داخازێ ژ سەرۆكێن پارتێن سیاسی دكەم بلا دەستێن خوە بكەنە دئێك دا و ئێك بگرن چونكە چنە ما ڤی مللەتی نەدیتی و باشترین چەكێ مە ئێكگرتنە
ديدار، سالار محةمةد دؤسكى:
1-2
ژ پێشمەرگەیێن كو خەبات و بەرخودان كری ل هەر دو شۆرەشێن ئیلۆن و گولانێ (محەمەد ئەحمەد) خەلكێ گوندێ (زێوا شێخ پیرامویس)ە ل ناحیا بامەرنێ سەر ب قەزا ئامێدیێ ڤە، ناڤبری برایێ مەزنێ پێنچ خێزانا خوە بوویە و دمالەكا دیندار و نشتیمان پەروەر دا چاڤێن خوە ل ژیانێ ڤەكرینە.
شەهیدێ زێندی، سەلام محەمەد ئەحمەد زێوەی، یێ بەرنیاس ب (سەلام زێوەی) برایێ شەش برا و سێ خویشكان كو دهێـتە هژمارتن ئێك ژ پاشماویێن ئەنفالێن دەڤەرا بەهدینان ل سالا 1988ێ، د دیدارەكێ دا ل گەل رۆژناما ئەڤرۆ بەحسێ قوربانی دانا خەلكێ دەڤەرێ بگشتی و مالا خوە ب تایبەتی دكەت و گۆت: ل دەسپێكا شۆرەشا ئیلۆنێ خەلكێ گوندێ زێوا شێخ پیراموس رۆلەكێ هەرە مەزن هەبوویە و گەلەك پێشمەرگە خەلكێ وی گوندی بووینە و گەلەك سەرقول و سەركردێن پێشمەرگەی وی دەمی ل گوندێ زێوێ بووینە و خەلكێ گوندی رۆلەكێ كاریگەر ل سەر دەڤەرێ هەبووینە هەم پشتەڤان و هەم خزمەتكارێن شورەشێ هەر چ ژێ هاتباكرن بۆ شۆرەشێ ئەنجامدایە، نوكە ژی شكەفتا (مەلا مستەفا بارزانی) ل گوندی هەیە و دەمێ خودێ ژێ رازی (مەلا مستەفا بارزانی)هاتیە گوندێ مە چەندین شەڤا ل وێ شكەفتێ دا نفستی یە و ل گەل خەلكێ گوندی كومبوویە و شانازی ب گوندێ مە بریە كو پتریا خەلكێ وێ پێشمەرگە بووینە و پشتەڤانێن شۆرەشێ بووینە.
سەلام زێوەی گۆت: بیرا من دهێت دو سالان من قوتابخانە ل گوندەكی خواندیە و ئەم چووین مە دخواند و دوژمنی توپ ل وێ قوتابخانێ دان و گەلەك جاران قوتابی و مامۆستا و فەرمانبەرێن قوتابخانێ مە جانتێن خوە ل قوتابخانێ هێلاینە و رەڤینە مە قەستا شكەفتان كریە و قوتابخانە هاتیە بەردان و ئەڤە مە فام ژ دونیایێ كری هەتا نوكە مە خوەشی ب ژیانێ نەبریە، گەلەك جاران دایكا من بەحس دكەت و بێژیت مە مالا خوە بریە(بانكا، ئەرزێ، كانی بەلاڤێ، چەلكێ، نەملكێ، گەرەگوهێ) ئەڤە هەمی جهێن مەیێن شورەشێ و هەتا نوكە مە شەش خانی گوری شۆرەشێ كرینە و ئەم نە دپەشێمانین و داخازێ ژ گەنجێن نوكە دكەین باوەریێ ب چەند گوتنا نەئینن وەرن دەرگەهێن چەند مالان ب قوتن هوون دێ چیرۆكان بینن، تشتێ خوەش بوومە گەلەك جاران ئەم سەردانا كەلها نزاركێ دكەین و قوتابیێن قوتابخانا دهێنە وی جهی و ئەم بەحسێ ژین و ژیار و ئازا خوە دكەین یا مە ل وێ كەلهێ دا دەربازكری.
