داخاز سالح: ئەركێ من ب زەحمەتە لێ بێ ئۆمێد نابین
ئەڤرۆ
د دیدارەكێ دا راهێنەرێ نوو یێ تیما یانەیا شێخان و كورێ باژێرێ دهۆكێ داخازا سالح دیار كر بۆ وەرزێ نوو یێ خولا پلا دو یا كوردستانێ گرێبەست دگەل یانەیا ناڤهاتی ئیمزاكریە و ئەركێ وی ب زەحمەتە لێ بێ ئۆمێد نابن.
زێدەتر داخاز سالح بۆ رۆژناما ئەڤرۆ گۆت: سۆپاسیا كارگێریا یانەیا شێخان دكەم بۆ وێ باوەریێ و پێكڤە دێ هەمی بزاڤا كەین تیمەكا هەڤڕك هەبیت، هەرچەندە بەری وەرگرتنا تیمێ چار هەیڤ بوو دگەل راهێنەرێ بەرێ بەرهەڤی دكرن، لێ مخابن د ماوەیێ بۆری دا من گەلەك كێماتی دیتینە ژ وانا پرانیا یاریزانان ئەركێ خوە د ناڤ یاریگەهێ دا نزانن بجه بینن، دیسان كێماسیێن دناڤ هێلێن تیمێ دا هەبوون، لەوما من پێنچ یاریزان ژ یانەیا گارە و سێ ژ مووسلێ ئیناینە دناڤ رێزێن تیمێ دا و دووڤچوونا چەستەیی وان دكەم بەری بڕیارا دووماهیێ بدەم.
ژلایەكێ دووڤە ناڤهاتی گۆت: ئەركێ من ب سانەهی نابیت لێ دگەل پشتەڤانیا كارگێریا یانێ ئەوا ب هەردو مللان پشتەڤانن گەشبینم ب گەهینە ئارمانجا خوە و یا یانێ ئەو ژی دەربازبوون بۆ پلا ئێكا كوردستانێ و بێ ئۆمێد نابین، سەرباری گرێبەستا وەكو مووچە گەلەك یا كێمە لێ بۆ خاترا كارگێریێ و ناڤێ یانەیا شێخان و پشتەڤانیا وەرزشا دەڤەرێ دێ هەمی بزاڤان كەین تیمەكا رێكخستی و هەڤرك بەرهەڤكەین و ژبلی ئارمانجێن خوە بۆ وەرزێ دووڤدا تیما شێخان یا بهێز بیت.
