خەونا بۆتانی بجهـ هات و پەرتووكخانەیەك ڤەكر
سالار محەمەد دۆسكی:
پ.د: عەبدوالفەتاح بۆتانی، د دیدارەكێ دا بۆ رۆژناما ئەڤرۆ گۆت: مەرەم ژڤەكرنا پەرتووكخانەیا من، ئەوا ل حەفتیا بۆری هاتیە ڤەكرن، نە بازرگانی بوو، بەلكو پتر ژ بیست سالانە خەونا من بوو پەرتووكخانەكا مەزن بڤی رەنگی ل باژێرێ خوە ڤەكەم و ئەڤە مەزنترین پەرتووكخانە یە ژ روویێ جۆری ڤە ل پارێزگەها دهۆك و مووسل دهێتە هێتەڤەكرن.
بۆتانی گۆت: ئەڤ پەرتووكخانە ژ چەندین پشكان پێك دهێت، یا ئێكێ پەرتووكێن فرۆتنێ نە، پشكا دویێ پەرتووكخانا من یا تایبەتە و 90% یا پەرتووك و بەلگەنامێن گرنگ تێدا هاتینە پاراستن و ئەڤە بتنێ بۆ ڤەكۆلەر و قوتابیێن ماستەر و دكتۆرایێ نە كو مفای ژێ وەربگرن و پشكەكا دی كارێن دەستی نە. و چەندین دەزگەهێن رەوشەنبیری و راگەهاندنێ پشتەڤان و د هاریكار بوون ب دانا پەرتووكان دا بۆ پەرتووكخانا مە، گەلەك بەلگەنامەیێن من یێن تایبەت دڤێ پەرتووكخانێ دا هاتینە دانان، رێڤەبەرا پەرتووكخانێ هەڤژینا منە و رەنگە ئێكەم ئافرەت بیت پەرتووكخانە هەبیت ل ڤی باژێری و وێنەیێن بژارە یێن پایتەختێن مێرنشینێن كوردان هاتینە دانان وەك (بادینان، سوران، بەدلیس) زێدەباری پولێن حوكمەتا هەرێما كوردستانێ ژ 1992 وەرە هەتا نوكە د ناڤ پەرتووكخانێ دا هەنە و زێدەباری كومەكا بەران ژ باژێرێن كوردستانێ ل پارچەیێن جودا و چەندین پێدڤیێن من یێن كاركرنێ و ئەڤە بۆ فرۆتنێ نینن و بتنێ بۆ مفا وەرگرتنێ نە و مەرەم ژڤەكرنا پەرتووكخانێ نە هزرەكا بازرگانی یە، بەلكو مە دڤێـت هزر و بزاڤا رەوشەنبیری ل باژێرێ مە پێش بكەڤیت و ئارمانجا مە بازرگانی نینە.
