خەنایا بویکەکا ئەنفالبووی
حسێنێ دەحلێنەوی
دەما دوكێل
ژ پشتا چییا بلند بووی
ئەوێ سپێدێ
روژێ جوانییا خوە ل ئەلندێ وەندا کربوو
هەر تشت هەرەسان ببوو
ئەو کالێ کۆپال د دەستاندا
وێ دایکا پارزینک لناف ملاندا
وی شڤانێ مەر و مالات ل زوما دچەراند
وان زارۆکێن ل کۆلانا حەنەک دکرن
بەربویکییا
تلیل و سەرکێ زاڤا دگۆت
هەی لا لمن وەی لا لمن
بو وێ بویکا
خەنا ل دەست و بازن
دەست مالا زاڤای ل خوینێ سۆر گول
تەڤدا
تەڤلی دویکێلا خەزەبێ بوون
وەیلا لمن هەیلا لمن
هێشتا
من تاما ژینێ نەتامکری
سمبێلێن زەر خەناکری
گوڤەنەند یا شاریای و چاڤەرێ نە
خەونا من لاوکێ منە
ئەڤرۆ ئەو زاڤا و
ئەز ژی پەرییا بەر دلێ وی مە
وێ رۆژێ
عڤرێن رەش و
با و باکوزیرکا ل هنداڤی واری
تەڤ خەزەب چوون
مینا توفانا نوح پێغەمبەر
شوینا بارانێ
سیانید و غەردەل ژێ دباری
ئوف ئەڤ چ توڤانە
تەڤدا دەربەدەر بوون
ئاخ چ دەور و زەمانە
گریا زارۆکان د قرقرکێدا ئاسێ بوویە
بویک
ل چاڤەرێ یا زاڤای
دناڤ جلێن بویکینیێدا خوینەلوبوویە
ژیان لێ تەڤلی هەڤ بوو
هند سواری ئیڤایان کرن
هند ژی لبەر بێهنێ نەفەس تەنگ بوون
هندا ژی لبن ئەشکەنچێ بێ هۆش بوون
هند ژی قێرین و نالینا وان
چیا هەرفاندن
هندا ژی رۆندک لێ زوها نەبوون
رومەت لێ قورمچاندن
زارۆ لبەر گەف و گۆڕا ژدایک بوون
و خوین ژ بەدەنا وا دچوو
هند ژی هێشتا شەهیدێن زێندینە
وەیلا لمن هەیلا لمن
چ رۆژەکا سەیر بوو!
جەلادا
خوین فردکر
گیانێ کوردا
ب ساخی بن ئاخ دکر
رۆژا حەشرێ بوو
تۆز و تەمەتی وارێ کوردا
تاریکر بوو !!!
ئەنفال
زلەیەکا بێ وژدان بوو
چونکی کورد بووین و
ب کوردی
د ئاخفتین و
خودان ئاخ و مللەت بووین
وەیلا لمن هەیلا لمن
ژ ڤێ زولم و زەوالێ
ئەم
ساخ ماین و
نەمرینە
د ئاخێدا
شوین بووینە ڤە
مریدێن دوزەکێینە
نامرین و هەر زیندینە
ئەم کوردین کورد
هەر بووینە و دێ هەر هەبین
خوراگرین و
ساخ و نەمرینە.
