خوینا بەفرێ…. ل هەسارا چاڤێن تە

مستەفا مەلا سەلیم ئاكرەیی

چیمەنەكا كەسك خەملاخو داڕێژا
ئەسمانێ مە هەمی دكەسك و سۆڕی وەربوو
برینا ڕۆژێ ژی زەربوو..
دعشقا تەدا باژێڕێ مە هەمی هنگافت و
ڕاهژیا.. دمژێ وەربوو..
چیایێن مە خوینا بەفرێ فڕكر
داروبارێن لسەر جادەیا تێهنییێن خوینا
بەفرێ بوون..
دەروێشێن مالا عەبدی بوون..
داربەڕوییا نەزانی ئەو دێ چكەن
خویناڤا بەفرێ فڕبكەن..
یانژی مەیا سالڤە چووی
پێدا بكەن و .. خوینا وەلاتی ژبیربكەن
هۆ خەلكینۆ..
عشق جیهانەكا مەزنە..
ئەڤ دەردۆرە.. ئەڤ گەردوونە تێرێ ناكەت
عشق بابەلیسكەكا سێربەندە..
ژنشكەكێڤە بەر ب مە دهێت و بەرزەدبیت
نە دهێلیت تەیر ب ڕەڤا خۆ بكەڤن
نە هەیڤ تاڤا خۆ بكەتە تەڤن
هەمی تشتەك یێ بلەز دبۆریت..
تاكو پەیڤێن مەژی یێن كەفتینە
لسەر جادەیا شوین پێن مەژی
هەلناگرن.. پێنڤیسێن مە ئەوژی
بوونە قەلە ڕەشك.. لسەر گیفانكا
بەرماكێن نوی.. نەدخون و
نەژی هەلبەست پێ دئافرن
بێهنا ئاخێ.. بێهنا بارانێ و بێهنا خوینێ
بێهنا ژەهرێ و.. بێهنا ژیانێ
هەلدكێشن.. هەلبەستا وسترانا
پێ پبێژن..
و جوانی و پەسنا وەلاتی ژی
لسەر دێم و سینگێ كچكا
دڤەهویننەڤە..!
ئاخینكا دبەرڕا ڕادهێلن
هەر كەسەك بۆ خو دوێریتە وەلاتی و
هەستێن خۆ تێڕا دبینیت
وەلات سومبولا شاعرانە.. ل تەنگاڤییا دبیتە
فڕەكا مەی و… پەیڤ و ڕستە ڤاری دبن
وەك هەلامەتێن ناڤ ماشان
دبنە هێما و بەهانە.. بۆ دەلیڤەیەكێ
كچك تێڕا دبنە نچێر و دێمجانە..
وەلاتێ مە فەرهەنگەكە هەمی پەیڤان
دادعویریتن..
شارستانی و دیرۆكەكە .. هەمی
چیرۆكا ڤەدجویتن..
دەریایەكە .. لێ ئەڤرۆ باش هەمی گەمییا
لسەر پشتا خۆ هەلناگریتن..!!

کۆمێنتا تە