خەلكێ بادینان دلسۆزێن شۆڕەشا ئیلۆنـێ بـوون
بامەرنێ، سالار محەمەد دۆسكی:
3 – 4
چووینە ئاكرێ هایداری شەری بووین د ناڤبەرا زێباریا و هەر دو هوزێن (سورچی و هەركی) یان، پشتی ماوەكی ئاریشەك بۆ (عەلی شنگالی) ل شنگال دروست بوو وی دەمی(شنگال) سەر ب پارێزگەها مویسل ڤە بوو و حوكمەتا ئیراقێ تێدا خودان دەستهەلات بوو و بەرپرسێ حزبا بەعس و قائیمقام هەر دو بەعسی بوون و هەر دو ب شەڤەكێ هاتنە كوشتن و حوكمەتا ئیراقێ (عەلی شنگالی) گونەهباركر و ب شەڤ ئەم هاتینە (سەرسنكێ) هاتینە خانیێ ئەندازیاری تەنشت ئوتێلا بەری و فەرمان ژ دادگەها حوكمەتێ دەركەفت بۆ (عەلی شنگالی) سێدارەدان هەتا مرنێ، پشتی بورینا چەند هەیڤان نێزیكی بیست ترۆمبێلان ژ حوكمەتێ هاتنە دەڤ (ئەسعەد خوشەڤی) وی دەمی بارەگایێ وی ل فرۆكخانا بامەرنێ بوو، و داخواز رادەستكرنا (عەلی شنگالی) كر و (ئەسعەد) گۆتە ئەوی شاندێ حوكمەتێ هەرن و خوە بێ دەنگ بكەن و (عەلی شنگالی) بزانیت هوون ژ بەر ئەڤی بابەتی هاتینە دێ ئێكسەر هێتە بەراهی یا هەوە و ناهێلیت ئێك ژ هەوە قورتال بیتو ئەو ژی چوون و ئەم ماینە ل سەرسنكێ هەتا دوماهی یا سالا 1974ێ و ئاریشە د ناڤبەرا مە و حوكمەتێ دا دروست بوون و سالا 1975 نسكو دروست بوو وی دەمی پسمامەكێ مە ل (بەسرا) بوو و ئەز چوومە (بەسرا) هەتا سالا 1977 و دوڤدا بەرەف ئەمریكا چووم.
پێشمەرگەیێ شۆڕەشا ئیلۆنا مەزن، فلیپ ئەرەدنی زێدەتر گۆت: دەمێ چوویمە ئەمریكا وی دەمی بارەگایین پارتی ل واشنتن بوو، و (محەمەد سەعید دۆسكی) بەرپرسێ لقێ پارتی ل ئەمریكا بوو و مرۆڤەكێ گەلەك یێ زیرەك بوو و ب رێكا وی من پەیوەندی كر وی دەمی ئەز ل (مجدان) بووم، دوڤدا پتریا بەرپرسێن پارتی ل هەمان باژێر بوون، و مە مام (عەمانوێل) ئەوێ بەرپرسێ من ل بەغدا ئەو ژی هاتە وی باژێری و مە رێكخراوەكا حزبی دروستكر و هەر ئەو بوو بەرپرسێ مە ناڤێ رێكخراوا مە (مەتین) بوو و سالا 2004 هاتمە كوردستان و نڤیسارەك من ژ لقێ ئەمریكا ئینا و ئەو نڤیسار من گەهاندە لقێ 18 یا پارتی دیموكراتی كوردستان ل ئامێدیێ وی دەمی (محەمەد محسن) بەرپرسێ لقێ 18 بوو، گەلەك خوشحال بوو و گۆت پێدڤی یە بچیە لژنا (سەرسنك) وەك ئەندام لژنە و چوومە ل گەل (عیسی نسری) و گەلەك خوش مرۆڤە و نێزیكی دوسالان مامە ل گەل دا و من ژ لقێ 18 خواست بهێناخوە ڤەدەم چوونە ژیێ من دەربازبوویە و بەرپررسێ لقێ 18 (محەمەد محسن) گۆت دەوامێ نەكە و بتنێ رۆژا دەوامێ و غەفارەتێ هەرە بارەگایێ لژنێ وی دەمی بارەگایێ لژنێ ل بامەرنێ نەبوو، ورۆژەكێ ئەم ل كومبوونێ دابووین و گۆتن فەرمانا ڤەكرنا لژنا بامەرنێ هاتیە و كی دێ چیت و ئێك سەر من گۆت ئەزدێ چم (د. نوزاد) وی دەمی هاتبوو راسپاردن وەك بەرپرسێ لژنا بامەرنێ و بوومە دانیاسین وەك خەلكێ بارمەنێ و بەرپرسێ لژنا بامەرنێ و چار سالان مامە لژنا بامەرنێ ل گەل (د.نوزاد) و ل گەل چەند هەڤالان و گەلەك خوش مرۆڤ و یێ زیرەك بوو و گەلەك رێز ل من دگرت.
