خولا نایابا ئیراقێ دێ هێته راوه‌ستاندن
ئه‌ڤرۆ، قه‌یس وه‌یس
فۆتۆ: هه‌ڤال بریفكانی
لژنا به‌ریكانا ل ئێكه‌تیا ته‌پا پێی یا ئیراقێ ژڤانێ راوه‌ستاندنا هه‌ڤڕكیێن خولا پلا نایاب دیاركرن پێخه‌مه‌ت به‌رهه‌ڤیێن هه‌لبژارتیێ ئیراقێ بۆ كۆپا كه‌نداڤیا ئه‌ره‌بی ئه‌وا بڕیاره هه‌ڤڕكیێن وێ ل شه‌شێ كانوونا دویێ یا سالا 2023ێ باژێرێ به‌سرا ب پشكداریا هه‌شت هه‌لبژارتیان مێڤانداریا وێ بكه‌ت.
نه‌جم ئه‌له‌وسی ئه‌ندامێ لژنا به‌ریكانا دیاركر پشتی ئه‌نجامدانا گه‌ڕا 12ێ ژ خولا پلا نایاب بڕیار هاتیه دان ل 25ێ ڤێ هه‌یڤێ هه‌ڤڕكیێن خولێ بهێنه راوه‌ستاندن ژبه‌ر هه‌بوونا هژماره‌كا یاریزانان ژ پرانیا یانه‌یێن خولێ ل گه‌ل هه‌لبژارتیێ ئیراق ئه‌وا خوه به‌رهه‌ڤ دكه‌ت بۆ كۆپا كه‌نداڤی25ێ كو بڕیاره قاره‌مانی ل شه‌ش هه‌تا 19ێ كانوونا دویێ یا سالا 2023ێ ل باژێرێ به‌سرا بهێنه ئه‌نجامدان دیسان ل دووڤ داخواز راهێنه‌رێ هه‌لبژارتیێ ئیراقێ خیسۆس كاساس ل 27ێ ڤێ هه‌یڤی هه‌موو یاریزان دێ كه‌ڤنه لبن راهێنانان دا.
بۆ زانین ل شه‌مبیا بهێت تیما یانه‌یا دهۆك ل ده‌مژمێر 4:15 دێ مێڤانداریا یانه‌یا نه‌وروز ل یاریگه‌ها خوه یا سه‌ره‌كی كه‌ت، ل رۆژا ئێكشه‌مبیا 25ێ ئه‌ڤێ هه‌یڤێ دێ زاخۆ ل به‌غدا بیته مێڤانا یانه‌یا شورته ل ده‌مژمێر دو یێ پشتی نیڤرۆ و هه‌ولێر دێ بیته مێڤانا یانه‌یا جه‌ویه ده‌مژمێر 6:30 مه‌غره‌ب و دووڤدا دێ خول هێته راوه‌ستاندن.
