داخوازا دروستكرنا ده‌ڤه‌ره‌كا ئارام ل كابوولێ دهێته كرن
ئه‌ڤرۆ:
پشتی ئێرشێن تیرۆرستی یێ ل نێزیكی فرۆكه‌خانا نێڤده‌وله‌تی یا كابوولێ ل ئه‌فغانستانێ كو د ئه‌نجام دا پتر ژ سه‌د كه‌سان هاتنه كوشتن، هه‌ر دو وه‌لاتێن فره‌نسا و بریتانیا داخواز دكه‌ن كو ده‌ڤه‌ره‌كا ئارام ل كابوولێ بهێته دروست كرن دا ئه‌و یه‌ك ببیته جهه‌ك بۆ پاراستنا وه‌لاتیێن سڤیل یێن ئه‌فغانستانێ كو ژ ده‌ستێ تالیبانێ دره‌ڤن و داخوازا هاریكاریێ ژ جڤاكێ نێڤده‌وله‌تی دكه‌ن.
وه‌زاره‌تا ده‌رڤه یا فره‌نسا دوهی راگه‌هاند كو ئارمانجا وان ژ دروستكرنا ده‌ڤه‌ره‌كا ئارام ل كابوولێ بۆ هندێ یه دا كو ئه‌و وه‌لاتیێن ئه‌فغانستانێ یێن كو دخوازن ژ وه‌لاتێ خوه ده‌ركه‌ڤن ل وێرێ بنه‌جه بن دا ل ژێر چاڤدێریا نه‌ته‌وه‌ێن ئێكگرتی دا بیت، بێگومان هه‌بوونا ده‌ڤه‌ره‌كا ئارام دێ وه‌سا كه‌ت كو نه‌ته‌وه‌ێن ئێكگرتی ژی بشێت هاریكاریێن مرۆڤی بگه‌هینته خه‌لكێ سڤیل ل ئه‌فغانستانێ.
سه‌رۆك وه‌زیرێن بریتانیا ژی راگه‌هاند كو ژ به‌ر ئالۆزیێن ڤێ دووماهیێ دڤێت ده‌ڤه‌ره‌كا ئارام ل كابوولێ بهێته ئاڤاكرن دا جانێ وه‌لاتیێن سڤیل یێن ئه‌فغانستانێ ب تایبه‌تی ژی ئه‌و وه‌لاتیێن كو دخوازن ژ ئه‌فغانستانێ ده‌ركه‌ڤن یێ پاراستی بیت. ژ به‌ر هندێ ژی نها ئه‌و ل سه‌ر هندێ كار دكه‌ن كو پرۆژه‌كێ پێشكێشی جڤاتا ئاسایشێ بكه‌ن.
