خوینا کەزیان
دیار مووسا
“زارۆکەک بووم، ئەز ژی
وەکی هەر زارۆکی، فێقییێ ڕۆژەکێ
وەکی هەر کەسی ژ دارا دایکا خوە”
“ئارژەن ئاری”
ل سەر ڕکمایینا خوە یێ بەردوام بوو . چ کەتبا بەر لەپێن وی، دهاڤێتن. بەر، گومتل و چقلێن داران، یێ بەردەوام بوو. ناڤبەرەکێ پێژنا قێژییەکێ هات، پالەیان، مەڕێن خۆ هێلان و ژ کۆلانا بیستانکی ڤەقەتییان، بەرەڤ وێ قێژییێ چوون.
گەلەک زەربەهتی و ترسیابوو. پشتی بێهنەکێ دەنگەک گرس و بهێرس هات، بەرەڤ وی دچوو.
چ ڕێ نەبوون ژ بلی بازدانێ، بەرێ خوە دا ڕێییا کانیێ، لنگێن خۆ سڤک کرن. ڕەپێنا پێن بابێ وی بلەزتر دهات، دبت ژ وێ کەلێ بگەهتێ و دربەکی داوەشینتێ!
دگەل بازدانێ، باب ڤێڕا نەگەهشت و هێدی – هێدی لنگێن وی سست بوون.
– بابۆ، چ ل حەودکا بیستانی چێبوویە؟ بۆچی ڕادهێلییە من؟
بابی گۆت: تە سەرێ دایکا خۆ شکاندییە! هەی قەشمەر!
ئەو د جهدا ڤەجنقی و چۆکێن وی سست بوون، بتنێ حلکە حلک دکر و ئاخینکەک ژێ چوو دیسان گۆت:
– بابۆ، وە بۆچی ئەو مارە نیشانی من نەدا؟
بابێ وی گۆت: ما تو نزانی، ئەم ڕەشماران ناکوژین، ئەز بۆ تە تێشکا ڕەشماری ژ کیڤە بینم؟ پالەیان ئەو گرتبوو و بەردا دناڤ بیش و دەحلیڕا.
هێشتا خوین یا هشکە و کەسەرێن ئاخێ دلۆپن.
