خۆدیکا ئەز تێدا بەرزە
شەمال ئاکرەیی
ژ ئەزلێ وەرە..
د هژیانێن پەردەیێن پەنجەرکان دا،
د دێمێ ئەڤرێ بلەز دا،
د کەنییا زارۆکەکێ دا ل دویڤ بەلاتینکەکێ دبەزی،
ل تە دگەڕیام.
من هزر دکر..
تە خۆ یا د ناڤ بەرپەڕێن پەرتووکێن کەڤن دا..
یا ڤەشارتی.
یان تە یا خۆ د بێهنا گولاڤان دا..
تێکهلکری.
یان تە یا خۆ د رندییا گولان دا..
بوهژاندی.
من هزر دکر ..
تو ئەو ئاوازەکی ژ عۆدەکا شکەستی ڤەڕستی.
من هزر دکر ..
تو ئەو گڕنژینەکی ل سەر لێڤێن کچەکا بیانی نیگاربووی.
من هزر دکر و هزر نەمان هندی هزر بکەم.
***
دەمێ سەرێن داڤان ..
ل من بەرزە بووین،
بەری پۆرێ من رەنگێ بەفرێ وەربگریت
بەری هیڤی ل نک من ب پەڕ بکەڤن
ل وێ رۆژا ژ بەرزەبوونێ نیزیک بوویم،
من کاروانێ لێگەڕیانێ
بێی بمینم ل بەندا ژڤانێ
ب یەقین هێلا.
من هەناسەیەک هەلکێشا و بێهنا تە کر،
من ب نامەیەکا ژ ناخێ من زایی
ئەوا من شاندی ل گەل پێلێن بایی
گاڤەک هاڤێت و
من زانی یا بەر ب تە ڤە دهێت
ژ هینگی وەرە ..
گازندان ژ دلێ خۆ دکەم،
ئەی دل: چما هندێ نەزانی!؟
گۆت: ژ مێژە ئاکنجییا منە.
هینگی، من ل خۆدیکێ نێڕی..
لێ وێ ل من حەیتاند و گۆت:
هۆ بەرزەبوو..
خۆ نە وەستینە
وازێ ژ لێگەڕیانێ بینە
ئەو گەلەک یا نیزیکە
ب هەناسەیا خۆ هەستێ بکە.
هینگی من زانی ..
ئەز یێ د چاڤێن هەڤجێمکەکا روحێ دا
ئەوا چارێکە سەدەیەکێ ژ بوونێ گیرووبوویی
ئەز یێ د دلەکێ دا..
ژ هەمی دلسۆزییان ب هەستتر
ل خۆ دگەڕێم!
وەی پا رێکا گەهشتنا تە یا درێژ بوو
ئەی ئەو خۆدیکا ئەز تێدا بەرزە.
