خیانه‌تا ئه‌مریكا و ((محه‌مه‌د ئه‌لمه‌مه‌هدیێ)) چاڤه‌ڕێكرى!
ره‌نگه پترییا خه‌لكێ مه ب دیتنه‌كا دینى و میتۆلۆجى ل ئه‌مریكا و وه‌لاتێن دى یێن زلهێزێن یێن جیهانێ ته‌ماشه دكه‌ن كو ده‌مێ دكه‌ڤنه د ته‌نگاڤییان دا كو ئه‌و وه‌ك ((محه‌ممه‌د ئه‌لمه‌هدیێ)) چاڤه‌ڕێكرى د هه‌وارێ بهێن! ره‌نگه ئه‌ڤ دیتنه وه‌هما ده‌روونێن بێ ده‌ستهه‌لاته كو هه‌ر ده‌م ب هیڤییا خه‌لكه‌كی دن ڤه‌نه كو بهێن وان ژ ته‌نگاڤییان رزگار بكه‌ن، مینا دایكوباب زارۆكێن خوه په‌روه‌رده دكه‌ن و ل ته‌نگاڤییان ده‌ربازدكن!
سیاسه‌تا ئه‌مریكا و رۆژئاڤا سیاسه‌ته‌كا براگماتییه و به‌رژه‌وه‌ندخوازه د خزمه‌تا نه‌ته‌وه‌یێن وان دا كو هه‌رده‌م درووشمێ وان دیار دكه‌ت كو وان چو هه‌ڤال و نه‌یارێن به‌رده‌وام نینن؛ لێ وان به‌رژه‌وه‌ندیێن به‌رده‌وام هه‌نه. ئه‌وێ هشیارییه‌ك سیاسى هه‌بت دڤێت ئه‌ڤێ هه‌رده‌م ل به‌ر چاڤوه‌ربگرت.
د درێژییا دیرۆكێ دا، كوردان ژى مینا پرانییا جڤاكێن جیهانى خوه دایه د گه‌ل بلۆكه‌كێ زلهێزێ سیاسه‌تا جیهانێ ب رێڤه‌دبه‌ت. واته هه‌كه د درێژییا سه‌د سالێن ده‌رباز بووى دا هنده‌ك كوردان خوه ب بلۆكێن ئیسلامى و ماركسى و پاشى ئمپریالیڤه گرێدابت، نها ژى ئه‌و بازار به‌رده‌وامه و كورد هه‌موو ده‌ما د ڤێ هه‌ڤكێشێ دا رۆلێ دووڤه‌لانكیێ وه‌ردگرن. كه‌واته ئه‌وا ئه‌مریكا بۆ هه‌ر گه‌له‌كێ جیهانێ دكه‌ت، ل پێشیێ به‌رژه‌وه‌ندیێن خوه ل به‌ر چاڤ وه‌ردگرت؛ ڤێجا هه‌كه به‌رژه‌وه‌ندیێن گه‌لێن دى ژى كه‌ڤتنه دگه‌ل یێن وان، هینگێ شه‌نسێ وان گه‌لێن بنده‌سته، فه‌ره مفاى بۆ خوه ژ ده‌رفه‌تێ ببینن و ب هشیارى ئه‌و گه‌ل ژى ئارمانجێن خوه ب ده‌ستڤه‌بینن.
د ڤێ شه‌ڕه‌نیخا به‌رده‌وام دا، هه‌تا نها كورد نه‌شیاینه كو بشێن وى شه‌نسى ب ده‌ستڤه بینن كو وه‌ك ئه‌مریكا و هه‌ڤپه‌یمانێن وێ ئارمانجێن خوه بپارێزن. راسته هه‌كه ئه‌م تنێ تێكه‌لیێن كوردان ل ڤان 26 سالێن دوماهیێ بكه‌ینه نموونه دگه‌ل ئه‌مریكا و رۆژئاڤا، دێ بینین وان د گه‌له‌ك ته‌نگاڤییان دا ئه‌م پارازتینه. ئه‌ڤه ژى دزڤڕته وان به‌رژه‌وه‌ندیێن مه كه‌تینه دگه‌ل به‌رژه‌وه‌ندییێن وان، ڤێجا چ دژى رژێما ((به‌عسا سه‌ددامى)) بن یان دژى ((داعشێ)) و گرۆپێن دن یێن تیرۆرى بن. هه‌لوه‌ستێ ئه‌مریكا و رۆژئاڤا یێ به‌رژه‌وه‌ندخواز ل ڤێ دوماهیێ باشتر رۆهن بوو، ده‌مێ هنده‌ك حزبێن كوردستانى ل هه‌رێمێ درووشمێ ده‌وله‌تبوونێ بلن دكرى كو ب رێكا ئه‌نجامدانا ریفراندۆمێ بهێت راگه‌هاندن، لێ ئه‌مریكا دگه‌ل هه‌ڤپه‌یمانێن خوه پشته‌ڤانى لێ نه‌كر و هه‌لوه‌ستێ وێ ژى مینا ده‌وله‌تێن دراوسى (ئیرانێ – تركیێ و ئه‌ره‌بان) لێهات كو نابت كورد د ڤى بارودوخى دا ببن ده‌وله‌ت ژ به‌ر كو دێ به‌رژه‌وه‌ندیێن وێ تێكده‌ن.
