خەسوو بۆ ئەگەر بھێتە بەردان
ئه‌ڤرۆ نيوز:
پارێزەرەکێ دادگەھا سێمێلێ راگەھاند کو کچەکا د ژیێ 18 سالیێ دا شوو ب کورەکێ ژیێ وی 26 سالی کر، پشتی دەواتێ کچک ب تنێ سێ رۆژان ما لنک کورکی و ئاریشە دناڤبەرا وان دا دروست بوون و گۆت: پاشی ھەردو لا پێکھاتن و کچک زڤری مال ڤە، بەلێ ل سەر شیڤێ جارەکا دی خەسوویێ قەسێن نەشرین گۆتنە بووکا خوە، دەیکا کچێ ژی سکالا ل سەر خەسوویا کچا خوە کر.
پارێزەر جومعە سلێڤانەیی ل دادگەھا سێمێلێ بۆ رۆژناما ئەڤرۆ دیار کر کو کچەکا د ژیێ 18 سالیێ دا شوو ب کورەکێ ژیێ وی 26 سالی کر و گۆت: پشتی دەواتێ کچک ب تنێ سێ رۆژان ما لنک کورکی و ئاریشە دناڤبەرا وان دا دروست بوون، کورکی دگۆت کچکێ نەدھێلا ئەز بچمە نڤینا وێ و کچێ ژی دگۆت نەخێر ئەوی خوە نێزیکی من نەدکر، کورکی دگۆت نزا ئەوێ ئەز نەدڤیام! ب تنێ ل شەڤا ئێکێ کچێ ھێلا ئەز نێزیکی وێ ببم، پشتی وان سێ رۆژان مە برە مالا بابێ وێ و بابێ وێ گۆتە وان کورێ مە ل گەل کچا ھەوە نا قەتینیت.
پارێزەری گۆتژی: ھندی دایک و بابێن کچێ گۆتە وان کچکا بچووکە دڤێت ھوون ب حەمول بن ل گەل، مە کچا خوە دا ھەوە دا ھوون بۆ خوە ب خودان بکەن، کچک ماوەکی ما ل مالا بابێ خوە و دایکا وێ تێلەفونا دایکا کورکی کر و گۆتێ وەرن بووکا خوە ببەن. پارێزەری د بەردەوامیا ئاخفتنا خوە دا گۆت: دایک و بابێن کچێ کچک بر و چوونە شیڤێ ل مالا خەزوورێ وێ ل سەر شیڤێ خەسوویا کچکێ قەسێن نە شرین گۆتنە بووکا خوە، ئەو ژی زۆر عاجز بوون و کچا خوە دیسان برە مال و ل رۆژا دووڤ دا سکالا ل دایکا کورکی کر ل دادگەھێ.
پارێزەری ئاشکرا کر کو پشتی دادگەھا دایکا کورکی ھاتیە کرن کو دبیتە خەسوویا کچکێ دادوەری ب کوژمێ ملیونەکێ غورامە کر و گۆت: کچکێ گۆتی ھەکە کورک من جودا کەت بلا دێ زڤرم مە چ ئاریشە ل گەل نینە، بەلێ کورکی گۆت نەخێر دێ بەردەم.
پارێزەری زێدەتر گۆت: کورکی داخاز ژ دادگەھێ کر ھەڤژینا خوە بەردەت، ل رۆژا پاشتر ب رێیا عەشائیری ھەردو لایا رێککەفتنێن خوە ژ دەرڤەی دادگەھێ کرن و کچک بەردا ب ئامادەبوونا دو دیدەڤانان.
ھەروەسا پارێزەری گۆت: کچێ ژی داخازا مافێن خوە ھەموویان کر، چونکی یا ھاتیە بەردان و زەرەر یا لێ بوویی، دادگەھێ ژی ھەموو مافێن وێ بۆ کورکی دانە دیارکرن و کچک گەھشتە ھەموو مافێن خوە.
