خۆ كێم دیتن مەزنترین نەخۆشیە
دلژین عەبدولستار فەتاح
ئەم وەكو كورد ئەو نەتەوا مەزنین یا شانازیێ ب هەمی دیرۆك و كولتوور و داب و نەریت و هەڕ تشتێ خۆ دبەین، ئەقلێ كوردی ئەو ئەقلە یێ هەمی پەیامێن خۆدایی قەبویل كرین، و ل دویڤ پەیامێن خۆدێ، پابەندی ئاشتیێ و پێكڤەژیانێ بووین، ئێك ژ مەزنترین شانازیێن ڤی نەتەوەیی، مێرخاسیا زەلامێ كوردە و دلسۆزی و دلۆڤانیا ژنا كوردە، د هەمی قۆناغێن ژیانێ دا، ب تایبەت ڤان سەد سالێن دوماهیێ، ژن و زەلامێن كوردان خۆراگریا نەتەوا مە نیشا هەمی دونیایێ دا.
دەما زەلامی ب هەمی شیانێن خۆ و د هەمی بارودۆخەكی دا دەست ژ خەبات و شۆڕەشێن گەلێ مە بەرنەدایی و زولما زالمان قەبویل نەكری و ژنێ ژی ب تەنا سەرێ خۆ زارۆكێن خۆ ب خۆدان دكرن، و پەروەردە دكرن، یا ئەڤرۆ ئەز دبینم ب راستی كارەساتە، ژبەر كو دەما خەلكەكێ بیانی ب خرابی و ب چاڤێ سڤكاتیێ بەرێ خۆ ددەنە ژن و زەلامێن كورد، دێ بێژین دوژمنن و دڤێن ب ڤی شێوەیی ئیرادەیا خۆ بسەپینن، و قابلی بەرسڤدانێ یە، بەلێ دەما ل رۆژا ڕۆهن و ل سەر تیڤیێن كوردی و ب زمانێ كوردی و ژن و زەلامێن كورد ل بەرامبەر ئێك ڕابوەستن، و زەلام بێژیت؛ «ژنێن مە ب كێر چ نائێن»، و د بەرامبەر دا ژن بەرسڤێ بدەت و بێژیتێ؛ «ل دەف مە قەیرانا زەلامایە و زەلامێن مە یان یێ سەر ژنكە یان عێنیكە»، ب راستی نزانم چاوا بێژم، ئەڤە مەزنترین سڤكاتیكرنە ئەم ب خۆ دكەین، ئەرێ ئەڤ هەمی پێشمەرگەیە، ئەڤ هەمی كاسب و كرێكارە، ئەڤ هەمی پۆلیس و مامۆستا و..هتد، ئەگەر زەلام نەبن یان ئەگەر ژن نەبن، ئەم بەرەف كیڤە و كا ئەو پاشەرۆژا گەشا ئەم ل هیڤیێ كا ئەو دەولەتا ئەم بۆ دبینە پیرك و ل هیڤیا ژدایكبوونا وێ، ب راستی ئەڤ پەیامێن ب ڤی رەنگی نابیت بهێنە بەلاڤكرن و ئەگەر كێماسی هەبن دڤێت ب ڕێكێن ئەكادیمی كار بۆ بهێتەكرن، ژبەر كو یێن ڤان گۆتنان دكەنە كەلتور و دێ یا ب زەحمەتبیت ئەڤ دیتنە بهێنە ژناڤبرن و بەروڤاژی ڕێك وخۆش دبیت بۆ پتر خراببوونێ.
ب هیڤیا هندێ هەڕ ئێك ل جهێ خۆ، چ كەسایەتی یان تیڤی یان..هتد، هەست بەرپرسیاریەتێ بكەن د گۆتن و كریارێن خۆ دا و د بەلاڤكرنێ دا.
