خوه ژ كه‌سێن ره‌شبین دوور بكه
ئه‌ڤرۆ ، زنار تۆڤی:
هژماره‌كا گاڤێن ئه‌رێنی و ب مفا بكه پرۆگرامێ خوه یێ رۆژانه و گرنگیێ ب وان گاڤان بده، ب ڤی ره‌نگی دێ بییه مرۆڤه‌كێ نورمال و دێ هه‌رده‌م هه‌ست ب ئارامیێ و روژێن خوش و به‌خته‌وه‌ر كه‌ی د ژیانا خوه دا.
نه‌جمه‌دین زێباری، ڤه‌كۆله‌رێ ده‌روونی بۆ رۆژناما ئه‌ڤرۆ دیار كر كو دڤێت هه‌رده‌م مرۆڤ یێ مژوول بیت، ب كاره‌كی ڤه، چونكی هه‌كه مرۆڤ یێ بێكار بیت، دێ هزرا كه‌ت و دێ مه‌ژیێ مرۆڤی تێك چیت، له‌وما چو جاران نه‌مینه ب تنێ، داكو هزرێن خراب نه‌كه‌ی، هه‌روه‌سا هه‌ره ناڤ مرۆڤان و تێكه‌لیا وان بكه، گوهداریا وان بكه و ل گه‌ل باخڤه، داكو هزركرنا خراب د مه‌ژیێ ته دا كێم ببیت و گۆت: (ب شه‌ڤێ ژی هه‌كه خه‌وا ته زوو نه‌هێت، په‌رتووكه‌كێ بخوینه، یان وه‌رزشه‌كا سڤك بكه، داكو مه‌ژیێ ته ماندی بیت و خه‌واته بهێت).
زێباری دیار كر كو ئه‌و كه‌سێن دبنه ئه‌گه‌رێ هندێ كو هزرا ته تێك بده‌ن، یان كارتێكرنه‌كا نه‌رێنی ل سه‌ر ته دروست بكه‌ن، خوه ژێ دوور بكه، بۆ خوه دۆرهێله‌كێ ئارام چێكه، هه‌رده‌م گه‌شت و سه‌یرانان بكه، داكو هزر و ده‌روونێ ته ئارام ببیت، خواندنا قورئانا پیرۆز و په‌رتوكان و گوهداریا سه‌رهاتیێن راستیا ژیانێ دێ بنه ئه‌گه‌رێ ئارامكرانا ده‌روونێ مرۆڤی، ئه‌ڤ چه‌نده دێ وه‌كه‌ت كو مرۆڤ هزرێن زێده نه‌كه‌ت و گۆت: (هه‌روه‌سا خوه ژ خوارنێن ب پرۆتین و حه‌بێن ئارامبه‌خش دوور بكه، كه‌سكاتی بخوه، ئه‌ڤ چه‌نده دێ بیته ئه‌گه‌ره‌كێ باش بۆ ب هێز بوونا به‌رگیریا له‌شی و چالاك كرنا مه‌ژیێ مرۆڤی).
ڤه‌كۆله‌رێ ده‌روونی ئه‌و چه‌نده ژی دیار كر كو وه‌رزش كرن گه‌له‌ك یا گرنگه، دێ هزركرنا زێده ژ سه‌رێ مرۆڤی ده‌ركه‌ڤیت، هه‌كه رۆژانه مرۆڤ ده‌مژمێره‌كێ یان پتر وه‌رزشێ بكه‌ت، به‌رگیریا له‌شێ مرۆڤی بهێز دكه‌ت و ناهێلیت مرۆڤ هزرێن نه‌خوش بكه‌ت و گۆت: (ئه‌ڤ چه‌نده دێ بیته ئه‌گه‌رێ خوشیێ بۆ ته و دێ هه‌ست ب ئارامییێ كه‌ی، دێ هزرا نه‌رێنی لده‌ف ته كێمتر لێ هێت، گیانێ ته دێ هه‌رده‌م هه‌ست ب خوه‌شی و ئارامیێ كه‌ت).
د به‌رده‌وامیا ئاخفتنێن خوه‌دا نه‌جمه‌دین دیار كر هه‌رده‌م گه‌نگه‌شێ و ئاخفتنێ ل گه‌ل مرۆڤێن گه‌شبین بكه، خوه ژ توندوتیژیێ و قه‌ره‌بالغێ و شه‌ر و نه‌خوه‌شیان دوور بكه، هه‌روه‌سا هه‌ر جهێ ئاریشه و نه‌خوشی لێ هه‌بن، خوه ژێ دوور بكه، داكو هزرا ته یا نه‌رێنی زێده نه‌بیت و روژێت نه‌خوش ل گه‌ل وان روودانان نه‌زڤرنه بیرا ته.
ڤه‌كۆله‌رێ ده‌روونی گۆتژی: (گرنكیێ ب خوه و كه‌ساتیا خوه و خیزانا خوه بده، په‌یوه‌ندیێن خوه یێن جڤاكی ل گه‌ل ده‌وروبه‌رێن خوه ب هێز بكه، هه‌رده‌م جهێ گرنگیا كه‌سێن به‌رامبه‌ر به، ئه‌ڤه دێ وه‌ل ده‌روونێ ته كه‌ن، كو تو هه‌ست ب ئارامیێ بكه‌ی، ده‌روونێ ئارام ژی دێ بیته ئه‌گه‌رێ گه‌شه‌كرنا هزرا ته).
