خیتافى ناچیته ئیتالیا بۆ یاریا خوه به‌رامبه‌ر ئه‌نترمیلان
ئه‌ڤرۆ نیوز، زنار:
سه‌رۆكێ یانا خیتافى یا ئسپانى ئه‌نخێل تورێس دیاركر كو یاریزانێن یانا وى به‌ر ب وه‌لاتێ ئیتالیا ناچن بۆ ئه‌نجامدانا یاریا خوه هه‌مبه‌ر یانا ئه‌نترمیلان یا ئیتالى ژ قوناغا شازدێ یا قاره‌مانیا یوروپا لیگ ئەوا بریارە سوبەهى رۆژا پێنج شەمبى بهێتەکرن.
ئه‌ڤ بریارا یانا ئسپانى هات پشتى ڤایروسێ كورونا ب شێوه‌یه‌كێ به‌رفره ل وه‌لاتێ ئیتالیا تایبه‌ت ل باژێرێ میلانو به‌ربه‌لاڤ بوویه و حكومه‌تا ئیتالیا ژى سه‌رجه‌م چالاكیێن وه‌رزشى هه‌تا 25-3-2020 راگرتینه.
سه‌رۆكێ یانا خیتافى د داخویانیێن خوه دا داخواز ژ هه‌ردو ئێكه‌تیێن ئسپانى و ئیتالى كریه چاره‌یه‌كێ بۆ ڤێ چه‌ندێ بینن دگه‌ل ئێكه‌تیا ته‌پا پێ یا ئوروپى بگه‌هنه رێكه‌فتنه‌كێ بۆ پاشخستنا ڤێ یاریێ بۆ ده‌مه‌كێ دى یێ گونجاى داكو سه‌لامه‌تیا وه‌رزشڤان و پشته‌ڤانان یا پارستى بیت.
