خەلكێ هەولێرێ كوردپەروەرن، دوژمن نەشیا كۆنترۆل بكەت، نەهێلان خەلكێ بەهدینان ژ برسا بمریت
دیدار، سالار محەمەد دۆسكی:
پێشمەرگێ هەر دو شۆڕەشێن ئیلون و گولانێ (عابد سەلیم سلێمان ئەڤریكی) ل سالا 1954 ژدایك بوویە، خواندنا سەرەتایی ل قوتابخانا بەهدینان ل دهۆكێ و هەتا دووێ ناڤنجی دەست ژ خواندنێ بەردایە.
پێشمەرگێ هەر دو شۆڕەشێن ئیلون و گولانێ عابد سەلیم زێدەتر بۆ رۆژناما ئەڤرۆ گۆت: ل سالا 1973ێ من پەیوەندی ب هێزا شێخان كر وی دەمی سەرپەرپەرشتێ شێخان (حسۆ میرخان) بوو، ئەوا سالا تەناهی بوو لێ هەر كوردان باوەری ب حوكمەتا عیراقێ نەبوو و بەرهەڤیێن خوە دكرن، وی دەمی ل شێخان هاتین و ب پیان ژ زاویتە چووینە حاجی عومران چوونا مە شەش رۆژان ڤەكێشا و گەهشتینە مەكتەبا سیاسی، وی دەمی ل (ناوپردان) بوو و مە خواست ببینە پێشمەرگە و ئەوان دگۆت دێ هەوە پشكداری قوتابخانێن فێربوونا توپا كەین، و ئەم پشكداری خولان بووین و زێدەتر كەسانێن خواندەڤا دچوونە ڤێ خولێ، ئێكەم پشكداربوونا مە ل شەرێ (گەلیێ عەمەر ئاغا)ی دا بوو وی دەمی هێزا بالەكایەتی وی جهی بوو، هەتا سالا 1975 وی جهی بووین.
پێشمەرگێ هەر دو شۆڕەشێن ئیلون و گولانێ گۆت: شكەستنا 1975 مە شیانێن چوونا ئیرانێ نەبوون و مە پارە نەبوون، و نەچاربووین ب پیان هەتا گەهشتینە ئامێدیێ و مە خوە رادەستی دوژمنی كر، و كرینە دزیلێن لەشكری دا و زڤرینە دهۆك و خەلكێ عاجزبوو، و پشتی چەند رۆژا داخوازا ژ مە هاتەكرن بۆ چوونا لەشكری یا ب زووری، و برینە باشورێ ئیراقێ (دیوانیێ و بعقوبە) و بتنێ پالەتی ب مەدكر، دووڤدا لێبورینێ ژ مەگرت و زڤرینە دهۆك وسێ جارا من بزاڤا دامەزراندنێ كر، نە وەردگرتنم و دا دیڤچوونێ كەن سەحكەنێ من پێشمەرگاتی كریە نە وەردگرتم، و ئەگەر من نەگۆتبایێ ژی هندەك هەبوون دگۆتنە حوكمەتێ هەتا سالا 1977 من داخوازا دامەزراندنێ ل كەرتێ ساخلەمیێ كر، وی دەمی ئەوی كەرتی بێی ئەمنێ خەلك وەردگرت و هاتمە مەوەرگرتن هەتا شەرێ ئیراق و ئیرانێ و مالا مە ل دهۆكێ بوو، چونكە شەش جاران گوندێ مە ئەفریكێ هاتە سۆتن.
پێشمەرگێ هەر دو شۆڕەشێن ئیلون و گولانێ گۆتژی: سالا 1982ێ جارەكادی ناڤێ مە هات بۆ لەشكری یا ب زووری و ئێكسەر چوومە ناڤ رێزێن پێشمەرگێ كوردستانێ ل لژنا ناوچا شێخان، وی دەمی ل رێكخراوا (شەهید عەلی عەبوو) بووم و سەرپەرشتێ مە (صەدیق سەعدی زاویتەی) بوو، (حسێنێ عەبو) بوو و بەرپرسێ لژنێ(سلو خدر) بوو و دووڤدا (مەلا رەمەزان) هات، دووڤدا (فەرزندە زێباری) هات هەتا سالا 1988 هەوا ئەنفالا مە قەستا گارەی كر، ب خێزان ڤە و هەتا بیست رۆژان ماین نەخوارن و ڤەخوارن نەبوو، و چەند دونیا بۆ دوژمن و لێبورین حوكمەتا بەعس دەركر، و مە هزر كر دێ چینە مال، لێ ئیناینە باكرمان و دووڤدا سەرێ كەلها ئاكرێ دووڤدا بۆ كەلها دهۆك دیڤەلانكێن بەعیسا درێكێ دا بوون دەست قوتان، دگۆتن نە هەوە حەلالكر و نە زەلالكر و كەلها دهۆكێ ئەمنا سەدامی گەلەك خەلك پێش چاڤێن مە دقوتان، و دووڤدا كرینە ترۆمبێلان دا و مە دوعا دكرن بمرین ترس و برس، و كوستەر ئینان و ئێكی هزر نەدكر هندەك ئاڤێ بكەتە ترۆمبێلا خوە دا، و هەتا مویسل چووین ترۆمبێل راوستیان ل ئاڤێ گەریاین ئێكسەر ئەمنێ راهێلا مە و چووینە ترۆمبێلا داڤە، ئەمنێ هزر كر خەلكێ هەولێرێ دێ ب دەست قوتان پێشوازیێ مە كەن، و مە بابەتێ خوە بۆ خەلكی گۆت و خەلك دووڤ مە راهات هەتا گەهشتینە (جەژنیكانێ) داناینە