دابەشکرنا میراتی مافەکێ شەرعی و قانوونی یە
بێوار حەمدی:
د یاسایێ دا چ جیاوازی نینە هەکە کچ یا شویکری بیت یان نە دێ هەر پشکا خۆ یا میراتی دروست وەرگریت، پارێزەرەکی ژی گۆت: بێگۆمان ئەو کەسێ ژ میراتی ژی دهێتە بێبەهر کرن چ کچ بیت یان کوڕ ماف هەیە ل دادگەهێ سکاڵایێ تومار بکەت، چونکە مافەکێ یاسایی و شەرعیە.
پارێزەر هەوار سەلاح د دیدارەکێ دا بۆ رۆژناما ئەڤرۆ دیار کر کو یاسا ب درێژی ل سەر میراتی ڕاوستیایە و گۆت: لێ ئەم نەشێین بێژین کو ب ڕێژەیا 100% میرات ب یەکسانی دهێتە دابەشکرن، گەلەک جاران غەدر ل کچێ دهێتە کرن ژلایێ برایێ وێ یان بابێ وێڤە و بتایبەت کچێن شویکری مافێ وان بدروستی پێ ناهێتە دان.
پارێزەری د بەردەوامیا ئاخفتنێن خۆدا دیار کر، پشتی مرنا بابێ د یاسایێ دا دو پشک ژ میراتی بو کوڕینە و پشکەک بۆ کچێ یە و هەکە دایک یا ساخ بیت دێ هەشت ئێکا وەرگریت ئانکو ئێک لسەر هەشت و ئەگەر زارۆک ژی نەبن ژنێ دێ چارێکەک بو وێ کەڤیت و گۆت: د یاسایێ دا چ جیاوازیا کچا شویکری و نەشویکری نینە و دێ هەر بەهرا خۆ یا دروست وەرگریت.
هەوار سەلاح دیار کر ژی کو میراتێ کچێ ژ یێ کوڕی کێمترە، ژبەرکو یاسایا عیراقێ ژێدەرێ وێ شەریعەتێ ئیسلامێ یە و گەلەک ئەگەر هەنە کو بەهرا کوڕی پتر بیت و گۆت: بو نموونە، دەمێ کوڕ ژیانا هەڤژینیێ پێک دئینیت مەهرێ ددەت، لێ بەرۆڤاژی کچ مەهرێ نادەت و ئەڤە یاسایەکا خودایی یە.
سەبارەت ئەو کەسێن ژ میراتی دهێنە بێبەهر کرن پارێزەری دا زانین، ئەو کەسێ ژ میراتی دهێتە بێبەهر کرن، دشێت سکالایێ ل دادگەهێ تومار بکەت و ئەڤە مافەکێ یاسایی وشەرعییە و گۆت: ل دادگەهێ مە دابەشناما شەرعی یا هەی، هەکە ناڤێ وی تێدا بیت و مافێ خۆ وەرنەگرتبیت دێ ب ڕێیا دادگەهێ مافێ وی پێ هێتە دان، ئەڤجا چ کچ بیت یان کوڕ و گەلەک کەسان بڤی شێوەی مافێن خۆ وەرگرتینە ب مەرجەکی کو یێ قەدەغە کری نەبیت ژ میراتی.