سەلام زێوەی گۆت: گەلەك جاران حوكمەتا ئیراقێ هێرشێن بەرفرە ئیناینە سەر گوندێ مە ب هاریكاریا پێشمەرگەی و خەلكێ گوندی چ جاران گوندێ مە نەهاتیە بەردان و دیسا هێزا بەرگێری یا مللی ژی رۆلەكێ مەزن ل پاراستنا گوندی دا هەبوویە، چیرۆك و ئازارێن مللەتێ مە چ جاران ژ سەرێ مە ناهێنەدەرێ و ئەگەر ئەم هەمی گاڤا ژی بۆ مللەتێ خوە نەبێژین ئەم د گونەهبارین، پشتی خودێ و پێغەمبەرا دایك و بابن، بەلێ ئەگەر تویێ بێ ئاخ بی هەچكو تویێ بێ دایك و باب.
سەلام زێوەی زێدەتر گۆت: دناڤبەرا سالێن 1986-1987 هێزەك بناڤێ هێزا (مەلكو) هات دا گوندێ (ئەردنا) سوژیت و هێزەكا گەلەك توند و دژوار بوو، پێشمەرگەی وی دەمی فەرمانا وێ هێزێ راكر و پشتی بورینا سالەكێ ژڤێ روودانێ هەوا ئەنفالان دەسپێكر، هەر ئەو هێز هات ئەم گرتین و مە قەستا ناڤ بەرواری یا كر ل گوندێن(بازو وبێلیزانا) و چەند كەسەك هاتن و گۆتن سنور هاتنەگرتن و ل بەر خەلكی بەرزەبوو و دایك و زارۆكێن دكەنە هەوار و تەرش و كەوال هەمی چوونە ناڤ و ئێك و ڤەگەریاین مە هزر كر وەك هەر جارە دێ هێز هێت و شكێت و مە هزر نەدكر دكتاتورەك دێ چەند هێز و چەكێ خوەیێ سەر سنورێ ڤەگەرینت و دژی خەلكێ كوردستانێ بكارئینت و ئەڤە دهزرا مە دانەبوو، ئەم ڤەگەریاینە هندەك گەرلیان دناڤبەرا( زێوێ و ئەرزێ) دا كو هندەك گەلیێن ئاسێ نە و ئەم هەمی خەلكێ گوندێ زێوێ بووینە و ئەڤە دەسپێكەك بوو كو ئەو هێزا بناڤێ (مەلكو) بهێت وی خەلكی هەمیێ دەستە سەر بكەت و ئەم هەمی خەلك ئیناینە سەر جادا (شیڤا تنێ) و دەمێ كرینە ترۆمبێلا دا دەست ب قوتانا زەلامان كر كو (44) زێوەی (2) بامەرنی (1)ێ ئەردنی بوو و ب ترۆمبێلان ئیناینە بەر دیوارێ( ئێنشكێ) ئەگەر ترۆمبێلەكێ (20) كەس چووبانە تێدا ئەوان (40) كەس دكرنە تێدا و هەمی دهاڤێتنە سەر ئێك و بەر دیواری كومكرین و بوومە ئاخفتن و هەمان دەم زەلام قوتان و دووڤ دا پەیوەندی بووهاتن كو دڤێت ئەڤ مرۆڤە بهێنە ڤەگوهاستن بۆ كەلها نزاركێ و ل دەرگەهێ رۆژهەلاتێ كەلها نزاركێ هاتینە ژوور مەزانی ئەم هاتینە ژوور بەلێ مەنەزانی ئەم چەوا ژ ترۆمبێلان هاتینە خوارێ، و هەر ترۆمبێلەكێ چەند زەلامێن رژێمێ چوونێ و هەر هەمی ب قوتان و دارێن حەیزەرانی ئینانە خوارێ و گوپالێن هەمی دانعەمرا ژێ ستاندن و ل پێش چاڤێن ژن و زارۆكان ل تەنشتێن زەلامان دان و بتنێ هەوارا مە خودێ بوو و هەر مە دگۆت خودێ تەوارە مەوەر و ئەوا هاژێ نەبوو تو بەرپرسێ رێكخراوەكێ یان شڤان یان جوتیار بای ئەوان هزر دكر هەمی پێشمەرگە و ئێك دەرسوك نەما ل سەرێ زەلامان و هەمی ژێك جوداكرن و ژن و زارۆكان بوو