خوهدانا زێدە ئاریشەیێن جڤاكی و كەسایەتی پەیدا دكەت
بەرپەرێ ساخلەمیێ:
د.پەیمان مستەفا، نوشدارا تایبەتمەندا نەخۆشیێن پیستی دیاركر كو خوهدانا زێدە ئاریشەكا دژوار یا پیستی یە، د ژیێ گەنجاتیی و زاروكاتیێ دا هندەك پێ د ئێشن، و دهێتە نیاسین ب خوهدانا زێدە یا گلاندێن خوهدانێ ژ بەر نەگونجاندنا وێ دگەل پلەیێن گەرماتیێ و د هەموو جهێن لەشی دا پەدادبیت و بارا پتر بن كەڤشا و دەست و پێیان دگریت و ئەڤە دبیتە ئەگەرێ نەخۆشیی و ئالوزیێ و تێكدانا هەڤسەنگیێ دگەل ژیانا روژانە یا جڤاكی و دبیتە ئەگەر فشارێن دەروونی ل سەر كەسایەتیا وی زێدەببن.
دیاركر ژی دگەل بلندبوونا پلەیێن كەش و هەوایی تایبەت ل وەرزێ هاڤینێ كو د چیتە سەر 44 پلەیێن سیلیزی، خوهدانا زێدە دبیتە بەربوونا زێدە بو لەشی و پێدڤی ب چارەسەرەیێ هەیە و گۆت: راستە خوهدان ئاریشەكا سروشتی یە، بەلێ خوهدانا زێدە ئاریشەیە بو هندەكان، و ئەڤە دێ یا ب زەحمەت بیت كو زال بن ل سەر ب رێكێن ب كارئینانا كەرەستێن لەشجوانیێ و یێن ساخلەمی و ئەڤ خوهدانە ژلایێ زانستی ڤە ب (خوهدانا زێدە) دهێتە نیاسین.
دەربارەی جیاوازیا دناڤبەرا خوهدانا نورمال و خوهدانا زێدە، د.پەیمان مستەفا دیاركر كو خوهدان ئاریشەكا مەزنە و كەسانێن خوهدان ل دەڤ خوهدانەكا زێدە دەردئێخن كو چار یان پێنج جاران ژ مروڤێ ئاسایی پترە و خوهدان دبیتە ئەگەر كو مروڤ هەست ب نە ئارامی و نەرەحەتیێ بكەت د ناڤ جڤاكی و كومەلگەهی دا.
دەربارەی جورێن خوهدانێ ژی دیاركر كو سێ جورێن خوهدانێ هەنە ژوانژی، خوهدانا سەروچاڤان: خوهدان دەست پێ دكەت ژ ئەنیا مروڤی و دهێتە خوار و ڤەدگریت هەتا هەموو سەروچاڤان بگریت بتایبەت د دەمێ وەستیانێ دا. هەروەسا دەما نەخوش هەست ب نە ئارامی و ترسیانێ بكەت.
دیسا خوهدانا نیڤا دەستێ: ب شێوەكێ گشتی ئەو پتر یا بەربەلاڤە و كەلەگ ژ نەخوشێن ئەڤ جورە ل دەڤ هەست ب شەرمیەكا زێدە دكەن، ژ بەركو ل دەمێ سلاڤكرنێ هەست ب بێهنتەنگیێ دكەت و ئەڤە دبیتە ئەگەر كو ژ سلاڤكرنی دوور بكەڤت دگەل جڤاكی.
هەروەسا خوهدانا بن كەڤشان: د ئەڤی جورێ دا هندەك جاران وەك شلبوون دهێتە دیتن و هندەك جاران ل سەر جل و بەرگێن نەخوشێ وەك پنیەكا سپی یا خوێ و ئەڤە دبیتە بێهنتەنگیەكا زێدە بو نەخوشی.
گۆتژی د هندەك جاران خوهدان جهێن دێ یێن لەشی دگرێت و ب شیوەكی گشتی خوهدان ل دەمێ كەش و هەوا بەرەڤ گەرماتیێ ڤە دچیت زێدە دبیت. هەروەسا ئەگەر پلا گەرماتیێ گەلەك یا زێدە بیت یان فشارەكا دەروونی یان هەستەكێ خوشیێ چ ب رێكەكا راستەخو ل سەر نەخوشی، هەروەسا ل دەڤ هندەك نەخوشان ژ نشكەكیڤە پەیدادبیت بو دەمەكێ نە دیار.
ل دور چارەسەریێ ژی، د.پەیمان مستەفا دیاردكەت كو پێدڤیە ب رێیێن خوجهی یێن دژە خوهدانێ بهێنە چارەسەركرن، یانژی چارەسەری ب رێیا دەرزیێن خوجهی یێن ( بوتوكس) هەیە و دیسا هەكە گەلەك یا ئالوز بیت هندەك جاران پێدڤی ب نشتەرگەریان دبن.
