خەلكێ ئامێدیێ ژ دەرامەتێن گوندێن خوە بێ بەهر بووینە
ئامێدیێ، مەحمود نهێلی
ژ ئەگەرێ شەرێ د ناڤبەرا گەریلایێن پەكەكێ و لەشكرێ توركیا و توپ بارانكرنا رۆژانە و لەشكر كێشیا سەر دەڤەرێ و دانانا خالێن نوو ل سەرێ هند چیایان و نێزیكبوونا شەری ژ گوند و كۆمەلگەهان، هژمارەكا زۆرا وەلاتیێن قەزا ئامێدیێ بێ بەهربووینە ژ دەرامەتێن گوندێن خوە و ڤێ یەكێ كارتێكرن ل سەر رەوشا وان یا ئابوری كریە.
وەلاتی ژی دیار دكەن، ئەڤ سالە خالێن سەربازی یێن لەشكەرێ توركیا گەلەك نێزیك جهێ ئاكنجی بوونێ بوونە و بەردەوام رەز و باغ و بیستاێن وان دهێنە بوردومانكرن و ئێدی ئەو نەشێن ب چ رێكا قەستا ناڤ دەرامەتێن خوە بكەن.
وەلاتیەكی ئاكنجیێ سەنتەرێ ناحیا دێرەلۆك بۆ رۆژناما ئەڤرۆ دیاركر، شەرێ ڤێ داویێ و توپ بارانكرنا گوندێن وان یا رۆژانە گەلەك كارتێكرن ل خەلكێ دەڤەرێ كریە و گۆت: د سالێن بووری دا سالێ جارەكی یان دو جاران رێك ب مە دهاتە دان سەرەدانا گوندێن خوە بكەین بۆ مەرەما ئینانا دەرامەتێ چاندنێ و ئەڤ یەكە ژی تا رادەیەكی باش بوویە و ئەم شیان مفا ژ دەرامەتێ گوندێن خوە وەربگرین، لێ ئەڤ سالە ب ئێكجاری سەرەدانا گوندان نەمایە و ئەم نەشێن هیچ دەرامەتەكی ل گوندی بینین.
هاولاتیەكی دی یێ خەلكێ ناوچەداریا شێلادزێ بو رۆژناما ئەڤرۆ دیاركر، ئەڤە چەندین سالە ئەو ل كومەلگەهێن زۆرە ملێ یێن شێلادزێ و سیریێ و دێرەلۆكێ و هند كومەلگەهێن دیتر هاتینە دورپێچ كرن و نەشێن ل جادەیێ دەركەڤن و گەلەك كارتێكرن ل ژیانا وان یا رۆژانە بوویە.
ناڤهاتی هیڤی ژی خوەستن ئەڤ شەرێ دناڤبەرا پەكەكێ و توركیا دا ل دەڤەرا وانا نەمیت و شەری ببنە ناڤ ئاخا توركیا چونكە ئەڤ شەرە نەیێ وانایە، داكو ئەو ب ئازادانە بچنە سەر گوندێن خوە و دەست ب چاندنێ و ئینانا دەرامەتی بكەن.
