خەلكێ بادینان دلسۆزێن شۆڕەشا ئیلۆنـێ بـوون
بامەرنێ، سالار محەمەد دۆسكی:
1 – 4
پێشمەرگەكێ شۆڕەشا ئیلونا مەزن دیار دكەت كو ل سەر دەمێ شورەشێ چ جوداهی دناڤبەرا پێشمەرگەی دا وەك ئاین و نەتەوا دا نەدهاتەكرن و هەر هەمیان خەبات بۆ ئازادی و تەناهی یا كوردستانێ دكر، هەمان پێشمەرگە خواست ژی زێدەتر رێز ل ماندیبوونا پێشمەرگێن خەباتكرین و خێزان و كەس و كارێن شەهیدان بهێتەگرتن و ئەف ئازادی و تەناهی یا ئەڤرۆ ب بەرهەمێ ئەوان دازانین.
پێشمەرگەیێ شۆڕەشا ئیلونێ فلیپ ئاوراها ئەرەدنی، بۆ رۆژنامەیا ئەڤرۆ دیاركر، كو ل چەرخێ هەژدێ خەلك ژ باكورێ كوردستانێ هاتیە و ل دەڤەرێ ئاكنجی بوویە، هەمان دەم ل دوڤ ژێدەرێن مێژوویی هەبوونا دێران ل ئەرەدانا كو مە دو دێر هەنە مێژوویا وانا دزڤڕیت بۆ 1700 سالان، باپیرێ من ل دەڤەرا بازێ ل ناڤەراستا سالێن هەشتسەدێ ژ كوردستانا باكور هاتیە گوندێ ئەرەدنا ولێ ئاكنجیوویە، ل سالا 1947 ل گوندێ ئەرەدنا ژ دایك بوویمە و بەری شۆڕەشا ئیلونێ گوندێ ئەرەدنا نێزیكی 300 خێزانان تێدا دژیان و هەمی كریستیان بووینە، ل دوڤ گۆتنا باب و بابیرێن من موسلمان ژ هەر دو هۆزێن بەرواری و مزیری هاتینە گوندێ سەری ولێ ئاكنجیبووینە، ل سالێت 1940 قوتابخانە ل گوندێ مە هەبوو و رێڤەبەرێ قوتابخانێ هەر ئەرەدنی بوو، و چەند مامۆستان خەلكێ ئەلقوشێ بووینە، و دیسا بامەرنێ و دەمێ چوویمە قوتابخانێ ژیێ من شەش سال بوون و كچ و كور بوون و موسلمان ل هەمی دەڤەرێ دهاتنە گوندێ ئەرەدنا، و پشتی من قوناغا سەرەتایی ب دووماهی ئینای، شۆڕەشا ئیلونێ دەستپێكر ل سالا 1961 و مالا مە هاتە ڤەگوهاستن بۆ باژێرێ بەغدا، چوونا مە بۆ بەغدا ژ ئەگەرێ هێرشكرنا فرۆكان بوویە بۆ سەر گوندێ مە و پێنچ بومبە ل گوندی دان و ئێك ل دێرێ دا و لایەكێ دێرێ هەڕفاند، و بۆ مێژوو دێ بێژم هەر هەمان سال ئاغایەكێ دەڤەرا بەهدینان ناڤێ وی نابێژم هاتە گوندێ مە و هەر كەسەكێ دیتبا دكوشت و هەشت زەلام پیرەمێر كوشتن و بێ گونەهـ و هەر ئەو مرۆڤ چنە بوون، ئێكەم كەسێ ل گوندێ ئەرەدنا گەهشتیە شۆڕەشا ئیلۆنێ ل سالا 1961 ێ (ئیشو) بوو و گەهشتە بارزانی و سێ جاران بریندار بوو، ل سالا 1962 هەتا 1966 ، (35) كەس ژ خەلكێ گوندێ ئەرەدانا كو كریستیان بوون گەهشتنە رێزێن شۆڕەشا ئیلونێ، و پێنچ پێشمەرگەیێن ئەرەدنی ل گەل هورمز مەلك چكوی ل ئالۆكا شەهید بوون، ئەو ژی ( هورمز، بنیامێ، فلیپ، شلیمون، گورگیس) ئەڤە هەر پێنچ ل گەل هورمز مەلك چكو شەهید بوون، شەهید بوونا وان پێنچ كەسان بۆ شاشیا سەركردە هورمز مەلك چكوی ڤەدگەریت، راستە مرۆڤەكێ زیرەك و شارەزا و چاڤنەترس بوو، دەمێ چووینە ئالۆكان پتر ژ هەشت پێشمەرگەیێن ئەرەدنی ل گەل دا بووینە ، ل سالا 1963 هەیڤا 12 ئەڤ روودانە دروست بوویە وی دەمی مەعسكەرێ لەشكرێ ئیراقێ ل دهۆك بوو، شەش زیلێن لەشكریێن ئیراقێ بەرەف مویسل دچوون و (هورمز مەلك چكو) كەمینە ل بەردانا و هەر هەمی هاتنە كوشتن و چەندەك ژی وەك دیل كەفتنە دەستێن پێشمەرگەی دا و ئەو دیلێن كەفتینە دەستی دا ل گەل دو پێشمەرگان بەرەف چیایی چوون، و بتنێ ترۆمبێلێن لەشكری مان و جارەكا دی هورمز مەلك چكو گۆت: دێ زڤرم ئەوان ترۆمبێلان سوژین و ل زڤرینێ لەشكرێ سوریا هاتێ وی دەمی رێككەفتنەك د ناڤبەرا ئیراق و سوریێ دا هەبوویە، و لەشكرێ سوریایێ هاڤێتێ و هەر هەمی كوشتن، و دیسا مە پێشمەرگە هەبووینە دناڤا بەرواری یا ل گوندێ مێسكان.
