خیڤەتا بچووك و خیڤەتا مەزن
غیاس خالد زێباری
پشتی خیڤەتا كوردستانێ ئەوا داخوازی و پێدڤیێن خەلكێ كوردستانێ دپارێزیت، ب سەرۆكایەتیا مەسرۆر بارزانی سەرۆكێ حوكمەتا هەرێما كوردستانێ بهێزتر و بەرفرەهتر بووی و ژبووی چارەسەركرنا قەیران و ناكۆكیێن دناڤبەرا هەرێمێ و ئیراقێ گەهشتینە ئەنجامێن باش و رێكەفتن ل سەر پرسا مووچێ ئەڤ ساڵە هاتیە، خیڤەتەكا بچووك و گەنی، یا پڕی بێهنا ژەهرا خۆكوشتنێ بناڤێ مامۆستا و مووچەخۆرێن نەڕازی هەڵدایە و بناڤێ مانگرتنێ درۆشمان دژی حوكمەتا هەرێما كوردستانێ بلند دكەن، بڤێ چەندێ ژی ڕازی نەبوون پشتی سێزدە رۆژان وی گرۆپێ بناڤێ مانگرتیا و بن سێبەرا رێنمایی یێن هندەك لایەن و كەسێێن خەونا ب تێكدانا ئارامی و سەقامگیریا كوردستانێ دبینن هەولا بەرەڤ هەلێرا پایتەخت و ئارام هاتن. مانگرتن و خوەنیشاندانێن ئاشتیانە بۆ گەهاندنا داخازی و گازندەیان ب دەستهەلاتێ، گاڤەكا پیرۆز و نوورماڵە، لێ ئەڤا ل سلێمانیێ دهێتەكرن، نە ب نوونەرایەتیا خەلكێ سلێمانیێ یە نە ژی نوونەرێن مووچەخۆرێن كوردستانێ نە، چونكی ل دەمەكی دایە دانۆستاندنێن پێكئینانا كابینا دەهێ یا حوكمەتا هەرێما كوردستانێ زۆر قۆناغ بڕینە، ب پێكئینانا ڤێ كابینا كوردستانێ نەیار زۆر دلگران دبین و خەونێن وان یێن دژی هەرێمێ دێ هێنە بنئاخكرن، لەوما هەمی رێكا بۆ دژایەتیا كوردستانێ ب كار دئینن، ئێك ژ وانە ئەڤە، پێدڤی یە حوكمەتا هەرێمێ و دەستهەلاتدارێن وێ چاڤەرێ پیلانێن دیتر ژی بكەن .
هەرێما كوردستانێ پێدڤی ب بهێزتركرن و مەزنتركرنا چادرا كوردایەتیێ یە كۆ هەمی پارت و ئالیێن كوردستانی لبن خیڤەتەكا نشتیمانیدا بهێنە كۆمكرن و لبن وێ خیڤەتێ سەرۆكایەتی و كابینەیكا نوو یا حوكمەتا هەرێمێ یێن بهێز و ئێكگرتی بهێنە پێكئینان كو بشێت ڤی قەواری بپارێزیت و پێشڤە ببەت و خوە ل گەل گۆهرینێن چاڤەرێكریێن دەڤەرێ و ئیراقێ بگۆنجینیت و پێدڤیێن خەلكێ كوردستانێ ژی دابین بكەن و ئارامیی سەقامیگریا باشا ئەڤرۆ باشتر بكەن نەك هاوردەكرنا هندەك كەسێن شۆفینی یێن نە كورد ئەوێن ب بەردەوامی ل بەغدا دژایەتیا ماف و بەرژەوەندێن كوردستانێ و خەلكێ دكەن ژ وانا بڕنا مووچە و شایستێن دارایی، هندەك ژ وان كەسێن ئەڤرۆ سەرەدانا چادرا سیاسی و پیلانگیریا سلێمانیێ دكەن و ئەوێن لپشت وێ چادرێ،ئەگەرێن سەرهەلدانا ڤێ رەوشا ئابووریا كوردستانێ نە و ئەڤرۆ ژی دڤێت بناڤێ مووچەخۆران ئارامیی و سەقامگیریا كوردستانێ بشێلن و ئاستەنگا درێكا گاڤێن پێكئینانا كابینا دەهێ یا حوكمەتا هەرێكێ درۆست بكەن و وێ ژێك تێگەهشتن و رێكەفتنێن ل گەل بەغدا ب هەڵوەشینن، ب تایبەت یێن ئابووری و دارایی . ئەگەر وەسا نەبیت چ مافێ خەلكەكێ دەرڤەی هەرێما كوردستانێ و رێكخستنێن دەرڤەی كوردستانێ هەیە بناڤێ خەلكێ كوردستانێ و مووچەخۆرێن وێ مانگرتنا بگرن و خوە نیشاندانا بكەت، یان ئەگەر راست بێژن كو داكۆكیكارێن مافێن خەلكێ كوردستانێ، بلا كەرەمكەن بچنە سەنتەر و ژێدەرێ برسیكرنا خەلكێ كوردستانێ و درۆستكرنا قەیرانا ئابووری ل بەغدایا پایتەخت كو جڤاتا نوونەرێن ئیراقێ و سەرۆكاتیا حوكومەتا ئیراقێ و وەزرەتا دارایی . یان ژی وان پارت و گرۆپێن دەستهەلاتا ئیراقێ پاوان كری و ل دووف بەرژەوەندێن وە بریارا ددەن و قانوونا دەردكەن، ئەگەر دژی دەستووری ژی بن.
