خێری بۆزانی و پرسیارێن هه‌بوونێ د كن چیڕۆكێن وی دا
ئازاد دارتاش
نها د قادا ئه‌ده‌بێ كوردی دا، ته‌ڤگه‌ره‌ك خورتا چیرۆكنڤیسینێ هه‌یه، چه‌ندین چیرۆكنڤیسان شیاینه كارێن جوان تێز بكه‌ن، هه‌ر وه‌ها تا ـ ژانرێ كن چیرۆكێ ژی هه‌یه و كۆمه‌كا ناڤ د وارێ هه‌نێ دا كار دكه‌ن و ئێك ژ وانا خێری بۆزانی یه، بۆزانی ئێكه ژ چیرۆكنڤیسێن كورده، ئه‌وێن ده‌رگه‌هێ تا ـ ژانرێ هه‌نێ لێدای، نها دو كۆمێن كن چیرۆكێن وی ل به‌ر ده‌ستێ مه نه، یا ئێكێ ل ژێر تایتلێ (تیره‌ك و دوو نیشان) ل سالا 2019 هاتیه وه‌شاندن و پتر ژ سه‌د و بیست كن چیرۆكان هه‌مبێز دكه‌ت و ژ دو پشكان پێكدهێت، پشكا ئێكێ ب پیپێن ئارامی هاتینه نڤیسین، یا دویێ ژی ب پیتێن لاتینی، كۆما دویێ ژی (چرایێن ژین و ڤینێ) ل سالا 2020، دیسان ب هه‌ر دو پیتا مایكرۆچیرۆكێن خوه گه‌هاندینه چاپێ.
(تیره‌ك و دوو نیشان)، ناڤ و نیشانێن كۆما ئێكێ پتر سه‌رنجا خوانده‌ڤانی رادكێشن، هه‌لبه‌ت ده‌ما خێری كۆما هه‌نێ ب تایتلێ هه‌نێ بناڤكری، كاره‌كێ هێسان نه‌بوویه، چونكو تایتلێ هه‌ر كتێبه‌كێ ئێكه ژ ده‌رازینكێن مه‌زن، تایتلێ هه‌نێ ل گه‌ل (ناڤێ نڤیسكاری و به‌ركێ ئێكێ و به‌رگێ دوماهیێ و دیاریكرنێ) هه‌ر پێنج دهێنه هه‌ژمارتن وه‌كو ده‌رازینكێن مه‌زن.
تایتلێ هه‌ر كتێبه‌كێ نه‌مازه كتێبێن ئه‌ده‌بی، چه‌ند ئه‌ركان هه‌لدگرن، ل دۆر ئه‌رك و سه‌خمه‌راتێن ناڤونیشانی تیۆرڤانێ ئه‌ده‌بی و ره‌خنه‌گرێ فره‌نسی گیرارد گێنیت دبێژیت: (ئه‌ركێن تایتلی چار فاكته‌رن و ئه‌و ئه‌ركێ ده‌ستنیشانكری یه و د وێرێ را نڤیسه‌ر ناڤه‌كی دده‌ته پرتووكێ، و ژ پرتووكێن دی جودا دكه‌ت، و ئه‌ركه‌كێ ساخله‌تی په‌یوه‌ندی ب ناڤه‌رۆكێ یان ره‌گه‌زێ پرتووكێ یان ژی ب هه‌ردو یێ هه‌ی، ئان ب گرێدانه‌كا مژاویی یا گرێدایی ناڤه‌رۆكی ڤه‌یه، و ئه‌ركه‌كه ب رێك و شێوازێ كو پێ د ڤێ پرتووكێ دا ده‌ستنیشان دكه‌ت، ئه‌ركه‌كێ دلكه‌تنێیه دخوازیت خوانده‌ڤانی بۆ لایێ پرتووكێ رابكێشیت و بخوینیت) .
ب ئاوایه‌كێ گشتی نها ره‌خنه‌گڕ و ڤه‌كۆله‌رێن، زۆر ب گرنگی ته‌ماشه‌ی ده‌رازینكێن هه‌نێ دكه‌ت، نه‌مازه ناڤ و نیشان، پێدڤی یه یێ جودا و تیر بیت، كو دبیته یاوه‌رێ ئێكی و خوانده‌ڤانی ل گه‌ل خوه دبه‌ت و دبیت هه‌تا دووماهیا گه‌شتا وی د كتێبێ دا، هه‌ر ل گه‌ل وی بمینیت.
له‌وما ده‌ما مرۆڤ ل هه‌ر جهه‌كی كتێبه‌كێ ببینیت، بێ گۆمان دێ ل به‌راهیێ ته‌ماشه‌ی تایتل و ناڤێ نڤیسه‌ری و به‌رگێ ئێكێ كه‌ت و دێ ل وێ گاڤێ سه‌ره‌تایێن ره‌ئیه‌كێ د هشێ مرۆڤی دا جهگیر بیت، پاشان دێ ته‌ماشه‌ی به‌رگێ دویێ كه‌ت و پشتی وێ چه‌ندێ دبیت خوانده‌ڤان ته‌ماشه بكه‌ت، كا بۆ كێ به‌رهه‌م هاتیه دیاریكرن.
هه‌ر چه‌نده ل په‌ی نێرینا مه (دیاریكرن) ئه‌و گرنكی یا خوه نینه وه‌كو ئه‌وێن دی.
