خەلكێ گوندەكێ ئاكرێ داخوازا ئاڤا پاقژ دکەن
رەمەزان زەكەریا
دەما چار سالانە بیرەكا ئاڤێ ب كوراتیا ٢٨٠مەتران ژلایێ خێرخازەكێ ڤە بۆ گوندێ خانەگەهێ ل دەڤەرا دینارتێ هاتیە كولان، بەلێ هەتا نوكە ژبەر نەبوونا كارەبێ كار نەكریە.
نەجدەت قاسم، موختارێ گوندێ خانەگەهێ بۆ ئەڤرۆ گۆت: مە بیرەكا ئاڤێ یا هەی ئەم ئاڤێ دبینین و نەشێین ڤەخۆین، ما ئەگەر كارەب نەبیت دێ چاوا ئاڤ هێت، بیرا ئیرتووازییە و پێدڤی ب كێبل و كەرەستەیان هەیە، برك و هەموو كارێن وێ هاتینە كرن و چێكرن، بەلێ كارەب مایە بگەهیتێ و مە گەلەك بزاڤ كرن ل حكومەتێ، بەلێ هەتا نوكە چارەسەر نەبوویە.
ناڤبری گۆتژی: ئاڤا مە گەلەك یا پیسە، ئەم هەموو تووشی نەخۆشیا بووینە، هەموو گاڤا یا شێلییە و پەز و ئاژەل دچنە دناڤ كانیێ دا و نوكە یا هەرفتی ب شیانێن مە ناهێتەڤ دەر، هندەك جارا مە ب حەفارێ دكولا، بەلێ نوكە حەفت مەترا ئاخ كەفتیە سەر.
ئەندازیار زرار ئەحمەد رێڤەبەرێ ئاڤا ئاكرێ بۆ ئەڤرۆ گۆت: مە نڤیسینەک بۆ دەڤەردارێ ئاكرێ هنارتیە كو بهێتە بلندكرن بۆ پارێزگەهێ و د پلانا مە یا رێڤەبەریێ دایە ئەگەر بۆدجە بۆ رێڤەبەریا مە بهێتە دابینكرن، ئەو ئێك ژ كارێن مە یێن سەرەكییە كو كارەب زوو بگەهیتە وی گوندی، بەلێ وەك دیار ژبەر كێشەیێن دارایی هەتا نوكە رازەمەندی نەهاتیە كو ئەم وی كاری بۆ وان ئەنجام بدەن.
