خۆڤەكێشانا مالكی و سوودانی مەرجێ چارچۆڤەیێ هەماهەنگیێ یە بۆ ئێكلاكرنا بەربژارێ سەرۆكوەزیران
هەڤپەیمانییا چارچۆڤەیێ هەماهەنگیێ بۆ ئێكلاكرنا بەربژارێ پۆستێ سەرۆكوەزیرێن نوو یێ ئیراقێ د كۆمبوونەك ئەنجامدایە و ل دووڤ پێزانینێن سەركردەیەكێ د ناڤ هەڤپەیمانیێ دا، خۆڤەكێشانا نووری مالكی و محەمەد شیاع سوودانی مەرجێ سەرەكی یە بۆ رێككەفتنێ ل سەر بەربژارەكێ نوو، كو تێدا (باسم بەدری) وەك ب هێزترین چانس دهێتە دیتن.
عەبدولرەحمان جەزائیری، سەركردە د چارچۆڤەیێ هەماهەنگیێ دا، د داخۆیانییەكا رۆژنامەڤانیدا گۆت»چارچۆڤەیێ هەماهەنگیێ ل رۆژا شەمبیێ كۆمبوونەك ئەنجامدایە بۆ گەنگەشەكرنێ ل سەر بەربژارێ پۆستێ سەرۆكوەزیرێن ئیراقێ، و بڕیارە ل نێزیك كۆمبوونەكا دی بهێتە ئەنجامدان دا كو دوماهیێ ب ڤی مژاری بینن».
وی سەركردەیێ هەڤپەیمانییا چارچۆڤەیێ هەماهەنگیێ ئاماژە ب وێ چەندێ ژی دا، كو مەرجێ ئێكلاكرنا دیاركرنا بەربژارێ پۆستێ سەرۆكوەزیرێن داهاتیێ ئیراقێ خۆڤەكێشانا هەر ئێك ژ نووری مالكی سەرۆكێ هەڤپەیمانییا دەولەتا یاسایێ و محەمەد شیاع سوودانی سەرۆكێ هەڤپەیمانییا ئاڤەدانكرنە ژ بەربژاركرنێ بۆ وی پۆستی.
جەزائیری دبێژیت ژی: هەر ئێك ژ حەیدەر عەبادی، حەمید شەتری و باسم بەدری بەربژارن بۆ وی پۆستی، لێ چانسێ باسم بەدری ژ هەموویان ب هێزترە.
هەڤدەم یاسر تەلال، ئەندامێ تیما ڕاگەهاندنا نڤیسینگەها نووری مالكی، ل سەر هەژمارا خۆ یا تۆرا جڤاكییا فەیسبووكی نڤیسیە: «ل سەر بەرپرسیارەتییا من، خەونا سوودانی بۆ خولا دویێ ب دوماهی هات و هەتا نوكە نووری مالكی بەربژارە بۆ پۆستێ سەرۆكێ جڤاتا وەزیران.»
تەلال دبێژیت ژی: دێ ئیراق خودان سەرۆكوەزیرەكی نوو بیت و هەڤپەیمانییا چارچۆڤەیێ هەماهەنگیێ رێككەفتییە ل سەر بەردەوامبوونێ ل سەر شایستەیێن دەستووری.
ل رۆژا شەمبییا بۆری جڤاتا نوونەرێن ئیراقێ سەرۆككۆمارێ نوو هەلبژارد، ل دووڤ رێكارێن دەستووری ژی 15 رۆژ ل پێشییا سەرۆككۆمارێ نوو نە دا كو كەسەكێ بۆ پێكئینانا كابینەیا نوو یا حوكمەتێ ئیراقێ رابسپێریت.