تایتلێ كۆما كه‌كێ خێری بۆزانی (تیره‌ك و دوو نیشان)، ئه‌درێسه‌كێ سه‌رنجڕاكێشه و یێ تیر و كورت و پۆخته، ده‌ربڕینێ ژ دنیایه‌كا قه‌یرانكی دكه‌ت، چونكو تیر ئالاڤه‌كێ هه‌ره كه‌ڤنێ شه‌ر و جه‌نگایه، ب تیرێ بێ هه‌ژمار مرۆڤ/ گیانه‌وه‌ر بووینه قوربانی، قوربانیێن هه‌ڤڕكیێن هێز و لایه‌نێن هه‌ڤدژ و دیسان ژبۆی دابینكرنا پاریێ ژیانێ مرۆڤێ ده‌ستپێكی د بزاڤێن به‌رده‌وام دابوویه و ب ملیونه‌ها گیانه‌ورێن بێ گونه‌ه كرینه قوربان.
دیسان تایتلێ هه‌نێ (تیره‌ك و دوو نیشان) پرسیاران دروست دكه‌ت، بۆ تیر؟ ئه‌و چه‌كێ ده‌ستپێكی، ئه‌رێ چیرۆكنڤیسی مه‌به‌ستا وی ئه‌وه كو سه‌ره‌ڕای گشت پێشكه‌فتنێن ته‌كنه‌لۆژی د وارێن جودا دا و نه‌مازه د بیاڤێن چه‌كی دا، دیسان سه‌ره‌ڕای ده‌ستكه‌فتێن زانستی و ئه‌پستی، لێ ل سه‌ر ئاستێ عه‌قلی، ئه‌م هه‌ر یێن ب عه‌قله‌كێ سه‌ره‌تایی سه‌ره‌ده‌ریێ ل گه‌ل هه‌ڤدوو دكه‌ین و ب كارێ رێڤه‌بڕنا هه‌ڤركی و كاروبارێن خوه رادبین، دبیت ئاماژه بیت بوو عه‌قلێ زال.
هه‌ر وه‌ها بۆ (دوو نیشان)؟، دبیت ئاماژه بیت بوو دودلی و نه‌سه‌قامگیری و هێرسبوون و ته‌نگژینێن مرۆڤێ ئه‌ڤی سه‌رده‌می، كو مرۆڤه‌كه و د قه‌یرانه‌كا كوورا ده‌روونی دا دژیت، وه‌ها هزر دكه‌ت كو ئه‌و ئێكه و دوژمنێن وی هزار!!!.
دبیت ئاماژه‌یێن دی ژی هه‌لگریت و ئه‌م نیزیك نه‌بین ژ مه‌ره‌ما خێری یێ چیرۆكنڤیس، ئه‌ڤه ژی ئێكه ژ كاكلكێن كارێ تایتلی، تایتل پێدڤی یه ئاماژه‌یان بهاڤێژیت، دانه‌رێ شاره‌زا ب هێسانی تایتلێ كتێبا خوه ناهه‌لبژێریت، به‌لكو بزاڤێ دكه‌ت كو ته‌ڤایا ناڤه‌ڕۆكا به‌رهه‌مێ خوه د نێڤ تایتلی دا تیر و خه‌ست بكه‌ت، ئه‌ڤه ژی كاره‌كێ سه‌خته، هه‌تا ل سه‌ر ناڤ و نیشانه‌كی قایل بیت دبیت پرسیاران بكه‌ت و راوێژا هه‌ڤكارێن خوه بكه‌ت و نه‌مازه هنده‌ك جاران دبیت هه‌مان تایتل یان نێزیك ژ وی بۆ كتێبه‌كا دی هات بیته دانان، له‌وما ئه‌و دخوازیت كو تایتلێ كتێبا وی یێ نوو و سه‌رنجراكێش و كێم وێنه بیت.
دیسان به‌ركێ كتێبێ وه‌كو ده‌رازینكه‌كا دی یا مه‌زن، دهێت و دبیته ته‌ڤاڤكارا تایتلی، دیزاینه‌رێ پرۆفیشنال ژی ب زه‌حمه‌ت ل سه‌ر نه‌خشه‌یێ به‌رگی قایل دبیت، ئه‌و وه‌كو خوانده‌ڤان و وه‌رگرێ ئێكێ یێ به‌رهه‌می، گشت تێكستێن وێ كتێبێ دخوینیت (یان پێدڤی یه ب خوینیت) و ل سه‌ر هێما و جه‌ڤه‌نگ و ناڤه‌رۆكێ وێ رادوه‌ستیت و خویندنێن خوه ژێرا دكه‌ت و پاشان هه‌ول دده‌ت كو په‌یڤ و رسته‌یێن وی بكه‌ته تابلۆ و هه‌ر دو به‌رگان پێ بنه‌خشینیت.
خێری بۆزانی، گشت مایكرۆچیرۆكێن خوه بێ تایتل ئیناینه خوارێ، ب تنێ ته‌كه‌ز ل سه‌ر تایتلێ كتێبێ كریه، هه‌ر چه‌نده ب ئاوایه‌كێ گشتی تایتلێ هه‌ر تێكسته‌كێ وه‌كو كلیل و ده‌روازه‌یه‌كێ ناڤنجی دهێته هه‌ژمارتن و د كن چیرۆكان دا، تایتلێ ناڤنچی ژی دبیته پشكه‌كا گرنگ د گیانێ تێكستێ دا، لێ نوزانم بۆ چیرۆكنڤیسی تایتل بۆ هه‌ر كن چیرۆكه‌كێ نه‌دانینه، دبیت مه‌ره‌ما وی ئه‌و بیت كو ته‌ڤ كن چیرۆكێن هه‌نێ ب هه‌ڤڕا گرێدایی نه و هه‌مان تایتلێ كۆمێ دێ كارین ل سه‌ر هه‌ر ئێك ژ كن چیرۆكه‌كێن هه‌نێ دابنێن.
تێبینی:
ئه‌ڤه پشكه‌كا كورته ژ ڤه‌كۆلینه‌كا درێژ ل دۆر كن چیرۆكێن خێری بۆزانی.