و ژن و زارۆك ڤەگوهاستنە قاتێ دووێ و بێ خوارن و ڤەخوارن و حەنەفیەكا ئاڤێ ل خوارێ بوو و هەر كەسەكێ چووبا بەرحەنەفیێ هەتا (10) دارێن حەیزەرانی ڤێ دكەفتن و شەڤ ب سەرمەداهات برسی و ئەگەر دایكەكێ پاریەكێ نانی ل گەل خوە ئینابیت دا زارۆكێن خوە و ئەگەر نەهینابیت ئەوێ شەڤێ زارۆك مانە برسی و بێ خوارن و ڤەخوارن و هەمان دەم حەواریێن زەلاما یێ دچنە بەرئاسمانا هندی یێ دهێنە قوتان و مە دەنگێن باب و برایێن خوە نیاسین و بتنێ هەوارا مە خودێ بوو و نوكە ژی هزر دكەین ئەنفال خەون بوو و ب دەمژمێرەكێ دەرحەقی ڤێ روودانا مەزن ناهێنە دەرێ و ئەو شەڤ بوو سالەك و باب و برایێن مە یێ شەری ل گەل مرنێ دكەن و بەردەوام یێ دهێنە قوتان و ئەشكەنجەدان و ژنكێن سەرێ خوە ل دیوار و چەنجەران دەن و هەر ژنەكا دەردكەڤیت و قەستا جەگەرێ دكەت یا دهێتە قوتان و دایكا من دەرسووكا برایێ من ژبن پاستالێن لەشكرێ ئیراقێ ئینادەرێ و هەتا نوكە ئەو دەرسوك مە ل دەف خوە پاراستی یە، كەلها نزاركێ ئەمن و هەوالگێری و جێش شەعبی و چەتێن خوە فرۆش ژی تێدا بوون و مخابن دونیا هەمی دوژمنێ كەوی بیت و كەو بخوە ژی دوژمنێ خوە بیت و بتنێ ئێك شەڤ ماینە ل كەلها نزاركێ و هەمی برسی و ئەو شەڤ نەچوو و نەدبوو سپێدە، لدیف گۆتنا پیرەمێرەكێ مە كو نوكە دژیانێ دایە ب چاڤ دیتی یە كو ترۆمبێلەكا گرتی ئینا دەڤەرێ و زەلام خشاندن و هەمی هاڤێتنە تێدا و دەست و پێن گەلەك زەلامان وێ شەڤێ شكاند بوون هندی قوتا بوون و خوینا گەلەك زەلامان مابوو ب دیواران ڤە و زەلامان سپێدێ زوی بربوون.
سەلام زێوەی گۆت: نەبتنێ خەلكێ زێوێ بەلكو ژ هەمی گوندان خەلك ئیناینە وێرێ و ئەنفالان 1988 ب هەشت قوناغا دەربازبوو و سپێدێ ئەم هەمی كرینە ترۆمبێلان دا و هنارتینە ماعەسكەرێ سەلامیێ و ئەوی خەلكی گەلەك ئازار و نەخوشی دی تیە و نێزیكی هەشت نەهـ هولان تژی بووین و ئەو دو رۆژ بوو مە خوارن نەخواری و پشتی چووینە سەلامیێ شنی شیف دامە و بلا رۆلێ كەسەكی نەهێتە ژبیركرن و تایبەت ل كەلها نزاركێ كو نەبتنێ ل خەلكێ گوندێ مە بەلكو ل هەمی خەلكی بۆ خودان و ل مەمەرێن كەلهێ هاتن و چوون كر و گوتە دایكا ئەڤان خاك و شێکا ژ بەر ئەڤان زارۆكان بێخن چونكە دێ نوكە هێن بەن و پشتی گوتنا وی لەشكرێ ئیراقێ هاتن هندەكێن دی ژی برن و گەلەك بریندار ل كەلها نزاركێ هەبوون ئەڤی مرۆڤی دەرمان ژ دەرڤەی كەلهێ بۆ دئینان و دانێ، و گرنگە ئەڤ مرۆڤە هاتبا خەلاتكرن چونكە وێ رۆژێ ئەڤی گەلەك ژ مرنێ قورتالكرن و ئەگەر وی دەمی ئەمن و هەوالگێریا بەعسیا زانیبا كا چەوا باب و برایێن مە چوون ئەو ژی هوسا دا چن.
