خوە زی من ستران نە گۆتبان

ئه‌ڤرۆ نيوز:
ھونەرمەند سەمیر سەدیق، ئاشکراکر کو یێ پەشێمانە ژ گۆتنا سترانێ و ئەڤە گۆتنە دھێن پشتی خوە دھەلسەنگینت ل گەل ھەڤالێن ل گەل بووینە سترانبێژ و ب دیتنا وی پتر پشتەڤانی بۆ وان ھەیە بۆ وی نینە.
ھونەرمەند(سەمیر سەدیق) ژ زاروکینی حەزا ستران گۆتنێ ھەبوویە ل دەسپێکێ سترانێن ھونەرمەندان (تەحسین تاھا، ئەردەوان زاخۆیی، محەمەد تەیب) گۆتینە، پشتی سەرھلدانێ ل سالا 1991 بۆ جارا ئێکێ سێ ستران ب ناڤێ(لاندکا زێرین، تەڤێتن تەنەڤێتن، من غەریبیا بیریا تەدکر)تۆمارکرن، ل سالا 1993 ئێکەم بەرھەم تۆمارکر، خودانێ شەش بەرھەمێن ھونەری یە، کەسێ ئێکێ بوویە ب یانا دھۆک یا وەرزشی ستران گۆتین.
ھونەرمەند سەمیر سەدیق بۆ بەرپەرێ ھونەری یێ رۆژناما ئەڤرۆ گۆت: ھەلبەستڤان و ئاوازدانەرێن ل گەل دەسپێکا من یا ھونەری کارتێکرن ل سەر من ھەبوو کو ئەڤ ستایلە من گرتی و بکێر دەنگێ من دھات، ھەردەم من کارێ پێکڤە کریە و ھەموو کارێن خوە ئەز بۆچوونان وەردگرم، پتریا سترانێن من (واقعن)ەھێشتا گۆت: من کێم کلیپ ھەنە و ژ من دھێتە داخوازکرن بەرھەمیێن خوە یێن کەڤن نوو بکەم و ھەکە من شیان ھەبان دا ب شێوەکێ باشتر سترانێن خوە تۆمار بکەم
ھونەرمەند سەمیر زاخۆیی گۆت: ھندەک جارا یێ کەیف خوەشم بوویمە سترانبێژ و ھندەک جاران بەرۆڤاژی دبێژم خوە زی من ستران نە گۆتبان، چونکە من دڤێت ب خوە بگەریم کەس من نەنیاسیت و نەشێم بچمە ھەموو جھان، دیسان جاران ھەست ب پەشێمانیێ دکەم د ستران گۆتنێ دا، چونکە چ بوومن نەکر ل دووڤ خزمەتا من جوداھی گەلەک ھەبوو وەک پشتەڤانی بەرامبەر ھەڤالێن ل گەل من رابووین و بووینە سترانبێژ.
سەمیری ھێشتا گۆت: ھەتا 80% ژ کارێن من ئەنجام داین ھەموو ل سەر کیستێ من بووینە، بتنێ 20% رێڤەبەریا سەنتەرێن رەوشەنبیری ب رێیا رێڤەبەریا ھونەرێ مۆزیکێ بەری نوکە دبەرھەمێ 2009 دا پشتەڤان بووینە،دیسان کەنالێ ڤین تیڤی سوپاس بۆ وان.
ھونەرمەند سەمیر سەدیق بەحسێ کەنالان کر و رەفتار ل گەل دابەزینا سترانان گۆت: کەنال ھەنە گەلەک جوداھیێ دپەخشکرنا سترانان دا دکەن، کەسێ ل تەنسیقێ ب دلێ خوە یە د بەزاندنا سترانان دا.
ل دۆر سترانَن دو قولی ژی ناڤبری گۆت: سترانا (پسمام دوتماما تەمە) من تۆمارکریە من وێنەکریە و ئەڤ سترانە دو قولی یە من ل گەل سترانبێژا رۆژئاڤا کوردستانێ(ئاخینکێ) گۆتیە، دیسا پێشتر ژی من سترانێن دو قولی ھەبووینە

دتەوەرەکێ دی دا، ھونەرمەند سەمیر سەدیق بەحسێ زارۆکینی یا خوە دکەت و دیار دکەت کو گەلەک حەز ژ وەرزشێ دکر و یاریکەرێ تەپاپێ بوو ل دەسپێکا ژیانا وی، ژ پشتەڤانێن یانا دھۆکە و ئاستێ وێ بلندبیت یان نزم بیت و دیسا حەز ژێکەرێن یانا بەرشەلونا یا ئسپانی یە.
ھەمبەر ڤیانا وی بۆ پوستەکێ کارگێری کو گرێدایی ب ھونەری بیت، سەمیری گۆت: من حەز چ پوستان نەکریە، من چ پوست و رێڤەبەری کو نێزیکی ھونەری ژی بن من نەڤێن، لێ حەز دکەم ببمە رێڤەبەرێ فەرمانگەھەکێ نێزیکی ئارەزویا من بیت وەک فەرمانگەھا گەشت و گوزارێ.

کۆمێنتا تە