راسته د ڤى ده‌مى دا ده‌وله‌تبوونا كوردان دێ به‌رژه‌وه‌ندیێن زلهێزان دژى نه‌هێلانا داعشێ و گرۆپێن دى یێن توندره‌و تێكده‌ن؛ ژ به‌ر كو سیاسه‌تا پرانییا هه‌ڤپه‌یمانان ب درێژییا سالێن ده‌ربازبووى؛ هه‌ردم دگه‌ل ئیراقه‌كا دیمۆكراسى هه‌ڤكرتى فیدرالى بوویه كو گه‌لێن ئیراقێ پێكڤه تێدا بژین، ڤێجا هه‌كه گه‌نده‌لیێ و سیاسه‌تا شاشا حزبێن مه وه‌لێكربن كو خوه تێنه‌گه‌هینن ئه‌و تشته‌كێ دیه كو هه‌رده‌م كوردان باجا وێ دایه.
هه‌تا ساتێن به‌رییا ریفراندۆم ل 25-9-2017 بهێت ئه‌نجامدان، ئه‌مریكا، فره‌نسا و بریتانیا دگه‌ل نوونه‌رێ نه‌ته‌وه‌یێن هه‌ڤگرتى دگه‌ل ده‌سته‌یا بلندا ریفرانۆمێ بووینه و داخواز ژێ كرییه كو نها ریفراندۆمێ نه‌كه‌ن، د به‌رژه‌وه‌ندیا كه‌سێ دا دانینه و ئه‌و دترسن سه‌رباركێن كرنا وێ ژ ده‌ست وان ژى ده‌ركه‌ڤن؛ لێ ئالیێ ب هێزێ ده‌ستهه‌لاتا هه‌رێمێ داخوازییا دۆست و هه‌ڤپه‌یمان رتكر و رژد بوون كو ب هه‌ر بهایه‌كێ هه‌بت دڤێت ریفراندۆمێ بكه‌ن و ئه‌و به‌رپرسن ژ هه‌ر تشته‌كى ددوڤرا بهێت!
واته هه‌كه ئه‌مریكا ل سالا 1975 و ل سالا 1988 خیانه‌ت كربت و چاڤپۆشین ژ كیمیاباران و ئه‌نفال و تاوانێن دى یێن دژى ملله‌تێ كورد هاتینه كرن ژ به‌ر به‌رژه‌وه‌ندیێن خوه گرتبت، لێ ل سالا 2017 خیانه‌ت ب وى ره‌نگى ل كوردان نه‌كرییه، ژ به‌ر كو ب كێمى هه‌ر ل ده‌ستپێكێ هوشدارییه دایه كوردان نابت ئه‌ڤێ (مغامر)ێ بكه‌ن، ره‌نگه سۆز ژى دابتێ كو هه‌كه نه‌كه‌ن ئه‌و دێ پتر كێشه‌یا كوردى ل نه‌ته‌وه‌یێن هه‌ڤگرتى ئازرینن كو مافێن وان بهێن پارازتن د دووستۆرێ ئیراقا هه‌ڤگرتى دا.
واته كوردان چو تشتێ وسا لسه‌ر ئه‌مریكا نه‌ما كو ب خیانه‌تێ تاوانبار بكه‌ن. ئه‌ڤ گۆتارا نها یا كو ئه‌مریكا و رۆژئاڤا پێ دهێته تاوانباركرن گۆتارا كه‌سێ كه‌تى و لاوازه كو هه‌مى ده‌مان هیجه‌تان بۆ شكه‌ستنێن خوه دگرت و خه‌لكه‌كى دى سووچبار دكه‌ت. هه‌لبه‌ت د ڤێ ره‌وشێ دا تنێ دێ میننه ب هیڤییا دلپێڤه‌یا خه‌لكه‌كى كو د هه‌وارا مه بهێن، ئه‌ڤه ژى وه‌همه‌كه د كیستێ كه‌سێ شكه‌ستى دمینت و چاره‌یا وێ تنێ رابوونه و دان پێدان ب شاشیانه دا كو به‌رده‌وامیێ ب هاژۆتنا كاروانێ گه‌هشتان ئارمانجان بده‌ت.
