خەونا ڕەنگــین و فێلباز
شرین دوسكــی
دگەل دەنگێ لێدانا دەرگەهی، نازدارا چاڤ جوان ژ خەوا شرین هشیار بوو، بەرەف وی دەنگی چوو، دا بزانیت ئەو كی یە ل وی دەمێ زوی و نە چاڤەرێكری هاتی، دگەل خوە دگۆت: دبیت ئەڤە ئەو خەونا رەنگین یا من بیت ئەڤا هەر شەڤ ل من دبیتە مێهڤان. هێدی هێدی ب پێنگاڤێن رێك و ناز بەرەڤ دەرگەهی ڤە چوو، ل پشت وی دەرگەهی خەمەكا دژوار و گران بوو، وێ خەمێ گەلەك ب شارەزایی و فێلبازی كراسێ خەون و خوەشیێ ل دۆر بەژنا خوە ئالاند بوو، هەر كەسێ ئەو دیمەنە دیتبا بێ هزر كرن دا خوە ل دۆر بەژنێ ئالینیت، نازدارێ دەرگەهـ ڤەكر و ب جوانی گۆتێ فەرموو چەوا خزمەتا هەوەیێن رێزدار بكەم؟ خەما فێلباز گۆتێ: رێكی بدەمن دا هەر چ خەونەكا تەهەیە بۆ تە بجهبینم و گۆت: ئەز ژبەر تە و دلخوەشیا تە ل ڤێرێ ئامادەبوویمە رێكێ بدە بهێم ژۆر دا گرێبەستەكا كەیف و خوەشی و هیڤییا پێكڤە مۆر بكەین و تە ببەمە وێ بەهەشتا من هەی، پشت ڕاستم دێ یا بدلێ تەبیت و تو دێ خەملینی و ژیانێ ل من كەیە دو ژیان، ئەو بەهەشتا نازدار تێدا یا جوان و تەمام بوو، ب تنێ ژۆرەك نەبیت ئەو ژۆرا وێ ژ هەمییان گرنگتر بوو، ئەو ستوینا بەهشتا وێ بوو، لێ بمخابنیڤە خوەدیكا وێ ژۆرێ، لایێ وێ یێ شكەستی بوو، چەند جارەكا پرچا خوە داڤ داڤ كربا و وەك رێزگرتن لبەر وێ خوەدیكێ راوەستیابا دا بریندار كەت، هەرجارەكا دێمێ خوە ب رەنگێن جوانیێ خەملاندبا دیسان دا وێ بریندار كەت، وێ خوەدیكێ بەهەشتا وێ بۆ كربوو دۆزەخ، نازدار دگەل خوە كەتە گەنگەشێ وگۆت: ڕۆژ هات ژ ڤێ خوەدیكا هەمی خەونێن من ژناڤ برین بهێلم وبەرەڤ ژیانەك نوی بچم. خەما فێلباز ب ڕێكێن خوە شیا نازدارێ رازی بكەت و دگەل خوە ببەتە دۆزەخا بێ دوماهی، رێكا وێ دۆزەخێ بۆ گولڕێژ كربوو، دەستێ وێ گرت و دگەل خوە بەرەڤ وێ خەونێ بر ئەوا د هزرا وێ دا چێكری. پشتی رێڤەچوونەكا درێژ و تژی ئاستەنگی، كەفتنە بەرامبەر ئاڤەهیەكێ ژناڤچووی و گەلەك بێ سەروبەر، گۆتێ: خاتین ئەڤەیە بەهەشتا تە یا نوی، هیڤیدكەم ب پێیێ راستێ ب ژۆر بكەڤە دا پیرۆزیا ڤی جهی بۆ تە ژی بهێت. نازدار ل دۆر خوە زڤری و هندی كرە هەوار و گازی، ئەڤە نە ئەو خەونە نە ئەو بەهەشتە، ئەڤە هەمی كەند و كۆرن، ل هەمی لایان هەڕییە. ل ڤی لای دكەڤت و ل وی لایێ دی د تەحسی، نەدەست بۆ مان نەژی پێ هەمی بوونە برینێن تژی خوین، دێمێ وێ ژی ب ئێك جاری رەنگێ پیران گرت و چرمسی، ڕۆژ بۆ ڕۆژێ ژیان لێ تاریتر لێهات وخوەزی ڕادهێلان بۆ برینێن خوەدیكا خوە، لێ نازدارێ دەست نەداهێلان، هەردەم بەرێ خوە ددا وێ تیشكا رۆژێ ئەوا ب كۆتەكی ژ دەرزا دیواری دهاتە ژۆر، هێدێ هێدێ هێز دا خوە وخەونێن خوە لبەر وێ تیشكا بچویك ئاڤا كرن، تاكو شیای ب ئێكجاری خوە رزگار بكەت و ئەو بەهەشتا وەكو یا وێ دڤیا، بۆ خوە دروست كر.