پێشمەرگەیێ شۆڕەشا ئیلۆنا مەزن زێدەتر گۆت: عەمانوێل ئەرەدنی ل بەغدا بوو و پەیوەندی یا وی ل گەل پارتی دیموكراتی كوردستان بوو، سالا 1958 ڤەدگەریت و هاتنا بارزانی ژ ئێكەتیا سۆڤیێت ل سالا 1963 ژیێ من 15 سال بوو و عەمانوێل ئەرەدنی ل بەغدا گۆتە من دڤێت تو بهێیە دناڤا رێكخستنێن پارتی دیموكراتی كوردستان دا، و من گۆتێ بلا و ئەز و كورخالێ خوە (ئسمایل) و خالێ وی (گورگیس دۆسكی) ل گەل هەشت كەسێن خەلكێ (تنێ) و بتنێ ئەز خەلكێ ئەرەدنا بوویمە، و هەر هەمی چارشەمبا كومبوونا حزبی ل مالا كورخالێ من بوویە، كارێ من و كور خالێ من ئەو بوویە بەلاڤووكێن پارتی دیموكراتی كوردستان ب شەڤ ل دیواران بدەین و ئێك دبوو زێرەڤان و ئێكی ل دیواری دان، پشتی ژیێ من بوویە 18 سال هاتمە دامەزراندن ل وەزارەتا كارۆبارێن باكور پشكا كاغەزان و هەمان وەزارەت (عەمانوێل) ل سەر پەیوەندیان بوو ل هەمان ئاڤاهیێ ئەز تێدا و رۆژانە مە ئێك و دو دیت و رۆژەكێ چوومە وەزارەتا پلانان دانانێ ب مەرەما هندەك كاغەزان وەك پوستە ڤەگوهێزم و پشتی ڤەگەریایم و دەركەفتیم لێ زڤریم دەستێ چەپێ وی دەمی جهێ من ل قاتێ سیێ بوو و (عمانوێل) ل قاتێ ئێكێ بوو و ژ نشكەكێ ڤە من دیت چەند كەسەك ل گەل (عەمانوێل)ن ومن گۆتێ سپێدە باش مام (عەمانوێل) ل گەل گۆتنا من ئێكی دەستێ من گرت و گۆت تو چەوا ڤی نیاسی؟، من هەست پێكر كو ئەو هاتیە دەستەسەركرن و ئێكسەر من گۆتێ ئەڤە هەڤالێ منێ كاری یە ل فەرمانگەهێ و رۆژانە مە كار ل گەل ئێك دو هەیە و گۆت پا توزانی مالا وی كیڤە یە؟ من گۆتێ نەخێر چونكە بتنێ هەڤالێ منێ فەرمانگەهێ یە و من پەیوەندی ل دەرڤە ل گەل نینە، ئێكسەر هاڤێتم و گۆت هەرە و ئەو ب ترۆمبێلێ چوو و ئەو ل گەل خوە بر و دەمێ چووین و ئێكسەر ئەژی چوومە مالا (عەمانوێل) من گۆتە هەڤژینا وی كا چ هەیە كاغەزێن نێهنی یان وێنە بسوژە چونكە هاتیە دەستەسەركرن و رەنگە هێزێن ئەمنێ بهێن مالا هەوە پشكنین بكەن و هەر ئێكسەر هەمی سوتن و دووف دا چوومە دەف كورخالێ خوە و من بابەت بۆ شرۆڤەكر و من گۆتێ دڤێت خوە قورتال بكەین چونكە چارشەمبێ كومبوون هاتبوو ئەنجامدان و ژڤان بوو پێنچ شەمبێ هەمی ئابوونە ب رێكا وی بۆ بارەگایێ حزبێ بهێنە بلندكرن.
