خۆکوشتن ل ڕێزبەندیا سێیێ دهێت بۆ مرنێ
زاخۆ، دلۆڤان هالۆ:
دەروونناسەکی بۆ ڕۆژنامەیا ئەڤرۆ دیار کر کو لسەر ئاستێ جیهانێ خۆکۆشتن ل ڕێزبەندیا سێ یێ دهێت بۆ مرنێ ل دەڤ سنێلەیان و گۆت: ڕەڤین ژ ئاریشەیان ب ڕێیا خۆکۆشتنێ لاوازیە.
دەروونناس ئیبراهیم عەبدولستار دیار کر کو چەندین جۆرێن خۆکۆشتنێ هەنە وەکو خۆکۆشتنا نەساخی ئەڤ جورێ خۆکۆشتنێ پەیدا دبیت دەمێ مرۆڤ بتنێ حەز ژ خۆ بکەت و نەڤێت دناڤ ئاریشێ دا بیت، هەروەسان خۆکۆشتنا پیڤەری ل دەمێ کو ڕەوشت و تیتالێن جڤاکی بەر ب نەمانێ دچن و گوھۆرینێن بلەز و ژ نیشکەکێ ڤە پەیدا دبن و گۆت: هەروەسا خۆکۆشتنا پیرۆز دەمێ کو کەسەك خۆ دکەتە قوربان بـۆ مللەتێ خۆ یان ھــەڤالێن خۆ، و ئەڤ دیاردە ل ھەموو جیھانێ ھەیە.
ئیبراهیم دیار کر ژی، گەلەك ئەگەر هەنە هەتا کو مرۆڤـ بزاڤا کۆشتنا خۆ بکەت و ھندەك ئەگەر سەرەکینە وەکو نەخۆشیێن جڤاکی و ڕوودانێن دلتەزین، مشەختبوون و ستەمکاری و شــەرێ دناڤ خێزانێ دا و ئاریشێن ئەڤینداریێ و مرنا کەسەکێ خۆشتڤی و ژدەستدانا تشتەکێ گەلەك گرنگ وەکو کار و سەرمایە.
دەروونناسی د بەردەوامیا ئاخفتنێن خۆدا گۆت: هەروەسا ھەژاری و گرانیا بارێ ئابووری و نەبوونا وەکھەڤیا جڤاکی و دیتنا چەندین شاشیان کو مرۆڤـ نەشێت بگوھۆریت، ئەگەرێن ساخلەمی ژی دەمێ نەخوشیێن ترسناك و دووم درێژ و بێ چارەسەری لدەف مرۆڤی پەیدا دبن، یان هەکو مرۆڤ ئەندامەکێ لەشێ خۆ ژدەست ددەت وەکو چاڤ و دەست و پێ.
ئیبراهیم عەبدولستار ئەو چەندە ژی گۆت: لسەر ئاستێ جیهانێ خۆکۆشتن ل ڕێزبەندیا سێ یێ دهێت بۆ مرنێ ل دەڤ سنێلەیان، ژبەرکو زۆربەیا جاران خەموکییەکا زێده ل دف سنێلەیان پەیدا دبیت و مەترسییا خۆکوشتنێ پەیدا دکەت، لەوما خۆ کۆشتن پتر ل دەف سنێلەیان هەیە.
چارەسەری: خێزانی ڕولەکێ گرنگ هەیە ژبۆ ئاڤاکرنا تاکەکەسی، پێدڤیە تاک وەسا بهێتە پەروەردەکرن خودان کەسایەتیەکا خۆڕاگر و بهێز بیت ژ ئاریشان نەڕەڤیت بەلکو چارەسەر بکەت، ڕەڤین ب ڕێیا خۆکوشتنێ ژ ئاریشان لاوازیە، هەروەسا پێدڤیە دەزگەهێن ڕاگەهاندنێ پتر کار بکەن ژبو نەهێلانا ڤێ دیاردێ و بزاڤێ بکەن حالەتێن کۆشتنێ و خۆ کوشتنێ بەحس نەکەن و بەلاڤ نەکەۆ دێ باشتر بیت، ژبەرکو کاریگەریەکا خراب لسەر جڤاکی هەیە، زانایێن ئایینی پتر ڕۆلێ خۆ بگێرن، هەروەسا ناڤەندێن خواندنێ .
