خیانەتێ ل گەل و ئاخا خۆ نەكەن، كـار بـۆ ئاڤەدانی و پێشڤەبرنا وەلاتـێ خۆ بكەن
سالار محەمەد دۆسكی:
1-3
عزەت حەسەن رەمەزان نێروەیی، د دیدارەكێ دا بۆ بەرپەرێ دیرۆك یێ رۆژنامەیا ئەڤرۆ گۆت: ئەز خەلكێ گوندێ نێروە ژ عەشیرەتا نێروەیامە، ب دروستی رۆژا ژ دایكبوونێ نزانین، لێ ڕەنگە بكەڤیتە دناڤبەرا سالێن ١٩٤٩ بۆ ١٩٥٠ێ دا ، ل دەستپێكا ژیێ خۆ ئاكنجیێ كەلا نێروە بووین و هەتا ئاوارەیا سالا ١٩٧٥ێ بەرە ب وەلاتێ ئیرانێ چووین.
گۆتژی:. ب گشتی باب و باپیرێن مە هەستا كوردینیەكا ب هێز لدەف هەبوو و دەرگەهێ هاتن و چوونا بارزان ژی بۆ یێ ڤەكری بوو و گەلەك هاتن و چوون دكر. هەردەم مالباتا مە جهێ باوەرا كوردپەروەران بوو و ژ بۆ هەرتشتەكێ ڤەشارتی كو ب بابەتێن كوردینیێ ڤە گرێ دایی بوو، ئێكەم كەسێن دەڤەرێ ئەو پێ دهاتنە ئاگەهدار كرن و بێ واناژی ل دەڤەرێ كەسێ چ كار نەدكرن، مە ل مالباتا خۆ ل سالا ١٩١٤ێ وەرە و هەتا نها كومەكا شەهیدان بۆ ڤێ خاكێ داینە.
هەمان پێشمەرگە گۆت: چونكو ژ مالباتەكا كوردپەروەر بووم، بەردەوام و هێشتا ئەم زارۆك كوردینی ل خۆینا مەدا هەبوو و مە بەردەوام حەز دكر دەست بدەینە چەكی و بەرەڤانیێ ژ مللەت و خاكا خۆ بكەین. وی سەردەمی هەمی دەما ئەم ئامادەبووین ژ بۆ وەلاتێ خۆ بمرین، و تەنها تشتێ مە هزر بۆ دكر، وەلات و خاك بوو و كەسێ چاڤ ل مالێ دونیایێ و چ پوستەكێ نەبوو.
عزت نێروەیی ئەو ژی گۆت: هێشتا ئەم زارۆك بووین كو دەیكا مە چوویە بەر دلوڤانیا خۆدێ و ماینە ب هیڤیا بابێ خۆڤە، بابێ مەژی هەستەكا كوردینیێ یا گەلەك دژوار ل دەڤ هەبوو، ئەوی پەزێ مە فروت و دا ب تڤەنگ و بەشداری ب شورەشێ كربوو، لەوما ئەگەرەكێ مەزن بوو كو ئەمژی ژ رێیا وی لا نەدەین. هەر چەندە كو هێشتا ئەم زارۆك بووین و بەردەوام ل گەل بابێ خۆ خۆدان چەك بووین، لێ بۆ جارا ئێكەم كو من ب فەرمی دەست دایە چەكێ پێشمەرگاتیێ، ل سالا ١٩٦٦ێ و ل دەڤەرا قەلادزێ لگەل خالێ خۆ (عەتەم سەعدولا ئاغا نێروەیی) بوو.
هەمان پێشمەرگەیێ هەر دو شۆرشێن ئیلۆن و گولانێ ئەو ژی گۆت: ل بیرا منە كو ئێكەم چەكێ من ب فەرمی هەلگرتی (ئنگلیزیەكا قوت) بوو، كو بابێ من ب پارێن فرۆتنا پەزی كریبوو و ل قەلادزێ پێشكێشی من كر، ل وی دەمی یا ژ من ڤە ئەڤ دونیایە هەموو پێشكێشی من كری، چونكۆ چەك هەلگرتنا هنگی مەردایەتی بوو و هەموو كەس نەشیان وی كاری بكەن و یا ژ هەمیێ گرنگتر، مە ئەو هزرە دكر كو ئێدی ئەم یێن هاتین بۆ كوردستانێ بمرین و ئەم دێ كوردستانێ رزگار كەین.
هەمان پێشمەرگەیێ هەر دو شۆرشێن ئیلۆن و گولانێ ئەو ژی گۆت: هەر ل سالا ١٩٦٦ێ بەشدار بووم د كومەكا شەرێن بەرگریكرنا كوردستانێ و وی دەمی ترس ل دەڤ مە نەبوو و مە نەدزانی دێ كەنگی بێژنە مە هەرنە شەری، ئەو رۆژە بۆ مە ئاهەنگ بوون. ل وی دەمی مە شەر بۆ ئازادیێ دكر، لەوما ترسا مرنێ ل نك مە نەبوو و باوەركەن ل چ شەراندا پاشڤە نەدزڤرین و نەدراوەستاین هەتا دگەهشتینە خالا بۆ مە دهاتە دیار كرن.
عزت نێروەیی گۆتژی: چەند جارەكان برینداریەكا سڤك هەبوو، لێ سۆپاس بۆ خۆدێ كو تووشی برینەكا گران نەبووین، و سەبارەت زیندانیكرنێ چونكۆ تێكەلیەكا نێزیكی حكومەتێ نەبووین، نەهاتبووینە زیندانیكرن، لێ برایێن من بریندارن ب برینێن دژوار و هەتا نها كومەكا ساچما ل لەشی واندا هەنە.
هەمان پێشمەرگەیێ شۆرشا ئیلۆن و گولانێ ئەو ژی گۆت: ب راستی ژی، ئەم سێ برا و دگەل بابێ خۆ هەموو پێشمەرگە بووین و چونكۆ مە دایك نەمابوو، هندەك جار ب سالان نەدزڤرینە گوند و دەڤەرێن خۆ. تەنها رێگرییا هەبوو ئەو بوو كو مە دڤیا زوو ب فەرمی ببینە پێشمەرگە، لێ چونكۆ ژیێ مە گەلەك یێ بچووك بوو، نەدهێلا ب فەرمی تێكەلی شەران ببین و هەرچەندە ژی كو مە ترسا زارۆكینیێ یان مەزنیێ نەبوو.
