خەما مەزن و بارێ گرانێ سەرۆك بارزانی
رێبەرێن مەزن و نشتیمان پەروەر هەردەم خەما مەزن و بارێ گرانێ مللەتێ خوە هەلدگرن و دەرگەهێن بەختەوەریێ بۆ ڤەدكەن، نەبوونا ئێكگرتن و ئێكرێزی هەردەم ئاستەنگەگا مەزن بوویە دناڤبەرا هێز و ئالیێن سیاسی یێن كوردستانێ و فاكتەرەك بوویە بۆ كاریگەریا لایەنێن دەرەكی، گەهشتیە وی ئاستێ هندەك جاران خەلكێ كوردستانێ بۆ هیڤی و ئۆمێد دبیت ل دروستبوونا وێ ئێكرێزیێ كو خزمەتا دووزا كوردستانی و بزاڤا رزگاریخوازیا كوردستانی بكەت، لێ هەردەم سەرۆك مەسعوود بارزانی ئەو رێبەر و كەسایەتی بوویە ئەو بێ ئۆمێدیا خەلكێ كوردستانێَ ڤەرەڤاندییە و دۆر ل هەر بابەتەكێ دیتر بەرژەوەندێن گشتی یێن نشتیمانی و نەتەوایەتی سەرپشك كرینە و هێز و ئالیێن سیاسی یێن كوردستانێ لێك كۆمكرینە و نەخشە و پلانێن بەرهنگاریا پیلان و مەترسیێن ل سەر بەرژەوەندێن كورد و كوردستانێ دارشتینە و سەركەفتن ب دەست ئینانە، چەندین ساڵە ژێك دووربوونا ئالیێن سیاسی یێن رۆژئاڤایێ كوردستانێ ببووینە مەترسی ل سەر وی بەشێ كوردستانێ و دەستكەفتێن وێرێ، پشتی نەمانا رژێما ئەسەدی و هاتنا دەستهەلاتەكا نوو ل سووریا، ئەو دووبەرەكی و ژێك دووربوونا ئالیێن سیاسی یێن رۆژئاڤایێ كوردستانێ مەترسی ل سەر زێدەتر كریە و تنێ ئێكرێزی چارەسەرە، ل سەر ئاستێ نیڤدەولەتی ژی دۆستێن كوردان داخازا ئێكرێزیا كوردان دكەن .
دەستپێشخەیا سەرۆك بارزانی بۆ ژێز نێزیككرنا ئالیێن سیاسی یێن رۆژ ئاڤایێ كوردستانێ ب هنارتنا نوونەرێ خوە و پاشان كۆمبوونا جەنایێ سەرۆك بارزانی ل گەل فەرماندێ گشتێ (قەسەدێ) (مەزلۆم عەبدێ) ل هەولێرێ، بۆ مە وەكی كورد دیار دكەت كو سەرۆك بارزانی هەلگرێ خەم و بارێ گرانێ كورد و كوردستانیا ل هەر جهەكێ هەبیت، دیسان پارێزەرێ ماف و ئارمانج و دەستكەفتانە و دڤێت ئێكرێزیەكا پۆلایین دناڤبەرا هەمی پێكهات و ئالیێن سیاسی یێن كوردستانێ درۆست بكەت كو ببیتە ئەگەرێ پاراستن و پێشڤەچوونا دەستكەفتێن كوردستانێ كو لسەر ئاستێ نیڤدەولەتی و هەرێمایەتی بهێتە پەسندكرن، گرنگ و پێدڤی یە دەستپێشخەری و رێنما و ئامۆژگاری و پلانێن داهاتی یێن سەرۆك بارزانی بۆ چارسەركرنا ناكۆكیا و دروستبوونا ئێكرێزیێ و نەخشێ داهاتی ب هەستەكا نشتیمانی و نەتەوەیی بهێنە پەسندكرن و پراكتیزەكرن كو ل ئاستێ خەمخۆری و دلسۆزیا سەرۆك مەسعوود بارزانی بیت و ببیتە ئەگەرێ سڤكبوونا ڤی بارێ گرانی جەنابێ وی و ئێكرێزی ژی وەكی هیڤی یا دێرینا خەلكێ كوردستانێ بجهـ بهێت و مەترسی ل سەر كوردستانێ بهێتە لادان.
