خەلاتێ باشترین كورتە فلم ل ئیتالیا وەرگرت
زنار تۆڤی:
كورتە فلمێ (ئافورۆز) یێ دەرهێنەرێ كورد (د.یلماز ئۆزدلی) دفلمە فیستەڤالا هەڤدێ یا نێڤدەولەتی دا، خەلاتێ باشترین كورتە فلمێ مافێن مرۆڤی وەرگرت.
دەرهێنەرێ كورتە فلمی بۆ رۆژناما ئەڤرۆ دیاركر كو هەتا نوكە كورتە فلمێ وی پشكداری د پێنجی فیستەڤالێن جیهانی دا كریە، ژوانا ل وەلاتێ (سوید، ئیسپانیا جەزائیر، یونان) هەروەسا ل دهۆكێ ژی هاتیە نیشادان و هەتا نوكە هەشت خەلات وەرگرتینە، ئەڤ كورتە فلمە ل هێزا بدلیسێ ل باكورێ كوردستانێ هاتیە وێنەكرن، بەحسێ چیرۆكا رێڤنگیا زیكۆ و لالۆی دكەت، كو زیكۆی ئێشا دەروونی هەیە، پشتی تاوانەكێ دكەت خەلكێ گوندی وی ژ گوندی دەردئێخن، ئەو ژی دخوازیت بچیتە باژێری و ب رێڤە لالۆی دبینیت و بڤی رەنگی چیرۆكا وان دەست پێ دكەت و ئەكتەرێ خودان شیان (سامان مستەفا) كو ژ هەرێما كوردستانێ یە رۆلێ سەرەكی تێدا گێڕایە.
بۆ زانین بەری نوكە كورتە فلمێ وی یێ ب ناڤێ (بارێ گران) پشكداری د چەندین ڤیستەڤالان دا كریە و چەند خەلات وەرگرتینە.
