خۆ ڤه‌ده‌ركرنا نڤیسه‌ری.. رێكا ژ دایكبوونا تێكسته‌كێ كاریگه‌ر
عەبدولخالق سولتان
به‌ری چه‌ند شه‌ڤان ئه‌ز نه‌شیام بنڤم، چه‌ندین هزرێن نڤیسینێ خۆ د مێشكێ من دا هلاڤێتن، هزرا كورته چیرۆكه‌كێ و پاش هزرا ڤه‌كۆلینه‌كێ، ب راستی من گه‌له‌ك هه‌ولدان ئه‌ز ئه‌وان هزران ژ سه‌ر هش و بیرێن خۆ ببه‌م، دا بشێم چه‌نده‌كێ بنڤم؛ ژبه‌ركو ل سپێدێ زوی من كارێ هه‌ی، دڤێت ئه‌ز یێ لسه‌ر خۆبم دا بشێم وه‌كێ پێدڤی كارێ خۆ ئه‌نجامده‌م، بێ سه‌رئێشیا كێم خه‌ویێ، به‌لێ خه‌و ب چاڤێن من نه‌كه‌ڤت، و ئه‌ز هه‌ر مامه هشیار، گۆتاره‌كا درێژ من د سه‌رێ خۆ دا نڤیسی! ئه‌ز نزانن كه‌نگی ئه‌ز نڤستم، لێ ده‌مێ سپێدێ ئه‌ز ژ خه‌و رابوویم، تنێ هنده‌ك وێنه‌یێن شه‌لا یێن وێ نڤیسنێ ما بوونه د هزرا من دا، من گه‌له هه‌ولدان بدارێژم، لێ نه هاته به‌رئێك، و هزر نه‌هاتن.
یا من دڤێت بێژم، نڤیسین كریاره‌كا ده‌روونیه به‌ری كو ببیته كریاره‌كا هزری وپاش دبیته دارشتن، ئانكو نڤیسین حاله‌ته‌كێ ده‌روونی یێ جێوازه، پێدڤی ب ره‌وشه‌كا تایبه‌ته تا دروست بهێته ئه‌نجامدان، و ب شێوه‌یەكێ ته‌مام و ساخله‌م ده‌ركه‌ڤیت، نه‌ك كاره‌كێ له‌نگ و ئه‌فلیچ بیت، له‌ورا پرانیا نڤیسه‌رێن جیهانی شاكارێن خۆ یێن ئه‌دبی د ره‌وشه‌كا تایبه‌ت دا نڤیسینه، زۆربه‌یا وان چووینه د بازنه‌یه‌كێ تنكاتێ و خۆڤه‌ده‌ركرنێ دا ده‌مێ نڤیسین دكر، مینا دیستۆیۆفسكی ده‌مێ هاتیه دویرئێخستن (نه‌فیكرن) بۆ سیبیریا شاكارا خۆ یا ب ناڤێ (تاوان و سزادان) نڤیسینه، هه‌ر وه‌سا تۆلستۆی پشتی خۆ ل گونده‌كی ڤه‌ده‌ركری رۆمانێن خۆ (شه‌ر و ئاشتی) و (ئاننا كارنینا) نڤیسین.
ئه‌ڤجا نڤیسه‌ر به‌رده‌وام په‌نایێ دبه‌ته خۆڤه‌ده‌ركرنێ، و خۆ ژ قه‌ره‌بالغا جڤاكی و مرۆڤان دویر دكه‌ت، دا بشێت پتر نێزیكی وێ جیهانێ بیت ئه‌وا دبێژنێ جیهانا نڤیسینێ! ژبه‌ركو نڤیسین ب ساناهی خۆ بده‌ست كه‌سێڤه به‌رناده‌ت، به‌لكو دڤێت د كاودانێ خۆ یێ دروست دا بهێته كرن.
پرانیا نڤیسه‌ران شه‌ڤ هه‌لبژاتیه بۆ ئه‌نجامدانا كریارا نڤیسینێ، هنده‌كان ژی خۆ د ژۆره‌كێڤه زیندانكریه! دا بتنێ دگه‌ل رویدان و هزر و بیرێن خۆ بمینیت، و ب دروستی هه‌می ده‌رزیێن هزرا بگریت، و پرۆسه‌یا نڤیسنێ وه‌كو پێدڤی ئه‌نجام بده‌ت. ماركیزی 18 هه‌یڤان خۆ د ژۆره‌كێڤه ڤه‌ده‌ركر، تنێ هزرێن خۆ د رویدان وكه‌سانێن ماكوندۆ دا كرن، تا شیای رۆمانا(100 سال ژ ڤه‌ده‌ربوونێ) بنڤیسیت!
بێده‌نگی و تاریا شه‌ڤێ ره‌وشه‌كا تایبه‌ت دده‌ته كه‌سانێن هزرمه‌ند و نڤیسه‌ر، له‌ورا پێدڤییه نڤیسه‌ر ده‌مێ ب كریارا نڤیسینێ رادبیت، نه‌خاسمه نڤیسینا داهێنه‌ر، جهـ و ده‌مه‌كێ ئارام و بێده‌نگ بۆ دارشتنا ئه‌وان هزرێن د سه‌رێ وی دا دهێن بهه‌لبژێریت.
دیسان فه‌ره ده‌مێ هزره‌كا نڤیسینێ خۆ لسه‌رێ نڤیسه‌ری دا، هه‌ر زوی ده‌ست ده‌ته لاپتۆپی یان قه‌له‌می و ئه‌وان هزر و بیرێن د مێشكێ وی دا بلقین وه‌كو خۆ ب دارێژیت، و خه‌مساریێ تێدا نه‌كه‌ت نه‌خاسمه ئه‌گه‌ر بشه‌ڤ بیت، و رۆژا پاشتر جاره‌كا لێڤه‌گه‌ڕیت و ئه‌و خه‌له‌تیێن چاپێ یان یێن رێنڤیسێ چاك بكه‌ت، هینگێ دێ شێت ئه‌و هزرێن وه‌كی خه‌ونان د مێشكێ وی دا دگه‌ڕیان كه‌ته كه‌توار و كاره‌كێ به‌رچاڤ، چه‌وا كافكای هزرێن خۆ یێن نامۆ ب رێكا نڤیسینا رۆمانا (وه‌رگوهۆ‌ڕك) كرینه كه‌توار.
