ یێن دی، جارەكا دی باوەریا جادەیا وەرزشی و پشتەڤانێن فوتبۆلێ ب دەستڤە بینیت یێن كو ب درێژاهییا یاریێن قۆناغا دویێ ژدەستداین، هەتا نها مە جارەكێ ژی چ بەیانامەیەك ژ لژنەیا دادڤانان نەدیتی یە بۆ ڤان هەتكبەریان یێن كو قارەمانێن وێ هژمارەكا دادڤانێن مە یێن خومالی د ناڤا یاریگەهێ دانە، دیسان دادڤانێن ژۆرا گرتی نە یێن كو نەدادیێ بكار دئینن بۆ بەرژوەندیا هندەك یانەیان بێ دیاركرنا ناڤێن وان ل سەر كیستێ یانەیێن دی دكەن، جهێ حێبەتییێ ئەوە كو هەر ئەڤ دادڤانە بوون یێن كو ل دەستپێكێ خولێ ژبەر ئاستێ وان یێن باش درێڤەبرنا یاریان دا خورتی لێ هاتیەكرن و هاتینە برینداركرن، چونكو یاسا فوتبۆلێ بكاردئینان، بۆ ماوەیەكی داخوازا لیبورینێ ژ ئێكەتییا ئیراقێ كرن كو ئەگەر سلامەتییا وان نەهێتە پاراستن ئەو یاریێن خولێ برێڤەنابەن، لەوما لڤێرە پرسیارەك دهێتە پێش، چ هاتە گوهۆڕین تا كو رەوشا دادڤانییا خولێ ب گەهیتە ڤێ ئاستێ نزم؟ ئەز دبێژم بۆ بەرسڤدانا ڤێ پرسیارێ، ئەز باوەرم و هیڤیا من ئەوە هووسا نەبیت، گڤاشتنێن مەزهەبی و نەتەویی، دیسان یێن جەماوەری و راگەهاندنێ، ژبلی ڤیانا وان بۆ یانەیێن پایتەختی یێن مەزن كارتێكرنەكا دەرۆنی ل سەر وان كریە، بوویە ئەگەرێ هندێ كو ئاستێ وان بهێتە خوار، یا من دڤێت ل دووماهییێ بێژم من نەڤێت ئەز د بۆچوونا خوە دا ناڤێن وان یاریان بینم یێن كو دادڤانان زۆلم لێ كرین و كارتێكرن ل ئەنجامێن وان كرین ب تایبەتی یێن كوردستانێ، دا كو ئەم ژی پێنوسێ خوە نەئێخینە لبن بارێ لایەنگیریێ دا، پێدڤییە لسەر لژنەیا دادڤانان، هەروەسا بازنێ دادڤانییێ ل فدراسیۆنا فوتبۆلا ئیراقێ بلەز سنورەكی بۆ ڤێ ئاژاوا دادڤانییێ بدانن، هەلویستەكێ ئێكلاكەر وەربگرن بۆ هندێ جارەكادی باوەریا وە رزشڤان و حەژێكەرێن فوتبۆلێ بدەستڤە بینن، ژبەر كو ئەوا نها ئەم دبینین كارەساتەكا مەزنە، ئەگەر رێكە چاریەك بۆ وژدانا وان دادڤانان نەهێتەدانان، بەری ئەو باوەریا پشتەڤانێن فوتبۆلێ هەمیان دیاریێن مایی دا ژ دەست بدەن، بێ دو دلی ئەز پاشەرۆژا فوتبۆلا ئیراقێ و ناڤ ودەنگییا وێ خرابتر دبینم، خودێ هاریكارێ مە هەمیان بیت.
