خوینگەرمییا دەروێشێ عەڤدی
د. عارف حیتۆ
خودێ ئەڤ کەونە ژبۆ خۆشییا خوە یا دانای و ب مە ڕانای
دا نەخۆشییا بکەینە گوهارکێ خۆشیێ و گێمەکێ دی،
بکەینە کوارا هیڤیێ.
حیکایەتخوان… حیکایەتێ وەکو هەیی ڤەناگێڕیت،
لێ وەک وی دڤێت!
مەشکا سەربۆرێن ڤەشارتی ژبۆ نیڤشکێ حەزەکێ دکێت،
یا ڤڵڤلی!
جوامێری: شیانە، نە هزرە مرۆڤ خوە دناڤدا زیندانکەت
ژیان: لڤینە…
نە یاسایە هەر لا بۆ خوە ڕاستیێ پێڤە پاوانکەت
مە فێر دکەت، دنیایێن تازە بهەلێخین.
ل بەرسفکا ب ڕۆندکان هونی، گوهدەینە بایێ دنیایێ…
تۆپەک پەقی و مژ ب چیایدا دهێتە خوار
خویسار خوە د بەلگێن تەڕدا ڤەدشێریت
تیشکێن ڕۆژێ دناڤ تۆزێ ڕا بیانی
ئەو سوارێن ماینە ل قادێ هەپارەنە! خوداڤەند چێدکەن…
داکو دەمێن خوە یێن ڤاڵا پێ ببۆرینن و دبەر ڕا دغای بچن.
دەنگێ حجۆلێن کچکەکێ، گەهشتە دۆلێن مەرگەهێ(١)
چووچکان خوە دا بەر تاقچکێن پەرسگەهێ
لڤینەکا دودل خوە ب سەر لەشێ جهی دادا و
هەلچوونێن هێژ نەدەرکری، خشیانە بەر پێن قەدەرێ
قەدەر… گەڕیدەیەکا سەرهشکە
خەونێن ئیرۆسیی(٢) دکەتە ستوین
مۆمکێن هەلکری ل میحرابا مەرقەدی د چکلینیت و
ژێ دڕژیێت خوین!
مرۆڤ خوە ژ ئێکودو ددەنە پاش،
داکو بشێن پێکڤە بژین!
هەڤڕێبازی درەوەکە پالێنەران ئافراندی
داکو هەکو ل ئەنیا شەڕی،
ژێکڤاڤێرن هەستێن سادە و ڕەکباندی
عەشق… نە بڕیارە د تەرازوویا پلانێدا
نە ژی ڕێکە ڤەوەریایە د ئاستەنگێدا
باوەرییە… خودێ دئینیت و خودێ دبەت!
ڕۆناهییا وێ کز نابیت د شەبەنگێدا…!
عەشقە… ئەز ب دەهمەنا وێڤە دڕی و
ل سەر بالگەهێ بشکوڕینەکێ مری
ئاه… تو ژ بنێ کیژان بیرێ ب سەرکەتی
ژ چ وێلستانەکێ دەرکەتی و ب من کەتی
ترپێن دلی ب ڕکێبێڤە تلیفڕی(٣)
قەرەبین(٤) یا ب ملێ منڤە سترانا دبێت
دلێ من یێ ل سەر جەلەبکێ دزێت و ڤەدزێت
دەروێشێ عەڤدی عاشقە، نە مادحکارە
ب کەزی یێن گۆتنێڤە بارقە، نە فاتحکارە
– ئەی دەهۆلا شەڕی لێدە…
لێدە و بلا دەنگێ تە ڕەونەقا دەمی ببڕیت
بلا سها تە وەک پلنگەکێ برسی بنڕیت
تەڕادەکە(٥) یان دو…
تەڤی پڵنگێن کاغەزی دێ ڤەگەڕنە د کۆتانێڤە و
بەحسی سەربۆرێن دڕیایی ژبۆ دەشتێ کەن
دەشت خەمجڤینن ل سەر ژانان…
هندەک ڕەنگێن ئەرخەوانی ژێ دڕژیێن و
کراسەکێ دەهمەن درێژ، چاڤێ گالگالێ دنقینیت.
هەیڤ خەریبیێ د چاڤێن عەدۆلێدا دچینیت
هەکو خەریبی ڕویس دبیت، بشکۆژێن مەیدانێ دپەقن
داگەڕهان و هلگەرهانا قەبخواستنێ،
ب سمێن «هەدبان»ێڤە(٦) ڕەقن…
هەستا ئەڤینیێ دشارینیت، تۆلهەلدانێ دقورمچینیت
ئو هەلپەرست ل خاچڕێیان بویسەچینە
دەهمەن:
(١) مەرگەھ: دەڤەرا پەرسگەها لالش، جهەکێ پیرۆزە ل دەف ئۆلێ ئێزدییان.
(٢) ئیرۆس: جەڤەنگێ ژین و گۆنێ.
(٣) تلیفڕی: ئاماژەیە ژبۆ لەزوبەز و لەزگینیێ.
(٤) قەرەبین: چەکەکێ شەڕی و کوشتنێیە ل سەردەمێ دەروێشێ عەڤدی، مینا تڤەنگێیە ل ڤی سەردەمی.
(٥) تەڕاد: جولە
(٦) هەدبان: ناڤێ هەسپێ دەروێشێ عەڤدی بوو.
