خەمۆكی ژی ئەگەرەكە دەمارێن دلی بهێنە گرتن
بەرپەرێ ساخلەمیێ:
د.هەڤال عبدالمحسن، تایبەتمەندێ نەخۆشیێن دل و هناڤا دیاركر كو پترین نەخۆشیا دلی یا بەربەلاف ئەوە دەمارێن دلی دهێنە گرتن و كو خەلك ب جەلتێ و ژانەدلیێ ناڤبەت و گۆت: ئەگەرێن وێ یێن سەرەكی جگارەكێشانە دگەل بلندبوونا فشارا خوینێ و نەخۆشیا شەكرێ و كولیسترول و قەلەوی و كێمبوونا وەرزشێ و هندەك ئەگەرێن قنێتی و ڤەكۆلینێن نوی دیاردكەن خەمۆكی ژی ئەگەرەكە بو نەخۆشیێن دبنە ئەگەر كو دەمارێن دلی بهێنەگرتن.
د.هەڤال ئەوژی دیاركر كو نەخۆشیێن دلی د هەموو عەمران دا پەیدادبن ژ زارۆكێ ئێك رۆژی هەتا دانعەمران.
دیاركر كو هەموو نەخۆشێن دلی نەشێن ڕۆژیان بگرن، پێدڤیە نەخۆشیا وان یا كونترول كری بیت، بو نموونە نەخۆشەكی فشارا خوینێ هەبیت و كونترولكری بیت یان دەمارێن دلی هاتبنە گرتن و رەوشا وی جێگیرببیت دشێن رۆژیان بگرن، بەلێ مە نەخۆش هەنە كو فشارا وان یا بلندە و پێدڤی گەلەك جورێن دەرمانانە، یان جەلتە و ژانەدل هەنە یان قەستەرە نوی چێكریە یان سینگێ وان هاتیە ڤەكرن، هەلبەت ئەو نەشێن زوی ب زوی رۆژیا بگرن، چونكو رۆژی دێ كارتێكرنێ لێ كەت.
تایبەتمەندێ نەخۆشیێن دل و هناڤا دیاركر، ئەو نەخۆشێ دلی هەكە رۆژیان بگریت، پێدڤیە دەرمانێن خوە دابەش بكەتە پاشیڤێ و فتارێ و نابیت بهێنە ڕاوەستاندن و گۆت: دەمێ فتارێ ژی پێدڤیە خوارنا وی یا هەڤسەنگ بیت، شوربە و زەلاتەبن و نابیت ئێكجار خوارنا گران بخۆت، چونكو پشتی برسیبوونێ هەكە ئێكسەر خوارنەكا گران خوار، دێ چیتە مەعیدێ و رووڤیكان و كێم دێ گەهیتە دلی و دێ كارتێكرن لێ بیت.
د.هەڤال عبدالمحسن گۆت: نەخۆشێن دلی دەمێ ب رۆژی دبن، پێدڤیە گەلەك فشارێ ل سەر خوە نەكەن، و هەكە دیت بێهنا وی تەنگ بوو، یان سینگێ وی ئێشا و گێژبوو و خوهدانەكا زێدە بوو پەیدابوو، یان گەلەك وەستیا باشترە ڕۆژیا خوە بخۆت، چونكو ئەو نیشانا پەیدابوونا ئاریشەكێ نە.
