خووشكێن مه یێن عه‌ره‌ب!
ئه‌ڤه ژ سه‌دان سالان پتره، به‌س ب گۆتن دبێژین، برایێن مه یێن عه‌ره‌ب، یان ژى ئه‌م كورد و عه‌ره‌ب براینه، لێ د كریار دا، ب هیچ ره‌نگه‌كى وه‌ها نه‌بوویه. تشتێ هه‌ى، ب تنێ ئه‌م بده‌ستێن وان برایان هاتینه ئه‌نفالكرن، ده‌ربه‌ده‌ركرن، فرۆتن، كوشتن و كیمیابارانكرن، هه‌رده‌م ئه‌و برایێن مه‌زن بوون و ئه‌م برایێن زڕباب و بچووك بووین، ئه‌و بریارده‌ر و ئه‌م بجهئینه‌ر بووین و ئه‌و هه‌موو تشته‌ك و ئه‌م چنه بووین.
ئه‌و ده‌شت و ئه‌م چیا، ئه‌و ره‌ش و ئه‌م سپى، ئه‌و تۆز و ئه‌م به‌فر، ئه‌و و ئه‌م، نه ب ده‌نگ و نه ب ره‌نگ، ب چ ئاوایه‌كى وه‌كو یه‌ك نینین، ئه‌ز بێژم ئێدى ده‌م هات ل رابردوویێ خوه بگه‌رین و بنێرین، چه‌وا ئه‌م بووینه برایێن ئێك، ئێ نێ دایك و بابێن مه نه ئێكن، ئه‌ز باوه‌ر ناكه‌م ژى بابێ وانا مر بیت و بابێ مه دایكا وانا ماره كربیت و هه‌روه‌سا به‌رۆڤاژى، ئێ ماده‌م هوسایه، ئه‌ڤه چ براینیا سه‌ر به‌فرێ یه.
هه‌ر چه‌وا بیت، یا ئه‌م دبینین، مالا مه یا ب ڤێ براینیێ ڤه خراب بووى و خرابتر دبیت، ئانكو چ باشى د ڤێ براینیێ دا نینه و كه‌س نه‌شێت خوه ب ساناهى ژ براینیێ قورتال بكه‌ت. ئه‌ڤجا چاره‌یا د ناڤبه‌را مه دا كو ئێدى ئه‌م ڤى ناسناڤێ براینیێ بگهۆرین و ل جهێ بێژین برایێن مه یێن عه‌ره‌ب، نوكه پاش بێژین خووشكێن مه یێن عه‌ره‌ب. ئه‌ڤه ژى ژبه‌ر هندێ كو دونیایه هه‌یهایه، ره‌نگه هنده‌ك ئاشقى ڤان خووشكێن مه ببن و ئه‌م ژى وان بده‌ینه شوو و ژ به‌لایا وان قورتال ببین و ب خێرا وانا ببینه خزمێن هنده‌كێن دی ژى. ب ڤى ره‌نگى ژى ب تنێ ره‌نگه سالێ جاره‌كێ خووشكێن مه سه‌ره‌دانا كه‌س و كارێن خوه بكه‌ن، ئه‌و ژى ئه‌م كورد به‌رى كچان بده‌ینه شوو، دبێژینێ، هشیاربن هه‌ر جار ب شرینى ڤه وه‌رن. دگه‌ل رێزێن من بۆ هه‌ر كچه‌كا كورد، كو مه‌به‌ستا من نه ئه‌وه ئه‌و دكێمن و ب كێماسى لێ دنێرین.
گۆت، عه‌یشو ئه‌ڤه ژى برایێ ته‌یه، عه‌یشو ژى گۆت، ئێ چه‌وا ئه‌ڤه برایێ منه و ژ كیڤه هات و هه‌تا نوكه ل كیڤه بوو؟ گۆت، هه‌ما بێژه برا و ده‌نگ نه‌كه. ئه‌ڤجا براینیا مه و عه‌ره‌بان ژى، ئه‌م نزانین چه‌وا بووینه برا.
باشترین رێك بۆ مه هه‌ردویان، ئه‌م ده‌ست ژ ڤێ براینیا هوسا به‌رده‌ین و ب ڤى ئاوایى كه‌س ژ مه نابیته خودانێ میراتێ بابێ نه‌دیار. ئه‌و سه‌رده‌مه ژى نه‌ما كو مه‌لایه‌كى بینینه د ناڤ دا و ل دووماهیێ ژى ببیته خودان پشك یان خودانێ میراتى و ئه‌م هه‌ردو برا ببینه خودانێ پالێ پیشى.
ئه‌ڤجا یان بلا ببینه جیران و وه‌ك برا پێكڤه بژین، یان ژى ئه‌م رازینه ئه‌و خووشكێن مه بن. و د ناڤ كوردان دا، ده‌مێ خووشك دچنه مالێن برا و سه‌ره‌دانا وان دكه‌ن، گه‌له‌ك رێزێ لێ دگرن و بوخچكێن وان ژى تژى دكه‌ن و ب رێزڤه دهنێرنه‌ڤه.
