خەلكێ دێرەلۆكێ داخازا تیمەكا نقومڤانان دكەن
ئامێدیێ، مەحمود نهێلی
ژبەر هەبوونا سێ رووبارێن مەزن و هەبوونا هەژمارەكا زۆرا جهێن گەشتیاری یێن سەر ئاڤا كو رۆژانە ب سەدان گەشتیار قەست دكەنێ زێدەباری وێ یەكی رووبارێ زێ یێ مەزن دناڤەندا دێرەلۆك دا دەرباز دبیت، ئەڤە و چەندین ئەگەرەكێن دی، دبنە ئەگەرێ وێ چەندێ سالانە چەندین روودانێن خەندقینێ ل سەر ڤان رووباران دروست دبن و ژ بەر ڤێ یەكێ ژی هاولاتی و هەرەوسا لایەنێن پەیوەندیدار ژی داخاز دكەن، تیمێن نقومڤانان ل دەڤەرا وان بهێنە دانان، بۆ وێ یەكی بشێن تا رادەیەكی قوربانیێن ڤان روودانان كێم بكەن.
ئارمانج عەلی ئاكنجیێ سەنتەرێ ناحیا دێرەلۆك دیار كر، هەبوونا تیما نقومڤان ل دەڤەرێ ئێك ژ پێدڤیێن گرنگە كو پێدڤیە ل دەڤەرێ هەبیت، ژ بەر كو دێرەلۆك دكەڤیتە سەر سێ رووباران و زێدەباری نوكە چەندین جهێن بهێنڤەدانێ و گەشتیاری ل دەڤەرێ هاتیە درووست كرن و پرانیا وان ژی ل سەر ئاڤا رووبارێ شێرانكی نە و گۆت: ئەڤە زێدەباری وێ یەكێ زێ مەزن د ناڤەندا سەنتەرێ ناحیا دێرەلۆك دا دەرباز دبیت زارۆیێن مە خوە دئیخنە ڤێ ئاڤێ، ئەڤێ یەكێ ژی مەترسی ل سەر ژیانا زارۆكان دروستكریە.
هاولاتیەكێ دی ب ناڤێ ستار عەبدووللا دبێژیت: (سالانە چەندین زارۆیێن دێرەلۆك و دەڤەرێن دی زێدەباری گەشتیاران د دكەڤنە د ئاڤا زێ دا و د خەندقن، ڤێ یەكی ژی گەلەك ئەگەر هەنە ئێك ژ وانا نەبوونا تیمەكا نقومڤانایە ل دێرەلۆكێ).
ناڤهاتی دیار ژی كر، پێدڤیە ل دەڤەرەكا هوسا هند رووبار لێ هەی و هەروەسا دەڤەرەكا گەشتیاریە، پێدڤیە تیمەكا نقوڤان هەبایە داكو قوربانیێن خەندقینێ كێم ببن.
ناڤهاتی داخاز ژ حكومەتا هەرێما كوردستانێ كر، ئەڤ داخازیا خەلكی بهێتە بەرچاڤكرن و تیمەكا نقومڤانان ل دەڤەرێ بهێتە دامەزراندن و خۆل بۆ بهێنە ڤەكرن و راهێنان پێ بهێنە كرن بۆ رزگاركرنا قوربانیێن خەندقینێ.
رێبەر سادق رێڤەبەرێ ناحیا دێرەلۆك بۆ رۆژناما ئەڤرۆ دیاركر، راستە ل بنگەهێ بەرەڤانیا باژێرێ ل دێرەلۆكێ هەتا نوكە تیما نقومڤانا نینە زێدەباری وێ یەكێ كو دێرەلۆكێ گەلەك پێدڤی پێ هەیە، ژ بەر كو هەموو لایێن وێ رووبار و ئاڤن و گۆت: مە لایەنێن پەیوەندیدار ئاگەهدار كرینە كو دامەزراندنا تیمەكا نقومڤان ل دەڤەرێ كارەكی فەرە.
گۆت ژی: دێ بزاڤێن رژد كەین ئەڤ بابەتە بهێت چاسەرەكرن و تیمەكا نقومڤانان ل دەڤەرێ بهێتە دانان و ب نڤیسار دێ جارەكا دی تەكەزیێ ژ نڤیسارا خوە یا بەرێ كەین ژ بۆ دامەزراندنا تیمەكا نقومڤانا ل دەڤەرێ و دێ ب هەموو لایەكی ڤە ژی هاریكار بین دگەل دا.
