خەلۆ و جەلۆ دێ ژنا دویێ ئینن
ئەڤرۆ نيوز:
پشتی شەش سالێن دابڕینێ، ل رۆژێن بۆری ب دەستپێشخەریا زیوەر ئۆرەیی خوادنێ کۆمپانیا میرمیۆزیک و دەزگەھێ نۆژەن میۆزیک یێن بەرھەم ئینان و بەلاڤکرنا بەرھەمێن ھونەری ل دھۆکێ، و دەرھێنەر جوان بامەرنی جارەکا دی ھەموو ئەندامێن کۆما دەڤەرا ئامێدیێ گەھشتە ئێک و فلمەکێ نوو یێ کۆمێدی تۆمارکر، و وەک ئەو دبێژن: ئەڤە دیاریا کۆمێ یە ب ھەلکەفتا ھاتنا سالا نوو (2016) بۆ ھەموو خەلکێ کوردستانێ، ب تایبەتی ژی بۆ وان بینەران ئەوێن حەزژ بەرھەمێن وان دکەن.
فلمێ ( بیلۆ و خانۆ) ژ سیناریۆیا سەعید مستەفا و دەرھێنانا جوان بامەرنی یە، و دەمێ فلمێ نێزیکی 70خولەکانە کو ل گوندێ ستکۆرکێ ھاتیە وێنەکرن.
زێوەرئۆرەیی بەرھەم ھێنەرێ وی فلمی دیارکر، بەری چەند رۆژان ھەموو دیمەنێن وێنەکرنا فلمی ب دووماھی ھاتینە، و نوکە یێ دھێتە مۆنتاژکرن و مە ل بەرە ل چەند رۆژێن بھێن، ئانکو بەری ھاتنا سالا نوو وەکو دیاریا سالا 2016بەلاڤ بکەین.
ئەو فلم ژ قارەمانیا ھونەرمەندان (خەلیل قەدشی، جەلال عەبدوللا، سەعید حەسەن، سەعید مستەفا، و غازی زەینەددین) و کۆمەکا ئەکتەرێن دی نە. ناڤەرۆکا فلمی ژی ل دۆر دو کەسانە، کو ئەو ژی ھەردو ھونەرمەندێن کۆمێدی ( خەلۆ وجەلۆ) نە، ئەڤ ھەردو کەسە گۆندێ خوە بجە دھێلن و قەستا گۆندەکێ دی دکەن، ل وێرێ تووشی ھندەک ئاریشان دبن، و پشتی دھێنە چارەکرن ھەرئێک ژ وان حەزژ کچەکا وی گۆندی دکەت، ل دووماھیێ خەلکێ گۆندی دبێژنێ (ئەم دێ کچێن خوە دەینە ھەوە لێ دڤێت ھوون ل گۆندێ مە بمینن).