بیابانەكێ بیێ ئاڤ و بتنێ ستیری ل وێرێ بوون، و گوندەك وێرێ بوو و بتنێ (30) مال بوون خودانێ گۆندی (حەجی فازل) بوو، وی رەحمەتی ل سەر هەمی مالێن گوندی سەپاند كو نانی پێژن و زەلام ب گەهینن و هەتا سپێدێ ژنكا نان و خوارن چێدكر و زەلامان دگەهاندە مە، دووڤ دا گوندێن دەردور ژی هاریكاریا مە كر، خەلكێ هەولێر ترۆمبێلێن خوە تژی ئەرزاق كرن و هاتن و زالگەهێن ئەمنێ نەهێلان ئێكسەر ترۆمبێلێن خوە ل دەشتێ دا و هاتنە ناڤ مە و گۆتن رۆژەكێ بووینە و دێ رۆژەكێ مرین، حەفت شەڤ و حەفت رۆژا ئەمنێ نەشیا كونترۆلێ ل سەر بكەن، و خەلكێ هەولێرێ نانپێژیێن ل هەولێر نەهێلان و نان بوومە دئینان و ئێدی ئەمنێ نەشیا كونترۆلێ بكەت، و هەر تشتەكێ مال پێدڤی با خەلكێ هەولێرێ بوومە ئینان وی دەمی پتر ژ حەفت هزار و 300 خێزانان بووین، وی دەمی بەعیسا بریار دا كو رۆژانە هەر پێنچ مرۆڤان ماف هەیە دەستیردانێ وەربگرن و بچنە ناڤ باژێری و ئەڤ هژمارە گەلەك یا كێم بوو، وی دەمی رەفیقەكێ خەلكێ هەولێرێ هەبوو و ئەوی جهێ ناڤەكی پێنچ شەش ناڤ دنڤێسین و هەتا 30 ناڤا نڤێسین و هەتا بەرفرەه بووین و ئێدی دەستیردان بوونە حەفتیێ جارەكێ، و خەلك بخوە دچوونە پالەتیێ یان هەر كارەكێ كربا، حوكمەتا بەعس دو سال سزادانا مە دانابوو و دووڤدا گۆت بەغدا بڕیار دا هەر جهەكێ هەوە دڤێت هوون دشێن بچنێ و مە مامەلێن خوە دروستكرن و زڤرینە باژێری و دیسا خەلك هەبوون نەدباش و دگۆتنە ئەمنێ ئەڤە یێ بەحركێ یە و ماین هەتا سەرهلدانێ وی دەمی د دلسوتی بووین و مە هێرشكرە سەر ئەمنا بەعیسان و مە دلێ خوە ئارام كر و گەلەك نەڤەكێشا رەڤا ملیونی دروست بوو وی دەمی دا شەری كەین و ئەم نەترسیان لێ ترسا مە ژ كێمیا بارانكرنێ بوو چونكە دوژمن هەر دوژمنە.
پێشمەرگێ هەر دو شۆڕەشێن ئیلون و گولانێ گۆت: سەرهلدانێ خەلكی دگۆتنە براهیمێ عەلی جهێ ب مەترسی بەرێ مە بدێ، چونكە دلێ مەیێ سوتیە چەند سالە ل بەحركێ و دیسا ئەم پێشمەرگەی ینە.
پێشمەرگێ هەر دو شۆڕەشێن ئیلون و گولانێ گۆت: شۆڕەشا ئەئیلونێ توپ چی بووم و گەلەك جاران من مرنا خوە دیتی یە، ل شۆڕەشا گولانێ پارتیزانی بوو و گەلەك شەران پشكدار بوویمە، ل سالا 1986ێ جارەكێ هێرشا دوژمنی هات دا گوندێ ئەڤریكێ سوژن و مە خوە بەرهەڤكر زەلامێن شیان تڤەنگێ ب هاڤێژن ئەم هەشت بووین، مە كەمینە سپێدێ ڤەدا نەهات و دووڤدا رۆژا دووڤدا كەفتنە جادێ و هاتن و مە هێزێن خوە كرنە دوو هێزەك ل پشتێ بوو و هێزا دی مە بەرنامە دانابوو دوژمنی ببڕین و ئەم دنیڤەكێ راچووین و ئەوا هزر نەدكر ئەم پێشمەرگەینە و مە ل پشتێ رەمی كر و مە گۆتێ بەختێ (مەلا مستەفا)ی خوە رادەست بكەن، وی جهی ئەم شیاین (11) چەكدارێن دوژمنی ب دەست بگرین، و ئەم چار پێشمەرگە (ئەحمەد تەلوەی، شینو ئێتیتی، محەمەد عەلی خوركی و ئەز) بووم و كلاشینكوفێن وان مە شیشك ژێ ئینادەر و هەر كلاشینكوفێن وان ب ملێ وان ڤە بوون، هەتا مە ئینایە دەرێ شكەفتا ئێتیێ و مدەرعێ رەمی مە كر و دووڤدا چووینە ئاقاری و قورتال بووین وی شەری ژی من مرنا خوە دیت و من باوەرنەدكر دێ قورتال بین.
ل دووماهی پێشمەرگێ هەر دو شۆڕەشێن ئیلون و گولانێ گۆت: سلاڤ و رێز بۆ خێزان و كەس و كارێن شەهید و ئەنفالكری و زیندانیێن سیاسی و سلاڤ بۆ پێشمەرگێن خەباتكرین و سۆپاس بۆ خودێ دئازادین و سەربەستین، هیڤی و ئۆمێدا مە ئەوە مللەتێ مە ئێك دەنگ و ئێك رێز بیت و بگەهیتە هەمی هیڤی و ئومێدێن خوە.
