خێڤزانكا دبێژیت چ نینه!
عارف حیتۆ
هه‌كو ده‌ستێ من یێ له‌رزۆك ته‌سلیم بوویی و
كه‌فتییه ناڤ هه‌ر ده‌ه تبلێن خێڤزانكا پیر
چاڤێن من شكه‌ستی..
مه‌ژێ من سه‌وداسه‌ر، مشتی مه‌ستی
پێنگاڤێن من.. ب ده‌ڤێ پیرێ ڤه به‌ستی
كێربڕا خوه د نه‌رمه گوشتێ من دا چه‌قاند،
گه‌هاند هه‌ستی… و گڕنژینه‌كا ژ قه‌ستی
ب پفه‌كێ.. هه‌می له‌شێ من قه‌ڕستی.
…………….
ئه‌وێ خێڤزانكا سحربه‌ند، ب نه‌قل دگۆت:
ڕێكا ته ب سترییان هونییه و
ستێرا ته، رژیاییه یان دێ رژیێت
بومه‌كێ كال.. دادایه به‌ر په‌نجه‌ره‌یا ته و
تو یێ ل هیڤیا گولله‌یه‌كێ، د سینگی ناچیت!
قه‌ده‌ره كو تو ل سه‌ر ته‌ختێ خوه یێ
قافكه‌ك گولان ل به‌ر، بهێی ره‌ڤاندن
یان د خه‌ونه‌ك نه زه‌لال دا بهێیه كوشتن!
قه‌ده‌ره كو سه‌ردانه‌رێن ته مری بن
خوه ئه‌نیا ته ڤه‌گریت و وه‌ك ئاڤه‌كا
ژ سه‌ر تراری دا چوویی، بهێیه ڕشتن.
……….
شه‌ڤ ب كراسێ خوه یێ ره‌ش ڤه دادبه‌زیت و
دێ خوه هاڤێت هه‌مبێزا ته
ئه‌و مه‌قه‌سكا ژه‌نگێ گرتی،
ب خوینا هشك و ڕۆندكان،
دایكا ته دێ دانیته سه‌ر ڕێكا من و
ئه‌و ڕه‌به‌نا پیر دێ ب دلسۆژی گازی كه‌ت:
ئه‌ی خودایێ عه‌رد و ئاسمانان ببینه
دله‌ك عاشق ب عه‌رشێ ته‌ڤه كه‌ره‌نتینه
خه‌لكێ ده‌ردۆر دبێن یێ دینه
تو ب مه‌زنی و هێزا خوه كه‌ی بڤه‌ژینه و
ته‌نگێن وی بۆ من بشدینه.
……….
هاهاهاهاهاها….
خودێ ل بورجێ خوه یێ دخه‌وه و های ژێ نینه
ئه‌وێ ڕێكا وی ب ستریێن تیژ یا هونی
ستێرا وی یا رژیایی بیت ل سه‌ر عه‌ردی پنی پنی
بومه‌كێ كال ل سه‌ر بخوینیت بێ كه‌نی
و گولله‌یه‌ك چڕیك ڤێ بیت ل به‌رانبه‌ری بومی به‌نی
ئه‌و شایه‌سته‌ی ژینێ نینه و دێ بۆ شه‌ڤێ كه‌مه پینه
هه‌می دێ بێژن چ نینه، چ نینه كو دبێن چ نینه
مرنا كه‌سه‌ك مری و دامای
ل سه‌ر تۆمارێن فه‌رمی یێن داد و بێ دادێ، گرنگ نینه
چونكو یێ دبێژن چ نینه، له‌و چ نینه…!
……..
و هه‌كو خێڤزانكێ خوه دناڤ گۆڕه‌ك ڤالادا ڤه‌شارتی!
چووچكێن سه‌رگه‌ردان.. نهیا بوونه سه‌ر چقێن داران
ژبۆ گۆڕێن پڕ و دێرین دبسترین.
بازرگانێ قۆسكان تازه ژ چین و ماچینان زڤڕی بوو
هه‌موو ئه‌وێن ژ گۆڕێن خوه هاتین دزین و ل فه‌زای
بووینه چووچك، ل ناڤ فه‌زای غه‌واره بوون
و ئه‌ڤ چیرۆكێن چ نینه! دوباره بوون
نێ چ نینه.. چونكو یێ دبێژن چ نینه!…
***
