خەلكێ دهۆكێ ب گوژمێ 275 ملیار دیناران قەردارێن كارەبێ نە
ئەمیر ئەترووشی:
ڕێڤەبەرێ گشتی یا كارەبێ ل پارێزگەها دهۆكێ راگەهاند، نێزیكی 275 ملیار دینارێن ڕێڤەبەریا گشتی یا كارەبا پارێزگەها دهۆكێ ل سەر خەلكێ دهۆكێ و نە هاتینە دان و گۆت: كارەبا چو وەلاتیەكی ناهێتە بڕین ئەگەر قەرێن وی د كێم بن، لێ ئەگەر قەرێن كارەبێ ل سەر وەلاتیەكێ دناڤبەرا 5 بۆ 10 ملیۆن دیناران بن، ڕێڤەبەرییا مە ب نڤیسارەكا فەرمی دێ وی وەلاتی ئاگەهدار كەت و دڤێت سەرەدانا رێڤەبەریا كارەبێ بكەت و وی پارەی بدەت یان ژی بكەتە قست.
شاكر مەحمود، ڕێڤەبەرێ گشتی یا كارەبا پارێزگەها دهۆكێ ڕاگەهاند، بەری نوكە ب ئاگەهداریەكا فەرمی ژ لایێ ڕێڤەبەریا گشتی یا كارەبێ ڤە دەمێ 20 ڕۆژان مۆلەت ب وان وەلاتییێن قەرێن وان یێن كارەبێ دگەهشتنە زێدەتری 15 ملیۆنان دهاتە دان، دا كو قەرێن خۆ بدەن، لێ نوكە گۆهۆڕین ل سەر وێ بڕیارێ دا هاتینە، ل گۆرەی بڕیارا نوو هەر وەلاتییەكێ قەرێن وی یێن كارەبێ گەهشتبنە 10 ملیۆنان پێدڤییە د دەمێ سێ ڕۆژان دا سەرەدانا ڕێڤەبەریێ بكەت و قەرێ خۆ بدەت.
ئاماژە كر ژی، ئەو وەلاتییێن قەرێن وان گەلەك بن و شیانێن دانا هەمی پارەی نەبن، ڕێڤەبەریا گشتی یا كارەبێ ل پارێزگەها دهۆكێ هاریكاری و ئاسانكارییان بۆ دكەت ب ڕێیا دانا پارەی ب شیوەیێ قست.
شاكر مەحمود گۆت ژی:”پشتی ڕێڤەبەرییا مە ئاسانكارییان بۆ پشكەكا وەلاتییان دكەت كو قەرێن خۆ ب شێوەیێ قست بدەن، دێ بۆ ئێك هەیڤ قستێ خۆ دەن و هەیڤا دووێ سەرەدانا ڕێڤەبەریێ ناكەن، لەورا ب فەر دبینین وان وەلاتییان ئاگەهدار بكەین، ل دەمێ وەلاتی پارەیێ قەران د هەیڤا ئێكێ دا قستی ئێكێ ددەت پێدڤیە د هەیڤا دووێ ژیدا ل هەمان ژڤانێ هەیڤا ئێكێ سەرەدانا ڕێڤەبەریێ بكەت بۆ دانا قەرێ قەستێ دووێ د هەیڤا دووێ دا.”
ڕێڤەبەرێ گشتی یێ كارەبێ گۆت:” تا نوكە نێزیكی 275 ملیار دینارێن كارەبێ یێن ڕێڤەبەرییا مە وەكو قەر ل سەر وەلاتییێن پارێزگەها دهۆكێنە.
دەربارەی بڕینا كارەبی ژی دیاركر،”كارەبا چو وەلاتیەكی ناهێتە بڕین ئەگەر قەرێن وی د كێم بن، لێ ئەگەر قەرێن كارەبێ ل سەر وەلاتیەكێ دناڤبەرا 5 بۆ 10 ملیۆن دیناران بن، ڕێڤەبەرییا مە ب نڤیسارەكا فەرمی دێ وی وەلاتی ئاگەهدار كەت كو د دەمێ سێ رۆژان دا سەرەدانا ڕێڤەبەریێ بكەت بۆ دانا قەرێن خۆ، ئەگەر د شیانێن ویدا نەبیت هەمی پارەی بدەت دێ ئاسانكاری ب ڕێیا دابەشكرنێ ل سەر قستان بۆ هێتە كرن، لێ ئەگەر سەرەدانا ڕێڤەبەریێ نەكر د دەمێ دیاركری دا، ل وی دەمی دێ كارەبا وی هێتە بڕین.”
ڕێڤەبەڕێ گشتی یێ كارەبێ ئاماژە كر ژی،”د نوكە دا ڕەوشا دانا قەران باشترە و وەلاتی هێدی هێدی سەرەدانا ڕێڤەبەریا وان دكەن بۆ دانا قەرێن خۆ.”
