خوه‌زیێن بێ مراد
ڤیان محه‌مه‌د تاهر
خوه‌زی تو ببایه گوله‌كا بهاری
ل سێ وه‌رزێن سالێ بێ خه‌مل ببای
خوه‌زی تو ببایه داره‌كا ئاقاری
نیڤ سالێ بێ به‌ر ببای
بلا تو ببایه كانیه‌كا ئاڤی
ل ته‌ڤ هاڤین و پاییزا
هشك و زوها ببای
خوه‌زی تو ببایه په‌یكه‌ره‌ك
بێ ره‌ونه‌ق و روح ببای
بلا تو ببایه هه‌واره‌ك و
ڕوژێ سێ جار
ب ده‌رزا دلێ من كه‌تبای
بلا سینگێ من ببا مشار و زه‌ڤی
ته ئێش و ژان لێ راچاندبان
ب تاڤیێن رۆندكا شین ببان
بلا چیا ب سه‌ر جانێ من كه‌تبا
ئه‌ز مل و پێ شكه‌ستی كربام
وه‌ی سوتنا جه‌گه‌را من
خوه‌زی من هزرێن خوه
ژده‌ست دابان
بیرهاتنێن ته ژ بیردانكا من ده‌ركه‌تبان
ب تنێ هۆسا ب ئێك جاری
ب خافله‌تی و
ژ كێلیكه‌كا نه‌فره‌تی
هه‌ر تشت ل ده‌ردۆرا من
مینا بارۆڤێن ل به‌لگێن زه‌ر دده‌ت
ته ب چوونا خوه نه‌وه‌راندبان..
