خوه كوشتن دناڤا گه‌نجێن ئێزدیان دا به‌ر ب زێده‌بوونێ یه
ئه‌ڤرۆ، سالار محه‌مه‌د دۆسكی:
ئاواره‌كا شنگال ئاشكراكر كو ماوێ بوری دا پتر ژ 15 گه‌نجان ژ هه‌ر دو ره‌گه‌زان خوه كوشتینه و حالاتێن خوه كوشتنێ دناڤا گه‌نج و لاوێن ئێزدیان دا به‌ر ب زێده‌بوونێ نه.
سوهام سه‌عید، ئاواره‌كا خه‌لكێ شنگالێ یه، ئاكنجیا كومه‌لگه‌ها شاریایه، د دیداره‌كێ دا ل گه‌ل رۆژناما ئه‌ڤرۆ به‌حسێ زێده‌بوونا حاله‌تێن خوه كوشتنێ دكه‌ت دناڤا گه‌نجان دا و گۆت: هه‌شت سال ده‌ربازبوون هێشتا خه‌لكێ مه لبن كه‌مپان دا دژیت و ژیانه‌كا گه‌له‌ك نه‌خوش ده‌رباز دكه‌ن و زێده‌تر روودانێن خوه كوشتنێ دناڤ گه‌نجان دا په‌یدا بووینه چونكه رابوون و روینشتنا وان هه‌می دناڤ چادره‌كێ دایه و ئه‌وان گه‌نجان گه‌له‌ك هیڤی و ئومێد و هزر هه‌نه و ره‌نگه بگه‌هیته وی ئاستی ئێدی هزرا وی بهێته گرتن و نه‌شێت هزر بكه‌ت.
هه‌مان ئاوارا شنگال گۆت: ئێك ژ ئه‌گه‌رێن خوه كوشتنێ دناڤ گه‌نجان دا ئه‌وه رێكخراوێن جڤاكێ سڤیل گه‌له‌كا خوه ڤه‌كێشایه و گه‌لك گه‌نج بێ كار ماینه و گه‌له‌ك هیڤیێن گه‌نجان مرینه و گه‌له‌كا هزر كر هه‌كه رێكه‌فتنا هه‌ولێرێ و به‌غد بهێـه جێبه‌جێكرن ئه‌و دێ زڤرنه سه‌ر جه و ارێن خوه دێ بكار كه‌ڤن و ئێدی دێ هیڤی و ئومێدێن وی خه‌لكی به‌ر ب باش بوونێ ڤه چنێ.
هه‌مان ئاواره گۆت: نه‌بوونا جهێن بهێنڤه‌دانێ و ده‌م بوراندنێ ل كه‌مپان نه‌خوشیێن ده‌روونی بۆ گه‌نجان دروست كرینه و تایبه‌ت گه‌له‌ك گه‌نج هه‌نه ده‌رچوویێن كولیژانه و شاره‌زایێن باش هه‌نه و هه‌تا نوكه مفا ژ شاره‌زیا خوه نه وه‌رگرتیه و ژڤی ئه‌گه‌ر گه‌له‌ك گه‌نجێ، مه خوه دكوژن و گه‌له‌ك ژی ژبێ كاری گه‌هشتینه هێزێن نه شه‌رعی ل شنگال و خه‌لكێ مه هزر دكه‌ت رۆژ بۆ رۆژ شنگال به‌ر ب خرابوونێ ڤه بچیت و ئێدی به‌ره‌ف باشبوونێ ڤه ژیان نینه.
سوهام سه‌عید، زێده‌تر گۆت: تورێن جڤاكی ژی گه‌له‌ك ئاریشه بۆ گه‌نجان دروستكرینه و گرنگه رێكێن قانوونی هه‌بان چونكه ب هزران كێشه دناڤ گه‌نجان دا هاتینه دروستكرن و ب بۆچوونا من دا باشتر بیت ده‌لیڤێن كاری زێده‌تر بۆ گه‌نجان بهێنه خورتكرن و بهێنه مژوولكرن و مفا ژ شاره‌زای و شیان و باوه‌رناما خوه بینن وه‌ك داهاته‌ك بۆ بهێته‌كرن و دیسا كار بۆ وێ چه‌ندێ بهێته‌كرن كو خێزانێ پێك بینت و ده‌لیڤه بۆ بهێته‌دان پێشینه‌یێن هه‌ڤژینیێ و كاركرنێ وه‌رربگریت و ئه‌ڤه هه‌می دێ بنه هوكار حالاتێن خوه كوشتنێ به‌ر ب كێمبوونێ بچن.
هێشتا گۆت:ب سه‌دان گه‌نجێن ئێزدی قه‌ستا ده‌رڤه كرینه دڤی ماوێ بوری دا و گه‌له‌ك گڤاشتن ل سه‌ر خێزانا خوه كرینه بۆ كومكرنا پاره‌كی و چوونا ده‌رڤه‌ی وه‌لاتی و گه‌له‌كا پێ حه‌سم خێزانا وی پاره ده‌ین كرینه بۆ چه‌ندێ ئه‌و گه‌نج ب رێكێن نه قانوونی بچیته ده‌رڤه‌ی وه‌لاتی.
هێشتا گۆت: ل دوڤ ئامارێن نه‌فه‌رمی ل ئه‌ڤ ساله دا هه‌تا 15 گه‌نجان خوه كوشتینه و هه‌تا چار گه‌نجان خوه ل ئاڤا خانكێ خه‌ندقاندینه و دبینم ئه‌ڤ حاله‌ته به‌ر ب زێده‌بوونێ نه.