پێشمەرگەیێ شۆڕەشا ئیلۆنا مەزن ئەو ژی گۆت: ل سالا 2013 هزرا دروستكرنا مونومێنتەكێ بۆ شەهیدێن گوندێ ئەرەدنا بوومن دروست بوو، و من برایێن موسلمان ل گوندێ ئەرەدنا ئاگەهدار كرن كو ل سەرسنك بوون (مستەفا، حەمزە، ئەحمەد) هاتنە دەف من و من بابەت بۆ شرۆڤەكر، و من گۆتێ دێ مونومێنتا شەهیدان بۆ هەر دو گوندێن ئەردنا موسلمان و مەسیحیان پێكڤە دروست كەین، و من داخاز كر هاریكاربن ل گەل من ب دەست نیشانكرنا وێنە و كەسانێن شەهید بووین، چونكە ئەز نەنیاسم و بەرامبەر پێزانین و شەهیدێن مەسیحیان خەما من و من گۆتێ مەزاختی خەما من و مرۆڤێن مە پێنچ هزار دولار پشتەڤانی كریە، و من گۆت ئەڤێن مای دێ پەیدا كەم و دەمێ من دەستپێكری گەلەك مەزاختی چوو و من ترۆمبێلا خوە فرۆت، و من مەزخاتن و هەر پێدڤی ب پاران بووم و چووم من هندەك دەینكرن و هەتا دو دەفتەر و نیف هاتینە مەزاختن، و هەتا نوكە دەیندارم و یێ پەشێمان نینم چونكە ئەگەر شەهید نەبن، نوكە ئەم دئازاد نەبووین و (18) شەهیدێن ئەرەدنا مەسیحیان مە هەنە و هەر هەمی یێ دشۆڕەشا ئیلۆنێ نە.
پێشمەرگەیێ شۆڕەشا ئیلۆنێ، فلیپ ئەرەدنی، بەحسێ رۆژێن سەخت و ژوارێن ژیانا خوە كر ل سەر دەمێ شۆڕەشا ئیلۆنا مەزن و گۆت: وی دەمی چ ترۆمبێل نەبوون و گەلەك جاران حەفت شەڤ و حەفت رۆژان ئەم ب پیان دچووینە (گلالە) بۆ هندەك كاغەزا و وەك پوستە و بارەگایێ سەرەكی ل (ناپردان) بوو و بلا ژبیر نەكین ژنا كورد گەلەك بۆ شۆڕەشا ئیلۆنێ و گولانێ كریە و خویشك و دایكێن مە و تایبەت دەڤەرا بەهدینان زێدەتر ماندیبوون ژ پێشمەرگەیی دیتی یە وی دەمی چ ئامیرێن پەیوەندیێ نەبوون، و ئەگەر چ دەما با ددا پێشمەرگە چنە گوندان و دا ل سر مالان هێنە بەلاڤەكرن، و ئەو ژن و خویشك دا رابن ب بەرهەڤكرنا خوارنێ و هەتا دروستكرنا خوارنێ كو ئەو پێشمەرگە ل گەل خوە ب بەت و هەتا هەر چ پێدڤی هەبان بۆ دهاتنە بەرهەفكرن، بۆ مێژوو دێ بێژم جارەكێ دەمژمێر سێ و نیڤی شەڤێ بوو ل گوندێ بەرۆشكا سەعدون و جگارێن من نەمان و نێزیكی مالەكێ بووم و ب چاڤا یا دیار بوو دكانەكا وێ مالێ دا و كورخالێ من و هەڤالەكێ دیێ پێشمەرگە ل گەل من بوون و من گۆتێ ئەڤە دوكانە و دێ پرسیارا جگارا بكەم، چونكە من جگارە نەماینە و گۆتن ئەڤە تویتن ل گەل مەیە و درەنگی شەڤە و من گۆتێ تویتن من نەڤێت دڤێت جگارا بكێشم وی دەمی من جگارێن (جمهوری) دكێشان.
